Pemala’ dipennoloan kiallo-kiallo sia pemala’ dipennoloan, ke pa’gauran
1Ma’kadami tu PUANG lako Musa Nakua:
2La mupasan tu to Israel sia pokadanni, kumua: la mikanandai mipennoloanni lako Kaleku tu pemala’ dipemalaran lako Kaleku, iamotu kandeKu, dipopemala’ pantunu, dipobau busarungngu’ dio oloKu, lan attu dipamanassa.
3Sia pokadanni lako tu tau, kumua: Iamote tu pemala’ pantunu tu la mipennoloan lako PUANG, iamotu da’dua domba sisangtaunmo, tu tae’ tattanna, dipopemala’ ditunu pu’pu’ kiallo-kiallo.
4Iatu misa’ domba la muparandan, ke melambi’, iatu misa’na la muparandan, ke makaroenni.
5Dipasisola pissan taa sangpulona epa ta’pung manisak dipasigerok minna’ dio mai saitun dilambuk sangtaa a’pa’na hin la dipokande dipemalaran.
6Iamote tu pemala’ ditunu pu’pu’ kiallo-kiallo, tu dipondok dao buntu Sinai, la dipobau busarungngu’, iamotu misa’ pemala’ pantunu dipemalaran lako PUANG.
7Sia pemala’ pantedok, tu dipasisolanni la sangtaa a’pa’na hin, ke misa’o domba; tedokanni PUANG tu pemala’ pantedok dio mai apa diiru’ tu mepamalango lan inan maindan.
8Na iatu domba senga’ la muparandan, ke makaroenni; la muparandan susitu kande dipemalaran ke melambi’, sia susi pemala’ pantedok, tu dipasisolanni, iamotu pemala’ pantunu dipemalaran lako PUANG, dipobau busarungngu’.
9Na iake allo katorroan la mupemalaran tu da’dua domba sisangtaunmo tu tae’ tattanna sola duang taanna ke sangpuloi ta’pung manisak, dipasigerok minna’, dipokande dipemalaran, sia pemala’ pantedok, tu dipasisolanni.
10Iamote tu pemala’ ditunu pu’pu’na allo katorroan, ke allo katorroanoi, senga’ iatu pemala’ ditunu pu’pu’ kiallo-kiallo, sia pemala’ pantedok dipasisolanni.
11Iake pamulanna bulanmi la mipemalaran lako PUANG tu pemala’ ditunu pu’pu’, iamotu da’dua anak sapi laki, misa’ domba laki, pitu domba sisangtaunmo, tu tae’ tattanna,
12dipasisola tallung taanna ke sangpuloi ta’pung manisak, dipasigerok minna’ la dipokande dipemalaran, ke simisa’o sapi laki; sia duang taanna ke sangpuloi ta’pung manisak, dipasigerok minna’ dipokande dipemalaran, ke misa’o domba laki.
13Sia sangtaanna ke sangpuloi ta’pung manisak dipasigerok minna’ dipokande dipemalaran, ke misa’o domba, iamote tu pemala’ ditunu pu’pu’, dipobau busarungngu’, iamotu pemala’ pantunu, dipemalaran lako PUANG.
14Iatu pemala’ pantedok, la dipasisolanni, iamotu uai anggoro’ sangtangnga hin, ke misa’o sapi laki, sia sangtaa tallunna hin, ke misa’o domba laki, sia sangtaa a’pa’na hin, ke misa’o domba. Iamote tu pemala’ ditunu pu’pu’, ke sangbulanoi lan simisa’-misa’ bulan lan mintu’ bulan ke taunoi.
15Sia misa’ bembe’ laki la diparandan diposuru’ pengkalossoran lako PUANG, sia pemala’ pantedok dipasisolanni, senga’ na iatu pemala’ ditunu pu’pu’ kiallo-kiallo.
16Lan bulan bunga’na, allo ma’pessangpulo a’pa’na bulan iato la dipogauran Pa’pasa tu PUANG.
17Sia lan allo ma’pessangpulo lima lan bulan iato, la den allo kapua; pitung allo la nanii tau ungkande roti tang diragii.
18Iake allo bunga’na la den tu kasirampunan masero; da’ mitoe pengkarangan dakaran kande.
19La mipemalaran lako PUANG tu pemala’ pantunu, iamotu pemala’ ditunu pu’pu’, da’dua anak sapi laki, misa’ domba laki sia pitu domba sisangtaunmo, tu tae’ tattanna.
20Iatu kande dipemalaran la miparandan, iamotu ta’pung manisak dipasigerok minna’, tallung taan sangpulona, ke misa’oi sapi laki sia duang taan sangpulona tu domba laki;
21sangtaan sangpulona la miparandan, ke misa’oi tu pitu domba.
22Na misa’ bembe’ la diposuru’ pengkalossoran, la umpadenangkomi kadiseroian kasalan.
23Senga’ iatu pemala’ ditunu pu’pu’ ke melambi’, tu dipasangbilangan pemala’ ditunu pu’pu’ kiallo-kiallo, la miparandan tu iannato.
24Susimoto la miparandan kiallo-kiallo lan pitung allo tu kande pemala’ pantunu, iamotu dipobau busarungngu’ lako PUANG. Senga’ iatu pemala’ ditunu pu’pu’ kiallo-kiallo la diparandan la dipasisola pemala’ pantedok.
25Sia iake allo ma’pempitu la mipakaraya tu kasirampunan masero; da’ mitoe pengkarangan dakaran kande.
26Iake allo pangrakanan, ke umpennoloangkomi kande dipemalaran ba’ru lako PUANG, ke pa’gauran minggummi la mipogau’ tu kasirampunan masero sia da’ mitoe pengkarangan dakaran kande.
27Sia la mipemalaran tu pemala’ ditunu pu’pu’ la dipobau busarungngu’ lako PUANG, iamotu da’dua anak sapi laki sia misa’ domba laki sia pitu domba sisangtaunmo;
28dipasisola kande dipemalaran, iamotu ta’pung manisak dipasigerok minna’, tallung taan sangpulona, ke misa’oi sapi laki sia duang taan sangpulona tu misa’ domba laki,
29sia sangtaan sangpulona, ke misa’oi tu pitu domba,
30sia misa’ bembe’ la umpadenangkomi kadiseroian kasalan.
31Senga’ ia tu pemala’ ditunu pu’pu’ kiallo-kiallo la miparandan tu iannato di pasisola tu kande dipemalaran; la tae’ tattanna tu patuoan iato, dipasisola pemala’ pantedok.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel