Doding Puji-pujian bani Naibata na Paluahkon Israel
1Bani pambobai koor. Sada Psalm. Sada doding. Marolob-olob ma bani Naibata, nasiam haganup tanoh on.
2Dodingkon nasiam ma hamuliaon ni goran-Ni; sombahkon nasiam ma Bani puji-pujian na marmulia.
3Hatahon nasiam ma bani Naibata, “Banggalni in sagala horja-Mu! Pangkorhon ni timbul ni hagogohon-Mu, ningon do marsombah hu Bamu sagala munsuh-Mu.
4Ganup tanoh on marsombah do hu Bamu, sai dodingkononni do Ham, dodingkononni do goran-Mu. Sela.”
5Roh anjaha tonggor nasiam ma pambahenan ni Naibata; gok kuasa do pambahenan-Ni dompak anak ni jolma.
6Ipaubah do laut gabe na horah, mardalan nahei sidea mandipari bah mardalan; ijai marmalas ni uhur do hita marhiteihon-Si,
7na manrajai tongtong marhitei hagogohon-Ni, na mangkawahkon sagala bangsa marhitei panonggor-Ni, ase ulang mangenjeng halak panggeori. Sela.
8Puji ma, ale sagala bangsa, Naibatanami, pabogeihon nasiam ma puji-pujian Bani!
9Ia na mambahen hosahnami manggoluh, anjaha seng ilopas naheinami tartolsu.
10Tongon, domma iuji Ham hanami, alo Naibata, domma ilobur Ham hanami songon na manlobur pirak.
11Domma itogu Ham hanami hubagas jaring, parrahut na poltik inahkon Ham bani binongeinami.
12Ipaturut Ham do jolma margareta i atas ulunami, domma masuk hanami hubagas apuy pakon bah; tapi ipadarat Ham do hanami bani na lumbang.
13Masukanku ma rumah-Mu mamboan galangan situtungon, galaronku ma Bamu bagah-bagahku,
14ai ma na niluarhon ni bibirhu, anjaha pinarbagah ni pamanganku sanggah tarsosak ahu.
15Galangan situtungon na pinamombur padasonku do Bamu, marhasoman misbou ni galangan biribiri tunggal; sai pasirsironku do Bamu lombu pakon hambing tunggal. Sela.
16Roh ma, tangar ma, nasiam haganup na mangkabiari Naibata, ase hubaritahon pambahen ni Naibata bani tonduyhu.
17Hu Bani do dilo-dilo ahu marhitei pamanganku, anjaha puji-pujian domma sirsir i atas dilahku.
18Ambit adong hajahaton hukawahkon ibagas uhurhu, tontu seng tangihonon ni Tuhan ahu.
19Tongon, domma itangihon Naibata ahu, domma iparuhurhon sora ni tonggongku.
20Napuji ma Naibata, na so manulak tonggongku, sonai homa idop ni uhur-Ni hu bangku.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel