Alkitab Mobile SABDA
[VER] : [TAA]     [PL]  [PB] 
 <<  Yohanes 21 >> 

1Wali yako etu i Yesu mampapokitaka wo’u kami to anaguruNya Ia tempo kami nja’u towo ndano Tiberias. Ewa si’i palaong to mawali tempo etu.

2Re’e seore pitu mba’a kami to anaguru i Yesu sindara-ndara nja’u towo ndano etu. Tau pitu etu, etu semo i Simon Petrus, i Tomas to rato’oka seja Tau Api, i Natanael to yako ri kota Kana nja’u propinsi Galilea, ana i nSebedeus to dua mba’a, pasi dua wo’u anaguru i Yesu.

3Wali tempo etu i Simon Petrus manganto’oka kami to yununya etu, ia manganto’o, “Aku yau damangajala bau.” Wali kami manganto’o, “Kami dayau seja.” Wali kami pitu mapone ri bangka panewa yau manjala, pei tare kojo bau to narata mami wuri etu.

4Wali ojo kaeonya rao, i Yesu re’e makore ri towo ndano, pei kami to anaguruNya taa mangansanika bara i Yesu semo.

5Wali i Yesu mampokio kami, Ia manganto’o, “A’ia’ingKu, bara naka dale komi?” Pei kami mangansono, “Taa kojo!”

6Wali Ia manganto’o, “Soumaka jalamu ri sambali nu bangka to tondo ngkana, panewa komi damangarata bau. Wali kami mangika ewa wimba to Ia manganto’oka kami etu, roo see boros kojo bau to narata mami ri raya nu jala. See naka kami taa nakoto mangarebu muni jala etu nto’u raya nu bangka apa mabeu kojo.

7Wali anaguru to naporayang kojo i Yesu, ia manganto’oka i Petrus, “Gete, i Pue semo etu!” Wali ojo pangandonge i mPetrus i Pue semo to nja’u ria, ia mansaka mamposunsuka muni pakenya apa ia roomo mangawonsu yau tempo mapalaong. Roo see ia matambesi yau lo’u raya nu ue damangampago wii ndano.

8Pei kami to yununya mangalulu ri raya nu bangka. Kami mangarebu jala to buke bau, apa kami tamo longko yako ri wii ndano. Jamo bara satu meter kalongkonya.

9Wali ojo kadongka mami nja’u ria, kami mangkita ruti to mawea. Pasi nja’u samba’a bau to ratunu ri wawonya, pasi re’e seja roti.

10Wali i Yesu manganto’oka kami, “Keni mai bara sawei mba’a bau to owo nurata ngkomi.”

11Wali i Simon Petrus mapone muni ri bangka pei mangaditi jala njo’u wii ndano. Wali jala etu buke kojo bau to bose. Bau etu kaborosinya satu lima mpuyu pei togo mba’a. Pei nempo ewa see kaborosinya bau, jala etu taa masia yau.

12Wali i Yesu manganto’oka kami, “Mai pei pangkoni.” Pei nempo kami tiroowa ipu raya mami mampobuuka i Yesu semo, tare pasi samba’a kami to anaguruNya to makoje rayanya mampotanaka resi Ia, “I sema kamonsonya Komi?” apa raya mami mangansanimo i Pue Yesu semo.

13Wali i Yesu yau mangoko roti pei mangawaika resi kami, pasi ewa see seja inikaNya re’e bau to ratunu etu.

14Wali etu semo katogo ngkaninya i Yesu simparata pei kami to anaguruNya tempo Ia roomo mambangu muni yako ri kapateNya.

15Wali ojo karoonya kami mangkoni, i Yesu mampotanaka resi i Petrus, to’oNya, “Simon, ana i Yohanes, wimba bara korom semo to bae-bae pamporayangmu resi Aku pei yunumu si’i?” I Petrus mangansono, “Iya, Pue, Komi mangansani aku galung ngKomi.” Wali i Yesu manganto’o, “Ane ewa see, piara joangKu to raporapaka ewa ana nu domba.”

