Alkitab Mobile SABDA
[VER] : [ABUN]     [PL]  [PB] 
 <<  1 Tesalonika 2 >> 

1Men bi nji, men bi nyanggon, nin jam do, men ba kem su nin mone sa, suk gato men ma wa ben mone kas sisu ndo re.

2Men yo ba ku nin mo Tesalonika nde tó, yé ben sukye nai men, yé kabor men ket kwayo-kwayo mo kota Filipi wé re, nin dakai jam re. Sarewo kapre yé mwa duwer men kete sane, men bi Ai, Yefun Allah syo suktinggi nai men anato men nggiwa men ki sukdu subot os ndo gato Yesus Kristus kak wa men yetu, gato Yefun Allah fro ne, men ki nai nin jam re.

3Men kiwa nin simo sukdu subot os ndo ne sa, men meret os wa nin mone nde, men yo syeret os wa men dakai gum kok nde, men yo syeret os wa men ku sugum nde, men kidar nin dom nde.

4Men ki men bi sukdu-i sane nde, wo Yefun Allah bes men ete syogat men mu ki An bi sukdu-i subot os ndo gato Yesus Kristus kak wa men yetu ne. Men yo werwa men ben suk tepsu yetu mit nde, wo men werwa men ben suk tepsu Yefun Allah mit sor, we An anato jam men bi sukjimnut kom mo mit re.

5Nin dakai jam do, tomgato men kem su nin, men yo ki suk su men syokwet wik nde. Sane dom, men ki Yefun Allah bi sukdu-i nai nin sa, men yo meret os wa men ku suk mwa kadit nin dom nde. Yefun Allah dakai jam men mit re.

6Men yo meret os wa nin un men gum nde. Men yo meret os wa ye yi un men gum dom nde. Yesus Kristus bes men gum yerasul wa ben An bi suk-i, sane anato men do mitwa nin syo suk nai men yo, bere men syogat nin syo suk nai men sor.

7Sarewo men si nin kem mone sa, men yo syogat nin syo suk yo nai men mo nde, wo men ben men bi suk-i sisu njep sor, tepsu nggon mewa mom bi pa wokgan.

8Men bi sukjimnut sye kas subot nin sye teker anato men iwa men frot sukdu subot os ndo gato Yesus Kristus kak ne nai nin sor nde, wo men bi men nggwa mo nin wa men ós nin mo suk mwa neya, we men jimnotku nin ndo nde.

9Men bi nji, men bi nyanggon, men ki Yefun Allah bi sukdu subot os ndo gato Yesus Kristus kak ne nai nin sa, men yo ndek suk kadit nin nde, wo men samok, men wergat men nggwa wa men ben suk mwa noru nombrak subere men ku suk gato men yewa ne, subere men syogat nin syo suk nai men nde, nin dakai napawa suk mwa gato men ben ne re.

10Men si nin yé gato onyar kem mo Yefun Yesus kem mone sino sa, men bi men nggwa mo Yefun wa ben Yefun bi suk-i. Men ben men bi suk-i ne ndo tepsu Yefun Allah mit sor, kwa yo gato ibit mo nde. Suk gato men ben ne, nin dakai me su nin gro re, Yefun Allah dakai jam dom re.

11Nin jam do, suk gato men ben su nin kadik-kadik mone, men ben suk ne tepsu yenggras ben suk su an dakai bi pa-i.

12Men duno nin, men ós nin ben suk tepsu suk gato men duno nin su ne. Men wergat nin subere nin ben suk tepsu Yefun Allah mit sor, we Yefun Allah nai nin sok mo An bi rus-i, subere nin si An kem mo pe gato ndo wai o re.

13Men ki ndo mo Yefun Allah mo suk dik yo o gato nin ben ne, sare do, tomgato men ki Yefun Allah bi sukdu nai nin jam, nin nai sukdu ne tepsu yetu bi sukdu-i nde, wo nin nai sukdu ne tepsu Yefun Allah bi sukdu-i. Sangge, sukdu ne ma kadit Yefun Allah. Yefun Allah bi sukdu-i ne kak nin yé gato onyar kem mo Yesus Kristus ne bi sukjimnut-i subere nin nggiwa nin ben An bi suk-i ne sor.

14Sane men bi nji, men bi nyanggon, nin dakai bi yewis-i deyo ben sukye nai nin mo gato nin onyar kem mo Yesus Kristus tepsu Yefun bi rus-i mo bur Yudea ku sukye dom. Nin ku sukye tepsu ye Yahudi deyo ben sukye nai án dakai bi yewis-i gato onyar kem mo Yesus Kristus mo bur Yudea ne.

15Ye Yahudi deyo anato gu men bi Yekwesu Yefun Yesus ne si yenabi bok yo kwop re. Ye Yahudi ne ben sukye nai men, án syun men kadit pe ne. Án ben sukibit su yetu mwa ne sino. Yefun Allah yo iwa án nde.

16Ye Yahudi bok gane ben sukye wa men, subere men yo ku os wa men ki Yefun Allah bi sukdu nai yewis yi nde. Sukdu subot os ndo gato Yesus Kristus gato kak wa men subere men kem ndo to kapyo mato kapyo ne, ye Yahudi ne bariwa men ki nai yewis yi neya jam. Án ben sukibit mwa gat sane sor, tep more it. Su ré, bi kam-i ne tep it, Yefun Allah bi sukmaskwa kom mo án re.

17Men bi nji, men bi nyanggon, yé syun men titi kadit nin kom mo kam bok yo rek, men kaim sa, mu re, wo men gen kem su nin re. Yé syun men kadit nin, sarewo men jimnotbot nin ndo nde anato men werwa men ba ku nin mone o et.

18Men iwa men ba ku nin. Ji dakai wergat ji nggwa wam bok yo ware, biris bi yekwesu ben sukye wa os wa men re.

19Men iwa men ba ku nin, we nin anato ben men mit at. Nin benbot suk gato men duno nin su ne, sane bere su kam gato men bi Yekwesu Yesus Kristus satu ma mo bur ré, men kwabom kam mo Yefun do, men ku Yefun Yesus mone yo, bere Yefun mit iwa men, we suk gato men ben su nin ne kas sisu ndo. Sane mo Yefun Yesus gwem, bere men mit at mo nin.

20Sangge, mo suk gato bor mo nin, men mit at mo, men mit iwa sor.


  Share Facebook  |  Share Twitter

 <<  1 Tesalonika 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran