Pa’passakke sia pa’tampak ropu
1Iake muperangii tonganni tu gamaranNa PUANG, Kapenombammu, sia mukaritutui tu mintu’ pepasanNa, tu kupapassanangko allo iate, la Napamadaoangko PUANG, Kapenombammu, na mintu’ bangsa lan lino.
2Inde sia tu mintu’ kamasakkean la urrampoiko sia la mupotaa, ke muperangii tu gamaranNa PUANG, Kapenombammu,
3iamotu la masakkeko lan kota sia la masakkeko dao lu padang.
4La masakke tu rianna pa’tambukammu, bura padangmu sia memba’ka’ tu patuoammu, iamotu anak sapimmu sia anak dombamu sia bembe’mu.
5La masakke tu mai bakamu sia palungan rotimmu.
6La masakkeko lan torro ke’de’mu.
7Iatu PUANG la ussorong ualimmu, tu unneako, dio tingayomu, ammu taloi. Sangbambari tu lalan la nanii sae unneako, apa pitu tu lalan nanii mallai tu tau iato dio mai tingayomu.
8Iatu PUANG la umpasonglo’ kamasakkean lako kalemu lan alangmu sia lan mintu’ apa mutoe; la Napamasakkeko lan tondok, tu la Nabenko PUANG, Kapenombammu.
9Iatu PUANG la umpatontongko, ammu dadi to maseroNa Puang, susitu Napalaoan sumpa unnallurangko, ke mukaritutui tu pepasanNa PUANG, Kapenombammu, sia muturu’ tu lalanNa.
10Iake susito iatu mintu’ bangsa dao kuli’na padang la untiroi, kumua disa’burammoko tu sanganNa PUANG, anna mataku’ tu tau iato lako kalemu.
11PUANG dukamo la ungkamaseiko kameloan sebo, lan rianna pa’tambukammu sia kamemba’karan patuoammu sia bura padangmu – lan tondok, tu Napalaoan sumpa PUANG unnalluranni nene’ to dolomu, kumua la Nabenko.
12Iatu PUANG la umbungkarangko pangannan tang kapu’duranNa, iamotu langi’ la umpasaean uran padangmu, ke attunnai sia la umpamasakke mintu’ pentoeammu, muurungan umpaindanni ba’tu pira-pira bangsa, apa iko kalena tae’ mumangindan.
13PUANG la umpadadiko ulu, tangia ikko’, sia salangngan-langngannako, tae’ musarokko-rokkona, podo ke muperangii tu pepasanNa PUANG, Kapenombammu, tu kupapassanangko allo iate, ammu karitutui tonganni,
14sia iake tae’ musepang dio mai mintu’ pepasan, tu kubenko allo iate, lako kanan ba’tu lako kairi, ke unturu’ko kapenomban senga’ sia mupenombai,
15apa iake tae’i muperangii tu gamaranNa PUANG, Kapenombammu, sia tae’ mukaritutui tonganni tu mintu’ pepasanNa sia iatu aluk Napondok, tu kupapassanangko allo iate, manassa la narampoiko sia naruako te mintu’ pa’tampak ropu,
16iamotu la tampakan ropuko lan kota sia la tampakan ropuko dio lu padang.
17La tampakan ropu tu mai bakamu sia palungan rotimmu.
18La tampakan ropu tu rianna pa’tambukammu, bura padangmu, anak sapimmu sia iatu mai anak dombamu sia bembe’mu.
19La tampakan ropuko lan torro ke’de’mu.
20Iatu PUANG la umparampoangko tampak ropu, kamarukkan sia pa’pagarrak lan mintu’ apa mutoe sia apa mukarang, muurungan disabu’i sia disanggangi madomi’ natumang tu kakadakeanna penggaurammu, belanna mangkaMo’ mutampe.
21PUANG la umpata’paiko ropu, naurungan umpisanniko lan mai tondok, tu la muala mupoapa.
22PUANG la umpata’paiko saki rangke, lalla’, lassu, kele sia baloke’, kamalangkoan, kamalayuan sia pasian; iamoto tu la urrampoiko, ammu mangsan.
23Iatu langi’ mududung la susi tambaga sia iatu padang mulese la susi bassi.
24Iatu PUANG la umpasae bungin sia barra’-barra’ dio lu tondokmu; la songlo’ dao mai langi’ urrampoiko, ammu sanggang.
25PUANG la ussorongko lako ualimmu, ammu talo. Sangbambari tu lalan la munii sae unneai, apa pitu tu lalan la munii mallai dio mai tingayona, muurungan dadi misa’ katirambanan lako mintu’ kadatuan lan lino.
26Iatu batang rabukmu la napokande mintu’ manuk-manuk dao langi’ sia mintu’ olo’-olo’ dao kuli’na padang, namoi misa’ tau tae’ unnula’i.
27PUANG la umparampoiko pasi Mesir, bundang, kele sia re’pe’, tu tang dampi-dampian.
28PUANG la umpabomboangko, sia umpabagako sia umpamaro-maroko,
29muurungan kasalappa-lappa, ke tangngai allo susito buta lan kamalillinan; tae’ mula maupa’ dio lu lalanmu, apa tontong bangko dipakario-rio sia dipangrampai, namoi misa’ tau tae’ urrampanangko.
30La sikampako misa’ baine, apa to senga’ la ussangamparanni. La umbangunko misa’ banua, apa tae’ mutorroi. La untananniko pa’lak anggoro’, apa tae’ mula ungkandei tu buanna.
31Iatu sapimmu la direre’ dio tingayomu, apa tae’ mula ungkandei. Iatu keledaimmu la dirampa dio mai tingayomu, sia tae’mo nasule lako kalemu. Iatu dombamu sia bembe’mu la disorong lako ualimmu, namoi misa’ tau tae’ sae untunduiko.
32Iatu anakmu muane sia anakmu baine la disorong lako bangsa senga’, anna iko kalena untiroi sia mukamali’ tu’tu’ allo, apa tang mukulle umpogau’ misa’ apa.
33Iatu bura padangmu sia bura rangka’mu la nakande misa’ bangsa tang mutandai; tontong bangko dipakario-rio sia dilullu’.
34La bomboangko, napobua’ mintu’ apa natiro matammu.
35La Napata’paiko PUANG kele malua’ dio guntu’mu sia dio pupummu, tu tang dampi-dampian – randuk dio mai pala’ lentekmu sae langngan botto ulummu.
36Iatu PUANG la ussolangko sola datummu, tu muangka’ la undatuiko, lako misa’ bangsa, tu tang mutandai, la iko la nene’ to dolomu; inde to dio la munii umpenombai kapenomban senga’, iamotu kayu sia batu.
37La dadiko misa’ apa napomagiang tau, sia napoparumbasan sia napotellean mintu’ bangsa, tu tondokna, Nanii PUANG ussolangko lako.
38La mubaa tu banne buda lako pa’lak, apa sidi’ri tu mupupu, belanna pura nakande batik.
39La mutananni tu pa’lak anggoro’mu sia la mubaai, apa tae’ muiru’i ba’tu munanna tu uai anggoro’na, belanna nakande ulli’.
40La muampui tu kayu saitun lan mintu’ lili’mu, apa tae’ muminnakanni kalemu, belanna iatu buanna la rondon.
41La den anakmu muane sia baine, apa tang la mupoanak, belanna la male dirampa.
42Iatu mintu’ to’ kayummu sia bura padangmu la napoapa batik.
43Iatu to sae dio musisolan samasai-sainna iamo la untongloiko, ammu sarokko-rokkona iko.
44Iamo la umpaindanniko, apa tae’ mupaindanni. Iamo la ulu anna iko ikko’.
45Iate mintu’ pa’tampak ropu la urrampoiko sia la urrundu’ko sia unta’paiko, ammu mangsan, belanna tae’ muperangii tu gamaranNa PUANG, Kapenombammu, sia tae’ mukaritutui tu mintu’ pepasan sia aluk Napondok, tu mangka Napapassanangko.
46Iatu mintu’nato la dadi tanda kalle-kallean sia tanda mangnga dio lu kamu sia dio lu bati’mu sae lakona.
47Belanna tae’ muparannu sia sende umpengkaolai PUANG, Kapenombammu, napobua’ mintu’ kaseboanna kameloammu,
48iamoto la napotauko mintu’ ualimmu, tu Napake’de’ PUANG ullaoiko, ammu tangdia’ sia ma’rang sia ma’kambelang sia kapu’duran mintu’ apa; Puang la umpapassanni ayoka bassi dao sokkongmu, anNa pisanniko.
49PUANG la umpasae misa’ bangsa ullaoiko, tu sae dio mai tondok mambela, dio mai randan langi’, susito langkan maega mettia’, iamotu misa’ bangsa tae’ mitandai basana,
50misa’ bangsa matampo, tu tang ungkasayangi to ubanan sia tang ungkamasei pia;
51tu la ungkandei tu anak patuoammu sia bura padangmu, sae lako purammu mangsan; tang natampeammoko gandung, uai anggoro’ sia minna’, sia anak sapimmu sia anak dombamu sia bembe’mu, sae lako purammu namangsanni bangsa iato.
52La naparampoiko kapussakan lan mintu’ kotamu, sae lako rondon tu tembo’ tambakuku malangka’, tu muposande’ lan mintu’ tondokmu. Manassa la naparampoiko kapussakan lan mintu’ kotamu, lan mintu’ tondok tu la Nabenko PUANG, Kapenombammu.
53Lan kamandasammu sia kapussakammu, nanii ualimmu la umpabuyu’ko, iamoto ammu kandei tu rianna pa’tambukammu, iamotu mai duku’na anakmu muane sia anakmu baine, tu la Nabenko PUANG, Kapenombam-mu.
54Iatu mai muane masannang tongan sia tarru’ kaboro’ dio lu kamu la nalessekki mata tu siulu’na ba’tu bainena ba’tu iatu mai anak torronapa,
55anna tae’ namorai umpa’benganni lako moi misa’ tau tu duku’ anakna, tu la nakande, belanna iatu ualimmu moi misa’ apa tae’mo natampeanni lan kamandasan sia kapussakan, tu nanii la umpabuyu’ko lan mintu’ kotamu.
56Iatu mai baine masannang sia kaboro’ dio lu kamu, tu ungkasayangi tu pala’ lentekna anna tang silese padang, belanna kamasannanganna sia kakaborosanna, la nalessekki mata tu muanena sia anakna muane sia anakna baine, anna tae’ namorai umpa’benganni moi misa’ apa,
57moi iatu toninna ba’tu anak sun dikalena tae’ duka, belanna kapu’duranmo mintu’ apa, iamoto nakande bunii tu iannato, napobua’ kamandasan sia kapussakan, nanii ualimmu la umpabuyu’ko lan kotamu.
58Iake tae’i mukaritutui tonganni tu mintu’ kada Sukaran aluk, tu disura’ lan te sura’, sia iake tae’i mukataku’i te Sanga mala’bi’ sia metakuran, iamotu PUANG, Kapenombammu,
59manassa la Napandasa masang tonganko PUANG, sia tang ka’tu umparampoiko kadipakario-rioan megiangan sia saki kapua.
60La Naparampoi pole’ko mintu’ saki Mesir, tu mukataku’, naurungan le’ke’ lako kalemu.
61Sia ia duka tu mai saki sia kamandasan, tu tang tisura’ lan sura’ Sukaran aluk iate, la Naparampoiko PUANG, sae lako purammu mangsan.
62La sidi’morokomi torro, moi ammi mangkamo buda susi bintoen dao langi’ – belanna tae’mo muperangii tu gamaranNa PUANG, Kapenombammu.
63Susi kanaalanna penaanNa PUANG umpogau’ melona lako kalemi sia la umpamakambankomi, susi dukamoto la naala penaanNa PUANG la ussanggangkomi sia ummangsannikomi; sia la unnali’komi lan mai tondok, tu muala mupoapa.
64PUANG la umpatisambo’-sambo’ko dio lu mintu’ to sangpetayanan, randuk dio mai randan langi’ sae lako randan langi’; inde to dio la munii umpenombai, kapenomban senga’, tu tae’ mutandai la iko la iatu mai nene’ to dolomu, iamotu kayu sia batu.
65Tae’ mula unnappa’ karapasan sia inan kapelayoanna pala’ lentekmu, belanna iatu PUANG la umbenko penaa ma’parondo dio, sia matammu ponno kamailuan sia bonnong tu penaammu.
66Iatu katuoammu naluang bang kasanggangan; iake bongi sia iake allo la tirambanko sia iatu katuoammu tang manassa.
67Ianna masiang la ma’kadako mukua: A’a, kenna bongiomora; sia iake bongi la ma’kadako mukua: a’a kenna masiangomora – napobua’ kamatakuran, tu umponnoi penaammu, sia napobua’ apa nata’pai matammu.
68La Napopa’kappala’ko PUANG sule lako Mesir dio lu lalan, tu mangka Kupokada lako kalemu, kumua: Tae’mo mula untiro lenni; la dibaakomi dibalukan lako ualimmi la dipokaunan muane, sia dipokaunan baine, apa tae’ tau unnallikomi.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel