Dual Panel1Men kaim ré tepsu nu ti gato men kem mó, mo bur ré. Sane men jam do, nu ti ne ye do rus wé it yo, bere Yefun Allah fro nu be wa men mo gu. Yetu yo nggo nu mo gu nde, wo nu gato Yefun Allah dakai fro wa men mone bere kem krat to kapyo mato kapyo.
2Men kem mo nu ti gato mo bur ré sa, men nutbot ndo nde, wo men syau wa men mu kem mo nu gato mo gu ne et.
3Nu mo gu ne tepsu men kaim be gato gesyos.
4Men da kridek ne tepsu nu ti wa men kem mó, mo bur ré. Men kem mone tó, men nutbot ndo nde, we men kem mone yé teker wa men. Men yo iwa men kwop kadit men kaim budat ré nde, wo men bi sukjimnut sye wa men kaim be gato ma kadit gu win men kaim budat ré et, subere men kaim be gato gesyos win men da kridek wé re.
5Yefun Allah dakai anato fro kaim dobe ne wa men. Yefun Allah syo An Gen ma mo men mit subere men jam do, sangge, suk gato An fro ne, bere men ku mone sor.
6Sane men bi sukjimnut kem pe mo suk gato Yefun Yesus fro wa men ne petok sor. Men jam do, men kem mo bur ré tó yo, men kem os syu kadit nu gato Yefun fro mo gu wa men si An kem mone.
7Sane men kem mo bur ré tó, men ben men bi suk-i yo, men nai sukjimnut mo suk gato men me su men gro nde, wo men onyar kem mo Kristus, men nai sukjimnut mone, ete ben men bi suk-i tepsu An mit ne sor.
8Sane men bi sukjimnut kem pe mo suk gato Yefun fro wa men ne. Men iwa men sombok kadit men da kridek ré, ete men si Yefun sino kem mo nat gato An fro wa men ne.
9Sane anato kapre men kem mo bur ré o, men kem mo gu nim ne o, men wergat men nggwa subere men ben suk tepsu Yefun mit sor,
10we su kam gato Kristus ma ne, bere An ndobot men yetu mwa ne sino. Mone yetu gedik-gedik ku suk tepsu suk gato án ben mo bur ré. Men yé gato ben sukndo, bere men ku suk gato ndo mone, wo yé gato ben sukibit, bere yé ne ku sukye mone.
11Men sa, men nyuwa men bi Yekwesu Yefun Yesus. Men jam do, men ben sukibit yo, bere men ku sukye mone. Sane anato men wergat ye yi neya subere yé mwa ne brek ete jammo Yefun et. Yefun Allah dakai jam men kom mo mit, sane men mit iwa nin dom jam men kom mo mit, tepsu Yefun re.
12Men yo krom sukdu ré wa men dakai bes men nggwa kok more nde, wo men krom sukdu ré subere men kak os wa nin dakai bes men gum kok mo sukndo gato men ben ne. Men krom sukdu ré subere nin ku sukdu subot men wa nin gwawa men gum kadit yé bok yo gato ma ku nin. Yé bok gane bes án nggwa kok mo suk gato yetu me mo án de nden ne sor re, wo án mit si án onyar tara re.
13Yé nutbot men do, men bi sukjimnut kas daret yo, suk yo nde, we suk gato men ben ne, men ben wa bes Yefun Allah gum kok sor. Yé nutbot men do, men bi sukjimnut kas ndo yo, ndo dom, we men ben suk wa ós nin.
14Kristus bi An nggwa wa men anato men wergat men nggwa wa ben Kristus bi suk-i ne pe sor. Kristus wadigan kwop win men yetu sino, men jam ware. Sane dom, ben sato men sino kwop su An, men bi men nggwa wa An it.
15Kristus kwop win men sino anato men yé gato kem mo bur ré, men ben men bi suk-i wa men dakai o nde, wo men ben suk wa Yesus Kristus gato kwop ete sun kadit sukkwop wa men o re.
16Sane men nut subot yetu su yetu bi sukjimnut-i ne o nde. Tomgato nyim neya men da nutbot Kristus tepsu yetu nutbot An do, An yetu sor re, wo su ré men nutbot An su yetu dakai bi sukjimnut-i ne o nde.
17Sane men si Yesus Kristus tepsu dik it yo, men anato ye gato be o re. Men yo simo os ibit saga nyim ne o nde, wo men simo os be mo suk mwa ne sino o re.
18Yefun Allah fro os wa men subere men anato ye gato be. An syogat Kristus ma mo bur ré kak os wa men si Yefun kem ndo su yu. Or o, Yefun Allah syogat men mu ki subot os be gato Yesus Kristus kak ne nai ye yi neya jam, subere yé ne si Yefun Allah kem ndo su yu dom.
19Sukdu gato men ki subot anare, Yefun Allah syogat Kristus ma wa kak os wa men yetu si Yefun Allah kem ndo su yu. Yefun Allah fro os ne, An yo nutbot sukibit gato men yetu ben ne o nde. Yefun Allah syogat men mu ki sukdu subot os ne nai yetu mwa ne mo bur ré sino jam sor.
20Sane Yefun Allah bi suktaru subot os be gato Kristus kak ne, men anato mu ki napyo nai nje jam. Yefun anato kendo yetu mwa ne ma wa si An kem ndo mo sukdu gato men ki ne. Sane nin jammo sukdu subot Kristus gato men ki ré et: Nin bariwa nde, wo nin sibot os be subere nin si Yefun Allah kem ndo su yu se!
21Kristus yo ben sukibit mo nde, wo Yefun Allah dakai fro Kristus sam kwede win men yetu mo sukibit mwa gato men ben ne, subere Yefun Allah me mo men do, men sa, bi sukibit ut mo men yo mo nde. Sane Yefun Allah nut mo men sa, men tep wa An nai men sok mo An bi rus-i mo suk gato Kristus ben ne.