Alkitab Mobile SABDA
[VER] : [ABUN]     [PL]  [PB] 
 <<  1 Timotius 1 >> 

1Ji gato gum do Paulus anato krom surat ré wa nan. Ji krom sukdu ré wa nan, Timotius. Nan anato tepsu ji bi pa mo Yefun bi de-i, we ji duno nan anato nan onyar kem mo Yesus Kristus. Yefun Allah gato fro os ndo wa men kem ndo to kapyo mato kapyo, An bes ji gum yerasul wa ben Yesus Kristus bi suk-i. Yesus Kristus gato men kwabom kam mó, An bes ji ete syogat ji mu wa ji ben An bi suk-i tepsu yerasul. Men bi Ai, Yefun Allah si men bi Yekwesu Yesus Kristus ete mewa nan. Yefun Allah si Yesus Kristus ete jimnotku nan. Yefun Allah si Yesus Kristus ete uttok nan petok sor.

2(1:1)

3Su kam gato ji mu kadit nan mu mo bur Makedonia, ji wergat nan subere nan kem pe mo kota Efesus. Ji wergat nan kem pe mone subere nan duyawa yé bok yo gato duno nje su sukduno gato siri.

4Nan syaugat yé bok ne misyar sukdu suski si sukdu subot yetu kadik-kadik bi binke dom, we kom mo rut yé duwer yu mo sukdu mwa gane sor re. Ye kibot sukdu sane, bere yo ós yé jammo suk gato Yefun Allah fro wa án ben ne nde. Wo men onyar kem mo Yefun Yesus sa, bere men jam suk gato Yefun Allah iwa men ben ne.

5Sane ji ki do, nan syaugat yé bok ne kem not, subere men sino bi sukjimnut sye kas subot yu, men yo maskwa yu o nde. Men onyar kwo e, men nai sukjimnut gato ndo mo men mit e, men onyar kem mo Yefun Yesus sisu sangge e ne yo, bere men bi sukjimnut sye kas subot yu.

6Yé bok ne, án misyar sukdu gato ndo ne. Án brek kadit sukdu ne, ete án ki subot sukdu gato yo ós men yetu nde.

7Án da iwa án duno nje su Yefun Allah bi sukduno, sarewo án jam nde sukduno gato án ki ne ware. Án duno nje, án ki bi sukdu-i ne tepsu án jam, sarewo án jam nde i-ke ne ware.

8Men jam do, Yefun Allah bi sukduno ne ndo sino, wo yé duno nje su sukduno ne tepsu sukduno ne bi sukjimnut-i sa, ndo it anane.

9Men jam do, Yefun Allah bi sukduno, ye krom wa ye gato ben sukndo tepsu Yefun Allah mit nde, wo ye krom wa ye gato ben bi suk-i ibit sato ré, ye gato ben sukibit wai mo sukduno ne e; ye gato ben siri kadit sukduno ne e; ye gato jam nde Yefun Allah e; ye gato ben bi suk-i ibit bu e; ye gato misyar Yefun e; ye gato bi sukjimnut sye mo bur ré bi suk-i e; ye gato gu an bi im si bi ai kwop e; ye gato gu nje daret kwop e;

10yekra gato ben siri su nggon daret si nggonkra gato ben siri su ye daret e; yebris si yebris gato ben siri su yu e; nggon si nggon gato ben siri su yu e; ye gato but pakwerut ete so mo ye yi e; ye gato kidar suk e; ye gato ki do, án sa, bi sukdu-i sangge, ondewo án syeret os wa nje e; ye gato ben suk siri kadit Yefun Allah bi sukduno gato sangge e ne. Ye krom Yefun Allah bi sukduno ne wa yé mwa gato ben sukibit sane, subere án jammo sukduno ne et.

11Sukduno gato sangge ne anato sukdu gato ndo wai subot os ndo gato Yesus Kristus kak wa men yetu ne. Yefun Allah gato gum kok wai anato fro sukdu ne, ete An tarubot ji, subere ji ki frekbot nje mo peyo-peyo.

12Ji ki ndo mo men bi Yekwesu Yesus Kristus. An syo suktinggi nai ji wa ji ben An bi suk-i re. An nut mo ji do, ji sa, bere ben An bi suk-i ri tepsu An mit anato An bes ji wa ji ben An bi suk-i re,

13wo suga nyim tuya ji kiket Yesus Kristus gum ibit, ji ben sukye, ji ben sukot nai An bi nje-i, ji kabor An ket kwayo-kwayo. Ji da ben sukibit mwa ne, sarewo An ben sukndo su ji, An dakai jimnotku ji sor, we tomgato ji ben ji bi suk-i ibit ne, ji jam nde suk, ji yo onyar kem mo An nde tó, anato ji ben sukdaret sane.

14Sarewo Yesus Kristus, men bi Yekwesu ne, kapre ji ben sukibit su An, An ben An bi suk-i ne ndo wai su ji sor anato ji brek kadit os ibit ne, ete ji onyar kem mo An it. Yesus Kristus anato ben ji nggiwa ji onyar kem mo An. Yesus Kristus ben ji nggiwa ji bi sukjimnut sye kas subot ye yi neya dom re. Men sino gato tepsu dik su Yesus Kristus yo, bere men ku suktinggi sane.

15Sukdu gato ji ki ré suksangge, men nai ma, men grem kem pe mo men mit sor, sare do, "Yesus Kristus ma mo bur ré wa ós men yetu gato ben sukibit, subere men ges mo bot gesyos nde, wo men kem ndo to kapyo mato kapyo." Mo yé mwa gato ben sukibit mo bur ré, ji anato ben sukibit mwa wai kadit yé mwa ne sino o re.

16Kapre ji ben sukibit mwa Yefun Allah ben An bi suk-i ne ndo su ji, subere Yesus Kristus kadum ji tepsu os wa yé mwa ne me. Ji anato ben sukibit mwa wai kadit ye yi neya. Ji ben sukibit, ji ben sukibit sane sor, wo Yesus Kristus yo nutbot sukibit gato ji ben ne nde. Kristus yo misyar ji nde, wo Yefun ben sukndo su ji sane sor, ji kwet, or ji onyar kem mo Yefun Yesus re. Sane ye yi neya me suk gato Kristus ben su ji yo, yé mwa ne jam do, kapre án ben sukibit, Yefun Yesus bere ben sukndo su án dom, sane sor, án kwet, án onyar kem mo Yefun Yesus, orete án kem ndo to kapyo mato kapyo.

17Sane men un Yefun Allah gato men bi Yekwesu kadit kapyo sor kom mo kapyo. Men bes Yefun Allah gato gesyos ne gum petok sor. Yefun Allah gato men me su men gro nde, men un An sor. Men un Yefun Allah dik ne sor, men bes An gum kok su ré to kapyo mato kapyo. Sangge.

18Timotius, ji bi pa mo Yefun bi de-i, ji ki sare do, nan benbot suk gato ji krom ré et, sare, nan jambot sukdu gato Yefun Allah tarubot yenabi mo nu ari wa nan sor. Nan jom suktaru ne subere nan nggiwa nan duwer yé gato ki bi sukduno gato siri.

19Nan jom sukdu subot Yefun Yesus gato sangge, ete nan duwer yé gane sor. Sane dom nan kidar nan dakai nde, wo nan jammo sukjimnut gato ndo mo nan mit petok sor. Yé bok yo jammo án bi sukjimnut gato ndo mo án mit o nde anato án ges mo os siri, án yo onyar kem mo Yefun Yesus o nde,

20sato Himeneus si Aleksander ne. Ji syo sukye nai an we, ji bi an we mo biris bi yekwesu syim-i, subere biris bi yekwesu ben sukye nai an we, subere an we yo ku os wa kiket Yefun Allah gum ibit o nde.


  Share Facebook  |  Share Twitter

 <<  1 Timotius 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran