Kamauparanna Uzia ma’parenta
1Naalami mintu’ to Yehuda tu Uzia, tu sangpulo annanmo taunna, anna angkai’i dadi datu ussonda Amazia, ambe’na.
2Napematoto’imi tu Elot, sia napasulei lako Yehuda, tonna malemo tama batu dilobang tu datu, sola nene’ to dolona.
3Iatu Uzia sangpulo annanmo taunna, tonna dadi datu, anna ma’parenta limangpulo ndua taunna dio Yerusalem. Iatu indo’na disanga Yekholia, dio mai Yerusalem.
4Napogau’ tu apa malolo dio pentiroNa PUANG, susitu mintu’ penggauranna Amazia, ambe’na.
5Undaka’ Puang Matua tempon tuona Zakharia, tu unnada’i mengkaola lako Puang Matua; temponna undaka PUANG, Napamaupa’ Puang Matua.
6Tassu’mi tu datu urrarii to Filistin, natuanni tu benteng tembo’na Gat sia Yabne sia Asdod, nabangunmi tu ba’tu pira-pira benteng sikandappi’ Asdod sia lan lili’na to Filistin.
7Natundui Puang Matua tu datu tonna urrarii to Filistin sia to Arab, tu torro dio Gur-Baal, sia to Meunim.
8Iatu to Amon umpennoloan sima lako Uzia. Tarompo’ tu sanganna sae lako Mesir, belanna iatu kuasanna sakapua-puana.
9Nabangunmi Uzia tu ba’tu pira-pira menara dio Yerusalem dio Babangan-Tetuk sia dio Babangan-Lombok sia dio Sulapa’, anna pematoto’i.
10Sia nabangun dukapa tu ba’tu pira-pira menara lan padang pangallaran sia buda bubun nabo’bok, belanna unnampui buda sapi sia domba na bembe’, la diong Padang Merrantena la dao Padang Rante membuntunna; sia to ma’pa’lakna sia to ma’pa’lak anggoro’na dao lu buntu sia dio lu padang malompo, belanna naporai datu tu lakoan padang.
11Sia naampui Uzia tu surodadu, tu dipopa’biasa parari, sia tu tassu’ la parari ma’tuntunan unturu’ bilanganna, nabilang Yeiel, pangulu to massura’ sia Maaseya, to diala parea, tu naparenta Hananya, misa’i tu kamandangna datu.
12Iatu bilanganna mintu’ pangulu rapunna surodadu malinta’, den duangsa’bu annanratu’.
13Iatu surodadu naparenta tau iato mai den talluratu’ mpitung sa’bu llima ratu’ pa’barani tu dipopa’biasa parari la untundui datu unnea uali.
14Iatu mintu’ surodadu napasakkaran Uzia balulang sia doke sia songko’ tambaga sia bayu kararran sia pana sia batu dipa’kolakan.
15Nagaragai polepa datu tu ba’tu pira-pira parea parari dio Yerusalem, pa’tampa to matarru’ la dipadao mintu’ menara sia tetuk la umpa’panan tinaran sia umpa’lobangan batu kapua. Tarompo’mi tu sangnganna datu, belanna dikamasei pa’tunduan memangngan, naurunganni kapua kuasanna.
Uzia golenan anna mate
16Apa iatonna makuasamo matampomi tu datu, naurunganni ma’gau’ kadake tongan sia tae’mo namaruru’ lako PUANG, Kapenombanna, iamotu tama banua kabusunganNa PUANG la untunu dupa dao inan pemalaran pantunuan dupa.
17Apa naundii to minaa Azarya, sola to minaanna PUANG karuapulona tu nasisolan, to batta’ penaanna.
18Natingoimi tu datu Uzia sia ma’kada lako nakua: E Uzia, tang sipatukomi la untunuan dupa PUANG, sangadinna to minaapi, bati’na Harun, tu mangka dipamasero la untunu dupa. Tassu’komi lan mai inan maindan, belanna tang maruru’komi sia iatu apa iato tae’ mipomala’bi’i dio oloNa PUANG Kapenomban.
19Sengkemi tu Uzia; na iatu dulang pantunuan dupa natoe. Sia iatonna marassan ussengkei tu mai to minaa, pakalan ku’ba’mi tu golen dio kidena dio tingayona mintu’ to minaa, lan banuanNa PUANG sikandappi’ inan pemalaran pantunuan dupa.
20Napemarangami Azarya, tominaa kapua sola mintu’ tominaa, manassa tonganmo golen tu dio kidena, nasualemi tau iato mai inde to dio mai, sia ia kalena dukamo tikara-kara tassu’ lako salian, belanna Napata’pai lima PUANG.
21Iatu datu Uzia golenammo sae lako allo kamateanna. Sia belanna golenan anna torro lan misa’ banua torro senga’, belanna disarakki dio mai banuanNa PUANG. Na Yotam, anakna muane, umpoissanni tu tongkonan layukna datu sia umparentai tu to buda lan tondok.
22Iatu tang dipokadannapa tu tuna’na Uzia, tu dolona sia iatu undinna, mangkamo nasura’ nabi Yesaya, anakna Amos.
23Mangkato malemi tama batu dilobang tu Uzia sola nene’ to dolona, anna dipeliang sola nene’ to dolona dio padang dio sa’de liangna mintu’ datu, belanna nakua tau: Golenan. Anna Yotam, anakna muane, ussondai dadi datu.
<< 2 Tawarikh 26 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel