Amsal 4 (TORAJA)

[VER] : [TORAJA] [PL] [PB]

<< Amsal 4 >>

Pa’pakilala la undaka’ kakinaan

1Perangiimi, e mintu’ pia, tu peada’na misa’ ambe’, sia papatui penaa ammu appa’ pakita penaa,

2belanna la kubenkomi tu pa’pangada’ melo, da miboko’i tu pa’patudungku.

3Iatongku piapa solana’ ambe’ku, kaboro’pa’ sia anak misa’ dio pentirona indo’ku,

4naada’imo’ anna ma’kada lako kaleku nakua: Palan penaa tonganni tu mintu’ kadangku, karitutui tu pepasanku, namelo katuoammu.

5Daka’i tu kakinaan, daka’i tu pakita penaa, da mutang kilalai sia da muboko’i tu kada sun dipudukku.

6Da mutampei anna karitutuiko, kamali’i, anna pamakarimmanko.

7Iatu pamulanna kakinaan, iamotu sipatu la mudaka’ tu kakinaan, sia daka’i tu pakita penaa siangga’ mintu’ apa dio kalemu.

8Pamatandei, anna ia umpalayukko, ia la umpamala’bi’ko, ke muraka’i.

9Iamo la umpabeke’i tali ballo tu ulummu, sia la ungkamaseangko makota maelo.

10Perangiimi, e anakku, sia tarimai tu kadangku, anna dipamalambe’ tu sunga’mu.

11Kuada’iko tu diona lalan kakinaan, kupalingkako dio lu lalan malolo.

12Iake lumingkako tae’ mula diampangi, sia iake ma’dondoko, tae’ mula titodo.

13Toe manda’i tu peada’, da murampananni, sangadinna karitutui belanna iamo mupotuo.

14Da muolai tu lalanna to tang mekaaluk, sia da mutumengka dio batattana to kadake.

15Patoyangko kalemu inde to dio mai, da muolai lendu’; sepangko inde to dio mai, ammu tarru’ male.

16Belanna tae’ namamma’ tu tau iato mai, ke tae’pi napogau’ kadakena; sia tae’ natikkaru’du’ ke tae’pi nasongkan tau misa’.

17Belanna tau iato mai ungkande roti katangmekaalukan sia unniru’ uai anggoro’ kamasa’garan.

18Apa iatu lalanna to malambu’ susito arrang bu’tu melambi’, samasai-sainna saparrang-parrangna sae lako masiangna tongan.

19Iatu lalanna to tang mekaaluk susi kamapittukan; tae’ naissanni tu apa ma’din la nanii titodo.

20E anakku, palan penaai tu mintu’ kadangku, sia tananni talinga tu mintu’ bisarangku;

21da napa’de dio pentiromu tu iannato, sia lamunni lan penaammu.

22Belanna iamoto tu katuoan manaman lako minda-minda unnappa’i sia napomaleke mintu’ kalena.

23Karitutui tu penaammu losong na mintu’ apa sipatu dikaritutui, belanna lan mai nanii bu’tu tu kalimbuang katuoan.

24Patoyangi dio mai kalemu tu lila mo’rang sia pamambelai dio mai kalemu tu puduk ma’bulang leko’.

25La mentiro melo lako tingayo tu matammu sia da mumentiro senga’, ke untontongiko tau.

26Popentengkai tu lette’mu lako marantena sia pamanassai tu mintu’ patu lalanmu.

27Da musepang lako kanan ba’tu lako kairi, patoyangi tu lette’mu dio mai kadakena.

<< Amsal 4 >>

Bahan Renungan: SH - RH - ROC