16Yako etu i Yesu mampotanaka wo’u resi i Petrus kadua ngkaninya, Ia manganto’o, “Simon, ana i Yohanes, bara monso pu’u korom mamporayang Aku?” Wali i Petrus mangansono wo’u, “Iya, Pue, Komi mangansani aku galung ngKomi.” Panewa i Yesu manganto’o, “Ane ewa see, kampang joangKu to raporapaka ewa domba.”

17Roo see i Yesu mampotanaka wo’u resi ia katogo ngkaninya, “Simon, ana i Yohanes, bara monso korom galungKu?” Wali i Petrus mawo kojo rayanya mangandonge i Yesu mampotanaka katogo ngkaninya mangkonong pamporayanginya. Wali ia manganto’o, “O Pue, Komi mangansani samparia, wali Komi mangansani aku galung ngKomi.” Wali i Yesu manganto’o wo’u, “Ane ewa see, piara joangKu to raporapaka ewa domba.

18Aku manganto’oka korom, monso pu’u, tempo korom damangurawa, tempo etu korom semo to mamposunsuka pakemu pasi manganso’o salipimu damampakaroso yau bara imbare rani nukayako. Pei tempo korom tu’am, tempo etu korom damangantotoka palemu panewa tau to yusa damangampungu korom pei damangkeni korom njo’u tampa to taa nuporani ngkorom yau.”

19Wali naka pei i Yesu manganto’o gombo etu see damampaponsanika mangkonong ewa wimba kapate to danarata i mPetrus. Pei yako kapatenya etu see naka tau to yusa damangabarong i Pue Allah. Wali ojo karoonya i Yesu manganto’o gombo etu, Ia manganto’oka wo’u i Petrus, “Lulu Aku!”

20Wali sira dua malinja, pei ri raya mpalinja nsira etu i Petrus mangalekoka tangonya pei mangkita anaguru to naporayang kojo i Yesu, ia mangalulu payu nsira. Anaguru etu, ia semo to matombo ri dada i Yesu seore tempo sira mangkoni sindara-ndara ri tempo Roa Paskah. Pasi tempo sira mangkoni etu, ia semo to mampotanaka resi i Yesu, manganto’o, “Pue, to imba kami to damamposora yau Komi?”

21Wali tempo i Petrus mangkita ia mangalulu sira tempo sira malinja etu, ia mampotanaka resi i Yesu, to’onya, “Pue, kesaa to damawali resi ia?”

22Pei i Yesu manganto’o, “Maka pei korom mampotanaka mangkonong ia? Ane rapanya Aku rani ia datuwu rataka ri temponya Aku ma’i muni ri lino, ane ewa see tare batuanginya korom mangansani yami. Si’a to etu to Aku rani korom mampobuuka. To bae batuanginya resi korom mampobuu-buuka Aku pasi mangalulu Aku!”

23Wali saba yako gombo to nato’o i Yesu etu, see naka kanjo’unjo’u natikareba-rebamo ri oyo ntau to mangaya Ia, manganto’o anaguru to naporayang kojo i Yesu etu, ia taa kojo damate yau. Pei kamonsonya i Yesu taa manganto’o anaguru etu taa damate yau. Ia ojo manganto’o, “Ane rapanya Aku rani ia datuwu rataka ri temponya Aku ma’i muni ri lino, tare batuanginya korom mangansani yami.”

24Wali anaguru to naporayang kojo i Yesu aku semo. Wali aku semo to mawali matamanasa mangkonong palaong to etu. Pasi aku semo to roomo mangantulis gombo si’i mangkonong palaong to etu. Wali kami mangansani monso pu’u anu to aku mangantulis si’i.

25Pasi boros wo’u palaong to naika i Yesu. Wali ane rapanya samparia palaong to etu paka natulis ntau, ane ewa see taa soa lino si’i darapamposaka buku to ratulis etu apa malagi pu’u.



Download Audio MP3 (Yohanes 21):
Mobile (Low Quality) - CD (High Quality)

 <<  Yohanes 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran