Dual Panel1Ji bi nji ji bi nyanggon gato ji jimnotku, ji bi surat kedowe wa nin anare. Ji krom surat we ne sino tepsu suknapa wa wergat nin subere nin bi sukjimnut ne ndo sor.
2Ji iwa nin napawa sukduno gato nyim neya Yefun Allah tarubot An bi yenabi wa nin ne. Sane dom ji iwa nin napawa sukduno gato Kristus men bi Yekwesu gato kak os wa men kem ndo to kapyo mato kapyo ne tarubot yerasul wa nin ne.
3Sukdu kwa dik yo gato nggi wai wa nin napawa anare: Karowa kam gato Yesus Kristus satu ma mo bur ré yo, bere yé mwa gato ben sukibit bu ne, yé mwa ne ma o. Yé mwa ne ben sukibit ket án í ne sor. Yé ne bere kabor nin, ki nin gum ibit, ete sa nin mo gato nin nut do bere Yesus Kristus satu ma mo bur ré.
4Yé ne sa nin ete ki do, "Yefun Yesus tom do, An ma, sarewo An kaim ana u ne? Yesus Kristus yo bor mo nde tó! Kadit kam gato men bi amui kwop ne sor kom mo kam ré, suk mwa ne kas sagato ketke Yefun Allah ut ne."
5Sarewo yé gane dakai bariwa nutbot sukdu gato ki do, Yefun Allah benbot sukdu gato An ki ne. Suga nyim tuya Yefun Allah ut gu nim ne si bur ré, Yefun Allah ki su syokwet sor re ete suk mwa ne dakai bor tepsu sukdu gato An ki ne. Yefun Allah wat bur kadit syur, ete bur ré kem dor kadit syur re.
6Yetu mwa gato kem mo bur suga nyim neya, Yefun Allah ki su syokwet sor re, ete syur syé ma gu yé mwa ne kwop or.
7Sarewo su ré Yefun Allah ki sukdu subere mewa gu nim si bur ré sane sor kom mo kam gato An syo bot git suk mwa gato kem mo bur ré si gu nim ne wé re. Sane su ré, An mewa gu nim si bur ré sane sor kom mo kam gato An syo sukye nai yé gato bariket Yefun, ete bere An ben yé ne ibit mo koirut or re.
8Sarewo ji bi nji ji bi nyanggon, nin napawa sukdu gato ji krom ré et, Yefun Allah bi sukjimnut do, kam dik yo, kam dik ne tepsu tahun ribu dik sor re. Sane dom, Yefun Allah bi sukjimnut do, tahun ribu dik yo, tahun ribu dik ne tepsu kam dik sor re.
9Yetu ge bok yo nut do, suk gato Yefun Allah tom ne, An yo benbot kekro nde. Sarewo Yefun yo ben bi suk-i yó nde, wo An yo ma kekro nde, we An eswa men yetu kwet kadit sukibit gato men ben ne, ete men jammo An. An bariwa men yetu ge dik yo ges mo bot gesyos dom nde.
10Sarewo kam gato Yesus Kristus ma ne, bere An ma tepsu yegitsi gato ma wa syimsi suk ne, bere men gensu sor re. Tepsu kam ne, ben sato suk yo pu mo gu, ete sugane gu ne fres re. Ete suk mwa gato kem mo gu nim ne bot git or re. Sane dom bur ré si suk mwa gato mo bur ré fres or re.
11Bere Yefun Allah ben suk mwa ré ibit or re, sane men yé gato kem mo bur ré yo, men ben men bi suk-i sa u ne? Men ben sare, men ben Yefun Allah bi suk-i su men mit dik si men onyar dik, men bi men nggwa mo Yefun wa men ben An bi suk-i sor.
12Men ben Yefun bi suk-i, men eswa kam gato Yefun Allah tom su men ne, men mit iwa kam ne ma kekro et. Su kam ne, bot git gu nim ne or re. Suk mwa gato kem mo gu nim ne, bere bot kam is nju or re.
13Sarewo men eswa gu be si bur be gato Yefun Allah tom su men ne. Mone yé mwa ne sino ben sukndo tepsu Yefun Allah mit sor.
14Sane it yo, ji bi nji ji bi nyanggon gato ji jimnotku, men eswa kam gato Yefun Yesus tom ré it yo, men kamo nde, wo men wergat men nggwa, subere men ben suk mwa ne ndo sor, kwa yo gato ibit mo An gwem mo nde. Sane dom, men werwa men si Yefun Allah kem ndo su yu petok sor.
15Men nut do, men bi Yekwesu Yefun Yesus yo ma kekro nde, we Yefun eswa yei, subere yetu ge bok yo o ku os wa brek kadit os ibit, ete jammo Yefun Yesus subere án kem ndo to kapyo mato kapyo mo Yefun Allah bi nat-i. Men bi nji, Paulus gato men jimnotku ne krom bi sukdu-i digane dom re. Yefun Allah kak Paulus bi sukjimnut ko anato Paulus krom sukdu ne.
16Surat mwa gato Paulus krom ne, an krom sukdu subot kam gato bere Yesus Kristus satu ma ne. An wergat men ben men bi suk-i mwa ne ndo sino. Sukdu bok yo mo an bi surat ne sukye wa men jam rer kom mo mit. Yé gato yo onyar kem ri mo Yefun nde, ete jam suk ri nde tó, yé ne ki subot Paulus bi sukdu-i siri kadit Paulus bi sukjimnut-i gato an krom mo bi surat ne re. Yé gato jam suk ri nde ki subot Yefun Allah bi sukdu gato ye yi krom mo surat yi neya siri dom re. Kom mo rut yo, bere Yefun Allah bare ye gane mo bot gesyos re.
17Sarewo ji bi nji ji bi nyanggon gato ji jimnotku, nin dakai jam do, yé bok ne ki subot Yefun Allah bi sukdu siri mó re. Sane it yo, nin mewa nin nggwa subere yé gato ki bi sukdu-i daret ne yo ku os wa gwat nin mu mo án bi os-i gato siri kadit Yefun Allah bi sukdu-i ne nde. Nin mewa nin nggwa kadit yé gato ki bi sukdu-i daret sane, subere nin jom Yefun Allah bi sukdu-i gato sangge ne pe sor.
18Men bi Yekwesu Yesus Kristus gato nai men kadit sukye ete jowa men yetu ne, An ben sukndo su men yetu dakai yi. Sane nin dom ben nin bi suk-i ne ndo mwa wai o kadit nyim ne sor. Nin jam Yesus Kristus sisu ndo o et. Men bes An gum kok su ré sor to kapyo mato kapyo. Sangge. Ndo mo nin sor, kadit Petrus