1Attu iato iatu mintu’ kasirampunan umpekapuai gamaranna sia sitangiran lan bongi iato.
2Mintu’ tu to Israel umparopo’ Musa sola Harun; anna ma’kada tu mintu’ kasirampunan lako, nakua: Ha’a, melo kengki mate bangmo dio Mesir, ba’tu lan te padang pangallaran.
3Ma’apai Nala umbaakan PUANG lako tondok iato, angki tibambang nakande pa’dang sia iatu baineki sia anakki la dirampa? Tae’raka namelo, ke sule bangmokan lako Mesir!
4Pada sipa’kada-kadami tu tau iato mai nakua: Melo ke taangka’i tu misa’ pangulu, anta sule lako Mesir.
5Attu iato lumbangmi Musa sola Harun dio pentirona mintu’ kombongan kasirampunanna to Israel.
6Apa iatu Yosua, anakna Nun, sia Kaleb, anakna Yefune, sangbilangan tu to umparessa buni tondok iato, usserek-serek tamangkalena;
7anna ma’kada lako mintu’ kasirampunan to Israel nakua: Iatu tondok mangka kiola lendu’ angki paressai, iamo tondok lendu’ melona.
8Iake naalaki’ penaanNa PUANG, manassa Nabaaki’ tama tondok iato sia Nakamaseangki’, iamotu misa’ tondok sebo pangandu’ sia tani’ enoan.
9Sangadinna da mipabali-bali lako PUANG sia da mikataku’i tu pa’tondokan iato, belanna la tapokande, sia iatu ongan-onganna lendu’mo dio mai kalena sia PUANG tu ussisolangki’, da ammi kataku’i.
10Attu iato sipa’kadami tu mintu’ kasirampunan iato la ulleba’i batu tu tau sola duai. Apa iatu kamala’biranNa PUANG payan lako mintu’ to Israel lan Tenda Kasitammuan.
11Ma’kadami tu PUANG lako Musa, Nakua: Sangapapara te bangsa iate la ussayuNa’ sia sangapapara te tau iato mai tang la umpatonganNa’, moi angKu pogau’mi tu mintu’ tanda kalle-kallean dio lu tau iato mai?
12La Kuparampoi ropu te bangsa iate sia la Kusabu’i, angKu padadiko misa’ bangsa kapua sia mawatang na iate bangsa iate.
13Ma’kadami tu Musa lako PUANG nakua: Iake narangii to Mesir – te bangsa inang Mipatassu’mo dio mai tondok to Mesir tete dio kamatotoramMs-
14la ma’kada lako tau lan tondok iate, tu mangka urrangii, kumua Kamu, o PUANG, urrondongi te bangsa iate sia mangkamoKomi, o PUANG sitiro lindo, anna iatu gaunMi daona lu tau iato mai sia doloKomi lan lentong gaun ke allona sia lan lentong api ke bonginna.
15Iake la Mipateimi te bangsa iate sae lako tappunna, manassa la ma’kada tu mintu’ bangsa urrangimi tu karebamMi, nakua:
16Belanna tang Nabelamo tu PUANG ussolanni te bangsa iate tama tondok, tu Naalluranni umpalao sumpa, iamoto Nasanggangi lan lu padang pangallaran.
17Totemo da’ito na iatu kuasanNa Puang paan tu kamatandeanNa, susitu mangka Mipokada, Mikua:
18PUANG tu kalando pesuka’ sia kapua kamasokananNa, tu umpagarri’ kakelokan sia kapatodo-tintingan, tu tae’ Naeloranni tang la diukung tu to sala, apa Napapakkanni tu kakadakeanna mintu’ ambe’ sae lako anakna sae lako osso’ ma’pentallunna sia ma’penna’pa’na.
19Pagarri’i tu kakadakeanna te bangsa iate situru’ kakapuanna kamasokanamMi, susi kamangkamMi umpagarri’ kasalanna bangsa iate randuk dio mai tondok Mesir rampo indete.
20Ma’kadami tu PUANG Nakua: Tete dio pengkamoyamu angKu pagarri’i.
21Apa la lelukraka tuoKu sia tae’ nasalai kamala’biranNa PUANG la ussamboi mintu’ lino.
