Dual Panel1Ji do ba ku nin o it yo, wam dogri it anare. Ji ki sukdu nai nin wam dik e, wam we e ne yo tep nde, wo wam gri sa, bere nin jam do, sukdu gato ji ki ne sangge it, tepsu ye krom mo Yefun Allah bi sukdu sare do, "Yetu ge we yo, ge gri yo, do me suk gato ye yi ben ne su án gro, orete yé bok ne do ma ki sukdu tepsu yu subot suk gato ye ne ben it yo, sukdu ne sangge it anane, suk gato ye ndak ye ne gum mone, ye ki sangge it anane."
2Ji ba ku nin wam kedowe sa, ji ki kom mo sukibit gato nin ben ne it. Ji ki suknapa wa nin mó re. Or o, ji kem os syu kadit nin sa, ji bi surat ma tepsu suknapa wa nin wam dik yo o. Sane, ji do ba wam dik yo o it yo, yé gato yo jambot suknapa gato ji ki ne nde, bere ji syo sukye nai án sino. Yé gato ben sukibit suga nyim si yé gato ben sukibit wari ré dom, yé bok ne sino, ge dik yo titi fro kadit ji mo nde.
3Sane ji do ba mone yo, ji syo sukye nai án, subere nin jam rer do, sangge, Kristus bes ji gum yerasul wa ji ki An bi suktaru nai nin jam. Ji syo sukye nai nin yé bok ne, ji ben suk tepsu Kristus mone. Kristus yo ben An bi suk-i rere nde, wo An ben An bi suk-i nggi, An bi suktinggi bere bor su kam gato bere ji syo sukye nai nin ne.
4Ye mban Kristus mo kwesukwin sa, An kaim yo nggi nde, sarewo su ré, Yefun Allah bi suktinggi bor mo Kristus anato Kristus mbau satu anare. Sane dom, men yé gato si Kristus tepsu dik, men kem mo bur ré, men kaim yo nggi nde dom, wo Yefun Allah bi suktinggi bor mo men anato ben men nggiwa men ben Kristus bi suk-i su nin mo bur ré tó.
5Nin dakai ndobot nin dakai mó et, sare do, nin ben nin bi suk-i tepsu ye gato onyar kem mo Kristus bado, nde, e? Nin onyar kem mo Kristus sisu sangge yo, Kristus dakai kem mo nin mit si nin onyar ne it. Sarewo nin yo onyar kem mo Kristus sisu sangge nde tó yo, bere Kristus yo kem mo nin mit si nin onyar nde tó.
6Ji kwabom kam mo nin do, nin dakai me mo suk gato men ben ne anato nin jam do, sangge, Kristus kem mo men mit si men onyar it.
7Sane men ki suk su Yefun Allah subere An ós nin subere nin ben suk gato ibit ne o nde. Men benadi subere yetu un men gum mo suk gato men ben ne nde, wo men benadi subere nin ben nin bi suk-i ndo petok sor. Kapre men duno nin sisu ndo e, men yo duno nin sisu ndo nde e, suk yo nde, wo men iwa nin ben nin bi suk-i ndo sor.
8Men duno nin yo, men ben suk yo gato wai mo sukdu gato sangge ne nde, wo men werwa men ben men bi suk-i tepsu sukdu gato sangge sor.
9Men yo nggi nde, wo nin do nggi yo, men mit iwa mone. Men ki suk su Yefun Allah wa nin subere nin ben suk gato ibit saga nyim ne o nde, wo men ki suk su Yefun subere nin ben nin bi suk-i mwa ne ndo sino sor, kwa yo gwet mo nde.
10Ji kem os syu kadit nin tó yo, ji krom surat ré ba nyim subere ji do ba ku nin mone it yo, ji yo mitwa ji ki sukdu ot nai nin su suktinggi gato Yefun Allah syo nai ji nde, we suktinggi ne, Yefun Allah syo nai ji subere ji ós nin onyar kem mo Kristus nggi wai kadit nyim ne o re. Yefun yo syo suktinggi ne nai ji wa ji ben nin ibit su nde.
11Ji bi nji ji bi nyanggon ji bi sukdu tut more, ndo mo nin sor. Ji bi sukdu kwa gato wari anare: nin werwa nin ben nin bi suk-i mwa ne ndo sino sor. Nin jambot sukduno mwa gato ji krom mo surat ré tepsu suknapa wa nin pe et. Nin sino mone bi sukjimnut dik tepsu yu et. Nin kem ndo su yu sor. Nin ben suk bok gare sane bere Yefun Allah gato bi sukjimnut sye kas subot men ete uttok men sino ne, bere Yefun sisu nin petok sor.
12Men ku yu it yo, men i yu tepsu men yedik mo Yefun Allah bi rus-i. Yé mwa gato sok mo Yefun Allah bi rus-i more sino ki ndo mo nin.
13Men bi Yekwesu Yesus Kristus ete mewa nin. Yefun Allah ete uttok nin. Yefun Allah Gen ete sisu nin sino petok sor. Ndo mo nin sor, kadit Paulus
14(13:13)