Batu kapengkilalan sia inan pemalaran dao Ebal
1Attu iato napepasanan Musa sia pekaamberanna to Israel lako to buda nakua: Karitutui tu mintu’ pepasan, tu kupapassanangkomi allo iate.
2Iake mangkamokomi ullamban Yordan lako tondok tu la Nabenko PUANG, Kapenombammu la mupabendan ba’tu pira-pira batu kapua, sia musapu’ kapu’.
3Sia iake ullambanmoko salu, la musura’ dao tu mintu’ kada Sukaran aluk iate, – kumua ammu rampo tama tondok, tu la Nabenko PUANG, Kapenombammu, iamotu tondok sebo pangandu’ sia tani’ enoan, susitu mangka Naallurangko PUANG, Kapenombanna nene’ to dolomu.
4Iake mangkamokomi ullamban Yordan, la mipabendan te mai batu, susitu kupepasanan lako kalemi totemo, dao buntu Ebal sia la musapu’ kapu’.
5Sia la mupabendan duka dio tu misa’ inan pemalaran, la dinii memala’ lako PUANG, Kapenombammu, iamotu misa’ inan pemalaran dio mai batu tu tang dibassii,
6iamotu batu tang dipa’ la mubangunanni tu inan pemalaranNa PUANG, Kapenombammu, sia dao la munii umpennoloan pemala’ ditunu pu’pu’ lako PUANG, Kapenombammu.
7Sia la mutunu duka tu pemala’ kasalamaran, ammu kandei dio sia parannurannuko dio oloNa PUANG, Kapenombammu.
8Mangkato la musura’ dao batu iato tu mintu’ kada Sukaran aluk iate, mupemaseroi sia mupamaleso tongan.
9Ma’kada dukami tu Musa sia to minaa to Lewi lako mintu’ to Israel, nakua: Ma’pakappako e to Israel, sia perangii. Allo iate dadimoko taunNa PUANG, Kapenombammu.
10Iamoto la muperangii tu gamaranNa PUANG, Kapenombammu, sia Karitutui tu pepasanNa sia aluk Napondok tu kupapassanangko allo iate.
Pa’passakke dao buntu Gerizim, pa’tampak ropu dao buntu Ebal
11Allo ia dukato Napasanmi Musa tu to buda, nakua:
12Iake milambanni tu Yordan, dao buntu Gerizim la nanii tunannang tu Simeon, Lewi, Yehuda, Isakhar, Yusuf na Benyamin la umpassakke to buda.
13Sia dao buntu Ebal la nanii tunannang tu Ruben, Gad, Asyer, Zebulon, Dan na Naftali la ma’tampak ropu.
14Attu iato ia tu to Lewi la umpekapuai gamaranna umpamanassai lako mintu’ muane lan Israel, nakua:
15Tampak ropu lako muane, tu manggaraga rapang-rapang dipodeata dipa’ ba’tu dipati’no’, iamotu misa’ apa Nakagalli PUANG, panggaraga lima to pande, sia membuni bang umpabendanni. Anna mintu’ bangsa mebali nakua: Amin.
16Tampak ropu lako to umpamatuna ambe’na ba’tu indo’na. Anna mintu’ bangsa mebali nakua: Amin.
17Tampak ropu lako to umpalele katonan padangna solana. Anna mintu’ bangsa mebali nakua: Amin.
18Tampak ropu lako to umpapusa to buta dio lu lalanna. Anna mintu’ bangsa mebali nakua: Amin.
19Tampak ropu lako to umpasepang patu borongna to sae, pia biung sia baine balu. Anna mintu’ bangsa mebali nakua: Amin.
20Tampak ropu lako to sangampa’ bainena ambe’na, belanna ungkillang sambu’na ambe’na. Anna mintu’ bangsa mebali nakua: Amin.
21Tampak ropu lako to ungkaromok olo’-olo’. Anna mintu’ bangsa mebali nakua: Amin.
22Tampak ropu lako to sangampa’ anak daranna, tu sangambe’ ba’tu sangindo’. Anna mintu’ bangsa mebali nakua: Amin.
23Tampak ropu lako to sangampa’ matusanna baine. Anna mintu’ bangsa mebali nakua: Amin.
24Tampak ropu lako to umpongko buni solana. Anna mintu’ bangsa mebali nakua: Amin.
25Tampak ropu lako to ungkande pappe’, la umpongko tau, iamotu to tang kasalan. Anna mintu’ bangsa mebali nakua: Amin.
26Tampak ropu lako to tang umbilang kada Sukaran aluk iate, belanna tae’ naturu’i. Anna mintu’ bangsa mebali nakua: Amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel