Dual Panel1Men ka gri gato gum do, Paulus, Silas si Timotius anato krom surat ré wa nin. Men krom sukdu ré wa nin yé gato onyar kem mo men bi Yekwesu Yesus Kristus. Men krom sukdu ré wa nin yé gato sok mo men bi Ai, Yefun Allah bi rus-i gato kem mo kota Tesalonika.
2Men bi Ai, Yefun Allah si men bi Yekwesu Yesus Kristus ete mewa nin. Yefun Allah si Yesus Kristus ete uttok nin petok sor.
3Men bi nji, men bi nyanggon, men jam sukdu do, nin onyar kem mo Kristus nggi wai kadit nyim neya o re. Sane men ki ndo mo Yefun Allah mone. Sane dom, nin bi sukjimnut sye kas subot yu sye wai kadit nyim ne o re, sane men ki ndo mo Yefun Allah noru nombrak sor.
4Sane men mubot ye gato onyar kem mo Kristus mo nu ari mo nat yi neya yo, men ki sukdu subot nin petok sor. Men mit at wa men ki sukdu subot nin sare do, nin sa, kapre yé ben sukye nai nin, kapre yé ben nin ket kwayo-kwayo, nin yo misyar Yefun nde, wo nin onyar kem pe mo Kristus sor.
5Sane men jam do, bere Yefun Allah syo sukye nai yé gato ben sukibit nai nin mone tó. Nin ku sukye mo gato nin jammo Yefun Allah tepsu nin bi Yekwesu. Nin ku sukye, ete nin yo misyar Yefun nde, anato Yefun Allah ki subot nin do, nin sa, ben nin bi suk-i tepsu yé gato An iwa An nai sok mo An bi rus-i.
6Yefun Allah syo sukye nai nje tepsu sukibit gato yé ben ne sor. Sane yé gato ben sukye nai nin ne, bere Yefun Allah waii ben sukye satu nai yé ne.
7Sane su kam gato men bi Yekwesu Yefun Yesus si malaikat gato nggi is ma kadit gu kadum nggwa nai men yetu, sugane Yefun nai nin si men sino wé kadit sukye gato yé gane ben nai men ne.
8Bere Yefun Yesus si malaikat ne is ma, án gwat bot gato ru sye kadit gu ne ma wa án ben sukye nai yé ne. Án syo sukye nai yé gato misyar Yefun Allah. Án syo sukye nai yé gato bariwa simo os ndo gato men bi Yekwesu Yesus Kristus kak ne.
9Yé gane bere ku sukye to kapyo mato kapyo sor. Bere Yefun Yesus syun yé mwa ne kadit Yefun bi nat-i re. Yé mwa ne yo karowa men bi Yekwesu gato gum kok sye wai ne bi suktinggi o nde.
10Suk mwa ne bere bor su kam gato Yefun Yesus satu ma mo bur ré. An ma ne yo, bere An bi rus-i bes An gum kok sye wai o re. Bere yé mwa ne sino gato onyar kem mo An un An gum. Sugane nin dom si yé mwa ne sino sok mo Yefun Allah bi rus-i mone, we nin jammo sukdu gato men frot nai nin re.
11Men jam do, nin sok mo Yefun bi rus-i, sane anato men ki suk su Yefun Allah wa nin petok sor. Men ki suk su Yefun wa nin subere Yefun Allah nut mo nin do, nin sa, tep wa nin ben suk gato An fro wa nin ben ne. Suk ne sor nde, wo men ki suk su Yefun Allah subere Yefun syo An bi suktinggi wa ben nin nggiwa nin ben sukndo mwa gato nin iwa nin ben ne dom. Men ki suk su Yefun subere nin nggiwa nin ben suk mwa gato nin iwa nin ben, we nin onyar kem mo Yefun Yesus ne dom.
12Men benadi sane, subere yé bes men bi Yekwesu Yefun Yesus gum kok sye wai mo suk gato nin ben wa An. Sane dom, Yefun Yesus waii bes nin gum kok mo suk gato nin ben ne, we Yefun Allah si men bi Yekwesu Yesus Kristus ben sukndo su nin.