22Kumua tae’ misa’ muane, tu mangka untiro kamala’birangKu sia tanda kalle-kallean mangka Kupogau’ lan Mesir sia lan padang pangallaran, sia pessangpuloMo’ nasandak sia tang umperangii kadangKu,
23la untiro tondok, tu mangka Kuallu’ umpalao sumpa lako nene’ to dolona! Ondongpi moi misa’ tu mintu’ to ussayuNa’ tae’ la untiroi tu tondok iato.
24Sangadinna taungKu Kaleb, tu ma’penaa senga’ sia lantuk penaanna urrundu’Na’, la Kusolan tama tondok, tu mangka naola, sia la napomana’ bati’na.
25Iatu to Amalek sia to Kanaan torro dio Padang marante. La tibalikkomi ammi sule ma’palulako padang pangallaran, umpatu tasik Teberau.
26Ma’kada poleomi tu PUANG lako Musa sola Harun Nakua:
27Sangapapara masainna te kasirampunan kadake iate la umparopo’Na’? Iatu mintu’ pa’paropo’na to Israel lako Kaleku, Kurangi nasang.
28Kuanni kumua: Susite tu kadanNa PUANG: La lelukraka tuoKu, manassa la Kupogau’ lako kalemi, susitu mipokada tama pa’perangingKu!
29Inde te padang pangallaran la tibambang tu batang rabukmi, iamotu ba’tu pira-pira tu to mangka dibilang, situru’ mintu’ bilanganna, randuk dio mai duangpulo taunna sia la’bi, belanna kama’paroposammi lako Kaleku.
30Manassa inang tae’ mila tama tondok, tu mangka Kuallu’ umpalao sumpa la Kunii umpatorrokomi lan, sangadinna Kaleb, anakna Yefune sia Yosua, anakna Nun!
31Iatu mai anakmi tu mangka mipokada diona a’ganna, kumua la dadi to dirampa – tau iato la Kusolan tama, anna tandai tu tondok misayu.
32Apa iatu kamu, iatu batang rabukmi la tibambang lan padang pangallaran iate,
33na iatu mai anakmi la patangpulo taunna lan padang pangallaran salamba salao, lao mangkambi’ sisurung tu gau’ salami sae lako tibambang nasang tu batang rabukmi lan padang pangallaran.
34Situru’ tu bilanganna allo minii umparessa bunii tu tondok, iamotu patangpulo allona, sangtaun ke sangallooi, ammi sisurung tu kakadakeammi lan patangpulo taunna, kumua, ammi issanni battuananna tu kamembokorangKu.
35Akumo, tu PUANG, mangka ma’kada. Manassa la Kupogau’ susite lako mintu’ kasirampunan kadake iate, tu massituru’ umbaliNa’. Lan te padang pangallaran la nanii sabu’ sia la nanii mate.
36Iatu muane tu mangka nasua Musa la umparessa buni tondok, sia iatonna sulemo, iami napobannang tu mintu’ kasirampunan ma’paropo’ lako Musa, belanna umpalele kareba kadake diona tu tondok iato.
37Tau iate, tu umpalele kadake diona tondok iato, mate nasang, belanna narua kasanggangan dio oloNa PUANG.
38Apa iatu Yosua, anakna Nun, sia Kaleb, anakna Yefune, tontong siapa tuo dio mai tu to lao umparessa buni tondok iato.
Tang landa’ tu penggauranna la ullaoi tondok Kanaan lo’na lu
39Naparampomi Musa te kada iate lako mintu’ to Israel, namassanda bolong tu tau iato.
40Masiang melambi’ to, la moraimi tu tau iato tuka’ langngan botto buntu, anna metamba-tamba, nakua: Iate kami ke’de’mokan lako to’ inan, tu Napokada PUANG, belanna kasalammokan.
41Apa ma’kada tu Musa nakua: Ma’apai ammi pasalai tu parentaNa PUANG? Manassa tae’ na la dadi to.
42Da mike’de’, belanna tae’ Narondongkomi PUANG, kumua da ammi talo dio tingayona ualimmi,
43belanna iatu to Amalek sia to Kanaan umbalikomi, ammi tibambang nakande pa’dang, belanna miboko’imo tu PUANG, sia tang la Narondongmokomi PUANG.
44Apa napabarani bang tu penaanna tuka’ langngan botto buntu, apa iatu patti basseNa PUANG sola Musa tae’ natampei tu to’ tenda.
45Attu iato mengkalaomi tu to Amalek sia to Kanaan, tu ma’tondok dao lu ma’buntunna, anna taloi sia napasisarak-sarak tau iato, anna sorong boko’ sae lako Horma.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel