Alkitab Mobile SABDA
[VER] : [ABUN]     [PL]  [PB] 
 <<  2 Korintus 3 >> 

1Nin nut do, men bes men nggwa kok anare bado? Sane nde. Nin mitwa yé krom surat subot men tepsu ye deyo krom ne subere nin imo men ba duno nin mone bado? Men mitwa nin krom surat subot men subere ye yi neya mit iwa men mu duno án mo án bi nat-i bado? Sane nde, we

2suk gato nin dakai ben bor ne anato tepsu surat subot men ne it. Surat ne, ben sato nin krom mo men mit it. Yé mwa ne sino ma baca, yé mwa ne jam re, ye yo mitmo surat gato ye krom mo kertas det nde.

3Yé mwa neya me sukndo gato nin ye Korintus ben ne. Sukndo gato nin ben ne anato tepsu surat subot men. Surat ne anato ma kadit Kristus. Kristus yo krom surat ne su tinta nde, wo Yefun Allah Gen gato gesyos anato krom surat ne. An yo krom mo jok gato ye krom suk mone nde, wo An krom mo men yetu mit.

4Sangge, suk gato men duno nin su ne bor mo sukndo mwa gato nin ben ne, men dakai jam re. Men sok mo Yesus Kristus bi rus-i anato men jam do, suk gato men duno nin su ne ós nin re, Yefun Allah dakai jam re.

5Men dakai yo nggiwa ben suk yo bor wa nin me mone nde, wo Yefun Allah anato ben men nggiwa men ben suk mwa ne su nin sino re.

6Yefun Allah anato ben men nggiwa men gwat sukdu subot os be gato Kristus kak wa men ne. Os be bi sukduno-i yo tepsu sukduno gato kam nyim Musa krom ne nde, wo sukduno be ne ma kadit Yefun Allah Gen. Sukduno nyim ne gwat sukkwop wa men, wo sukduno be gato men jam kadit Yefun Allah Gen ne sa, bere kak os wa men mbau to kapyo mato kapyo.

7Musa gwat sukduno gato gwat sukkwop wa men ma ne. An gwat sukduno gato Yefun Allah krom mo jok subot os nyim gato Yefun Allah fro wa ye Israel ne ma. Musa gwat sukdu ne ma sa, Musa gro rer teker, rer yor gat ye Israel, ye Israel yo sokme yenggras ne ndo nde. Suk gato ben Musa gro rer ne napyo da or kadit an, sarewo ye Israel gro yó wa sokwa yenggras ne tó. Sane Yefun Allah Gen bi suktinggi bor su kam gato Musa gwat sukdu subot os nyim ne, sarewo

8os be gato Yefun Allah Gen kadum nai men subot Yesus Kristus ne sa, os be ne ma su bi suktinggi sye wai kadit os nyim ne o re.

9Os nyim gato gwat sukkwop wa men yetu ne da ndo yé, sarewo os be gato Yefun Allah kak wa men gum sok mo An bi rus-i ne ndo wai kadit ne o re.

10Os gato men nut suga nyim neya do, ndo yé, ré ne, yo ndo o nde, we os be gato bor wari ré anato ndo wai kadit os nyim ne o re.

11Os nyim gato kem su men sareya sor, ete or re, ma su suktinggi gato ndo yé. Sane yo, os be gato kem pe su men sa, ma su bi suktinggi mwa, ndo wai kadit ne o re.

12Men bi sukjimnut kem pe mo os be ne it, sane anato men werwa men ki subot os ne sor. Men yo nyuwa men ki subot os ne mo nde, wokgan yo dom nde.

13Men yo ben men bi suk-i tepsu Musa nde, Musa ak san det wa an gro subere ye Israel yo me an gro gato rer ne nde, sane sor suk gato rer ne or kadit an, wo os be ne rer ku nje pe sor, sane men kibot petok sor, men nyuwa nde.

14Sarewo ye Israel bi sukjimnut yo kak nde, sane sor kom mo kam ré. Án baca subot os gato nyim ne sa, ben sato san det ne kewa án bi sukjimnut tó, án jam nde os nyim bi sukdu-i ne ware. San det kem pe mone, wo án sok mo Yesus Kristus bi rus-i it yo, bere Yefun kak san det ne wé re.

15Su kam ré, ye Israel baca Musa bi sukduno-i yo, ben sato san det ne kewa án bi sukjimnut ne tó anato án bi sukjimnut yo kak nde.

16Sarewo ye to bi sukjimnut brek ma kem mo Yefun it yo, san det ne sombok kadit ye ne, bere an bi sukjimnut kak mone o re.

17"Yefun," gato men kibot more anato, "Yefun Allah Gen." Mo pe gato Yefun Allah Gen mó yo, sukibit yo jom men o nde, Yefun sombok men wé kadit re.

18Sane su ré san det yo kewa men ye Kristen o nde. Yefun Allah Gen bi suktinggi gato rer kas ma pet tok men orete yo, suktinggi gato rer ne waii kas kadit men o, suktinggi ne waii mu tok ye yi neya dom. Or o, Yefun Allah Gen ne bi suktinggi gato rer ma mo men ne, anato ben men win men bi sukjimnut wokgan wokgan sane sane sor, kom mo rut yo, men bi sukjimnut-i tepsu Yefun bi sukjimnut-i ne or re. Suktinggi ré ma kadit Yefun Allah Gen gato tepsu men bi Yekwesu.


  Share Facebook  |  Share Twitter

 <<  2 Korintus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran