Alkitab Mobile SABDA
[VER] : [ABUN]     [PL]  [PB] 
 <<  2 Timotius 1 >> 

1Surat ré, ji krom wa nan, Timotius, ji bi pa gato ji jimnotku ndo nde. Ji gato gum do Paulus anato krom surat ré wa nan. Yefun Allah bes ji gum yerasul wa ji ben Yesus Kristus bi suk-i. Ji mu ki sukdu subot os ndo gato Yefun Allah tom su men yetu subere men kem ndo. Yesus Kristus anato kak os ndo ne wa men kem ndo to kapyo mato kapyo. Men bi Ai, Yefun Allah si men bi Yekwesu Yesus Kristus ete mewa nan. Yefun Allah si Yesus Kristus ete jimnotku nan. Yefun Allah si Yesus Kristus ete uttok nan petok sor.

2(1:1)

3Ji ki ndo mo Yefun Allah. Ji ben Yefun Allah bi suk-i tepsu ji bi amui, ji ben Yefun Allah bi suk-i sisu ji mit dik, kwa yo gato siri kadit ji bi sukjimnut gato ndo mo ji mit yo mo nde. Ji ki suk su Yefun Allah sa, ji napawa nan petok sor, ji ki ndo mo Yefun wa nan. Noru nombrak, ji ki ndo mo Yefun Allah wa nan petok sor.

4Ji napawa tomgato men ka we top yu, nan wo, nan jimnotku ji ndo nde. Sane ji da o wa men ka we ku yu o et. Ji iwa men ka we ku yu subere ji mit at wa wai o re.

5Ji napawa do, nan sa, nan onyar kem mo Kristus sisu sangge tepsu nan bi dat gato gum do Lois si nan bi im, Eunike. Ji nut do, sangge, nan onyar kem pe mo Kristus sato nan bi im si nan bi dat ne dom.

6Sane, ji krom suknapa wa nan do, nan wergat nan nggwa, subere suktinggi gato Yefun Allah Gen syo nai nan tomgato ji ak ji syim mo nan, nan misyar nde, wo nan werwa suktinggi ne bor mo suk gato nan ben ne mwa o et,

7we Yefun Allah Gen gato bok nggwa mo men, yo ben men nyuwa suk nde, wo An Gen ben men nggi wai kadit suk bok neya. An Gen ben men nggiwa men bi sukjimnut kas subot ye yi neya. An Gen ben men nggiwa men mewa men nggwa subere men ben sukdaret nde.

8Sane nan nyuwa nan ki sukdu subot men bi Yekwesu Yefun Yesus nai nje nde. Nan damen wa ji gato ye grem mo sel ré nde, we ji ki subot os ndo gato Yesus Kristus kak ne anato ye grem ji mo sel more. Nan ki subot os ndo gato Yefun Yesus kak wa men yetu ne, nan nyuwa nde, wo Yefun Allah ete ben nan nggiwa nan waii ku sukye mone sato ji ku re.

9Yefun Allah fro os ndo wa nai men wé kadit bot gesyos, subere men kem ndo to kapyo mato kapyo. Yefun Allah kiwa men brek ma kadit os ibit gato men muket ne, ete men tepsu An bi rus-i ben An bi suk-i gato ndo petok sor. An yo me mo sukndo gato men ben ne nde, wo An dakai fro An bi os-i, An dakai bi sukjimnut sye kas subot men yi sor, men yo ben suk yo nyim wa An nde. Sane anato An yo ut bur ré nde tó, An fro os ndo ne su Yesus Kristus nyim wé re, subere ri ma Kristus ma wa kak os ne wa men re.

10Sane su ré, Yefun Allah bi sukjimnut sye gato kas subot men dakai yi ne bor re. An syogat Yesus Kristus ma mo bur ré subere Kristus kak os ndo wa men kem ndo to kapyo mato kapyo ne it. Yesus Kristus kak os ndo wa men, An ben suktinggi gato gu men yetu kwop ne ibit or re, ete An kak os wa men kem gesyos sor.

11Sukdu subot os ndo gato Yesus Kristus kak ne anato Yefun Allah syogat ji mu kibot re. Yefun Allah bes ji gum yerasul si yeguru wa ji mu ki subot sukdu ne re.

12Ji ki subot sukdu ne anato ji ku sukye mwa ré, sarewo suk yo nde, ji yo damen nde, we Yefun Yesus gato ji onyar kem mó, ji jam kom mo mit re. Sukdu gato Yefun Yesus bes ji wa ji ki subot ne, bere An mewa sukdu ne sor, sukdu ne yo ges nde. Bere An mewa sor, kom mo kam gato An satu ma mo bur ré, ji jamwa re.

13Sane nan simo sukdu gato sangge, gato ji duno nan su ne sor, nan simo sisu nan mit dik si nan onyar dik et. Nan simo sukdu ne yo, nan onyar kem mo Yefun Yesus, nan bi sukjimnut sye kas subot ye yi petok sor, tepsu Yesus Kristus ben ne.

14Yefun Allah bes nan wa nan ki subot sukdu gato ndo wai o re, sane nan mewa sukdu gato Yefun Yesus grem kem su nan, subere napyo ges nde. Bere Yefun Allah Gen, gato bok nggwa mo nan, bere ben nan nggiwa mewa sukdu ne.

15Nan jam do, yé mwa ne sino mo bur Asia misyar ji re. Figelus si Hermogenes dom misyar ji re.

16Sarewo Onesiforus si bi rus ma ku ji, án ma ben ji mit ndo wam bok yo re. Kapre ji kem mo sel, an yo damen wa an ma ku ji more nde. Yefun ete dakai ben sukndo su án sor.

17Onesiforus ma kom mo kota Roma sa, an meret ji it anane. An werwa an meret ji sane sor, an ku ji mo sel ré re.

18Nan jam do, tomgatu ji kem mo kota Efesus tó, Onesiforus ós ji mo suk mwa mone. Yefun Allah ete dakai ben sukndo su an su kam gato Yefun Allah ma ndobot yetu mwa ne sino.


  Share Facebook  |  Share Twitter

 <<  2 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2023
Alkitab.SABDA.org

Android.SABDA.org
SABDA.mobi
Bantuan
Dual Panel Dual Panel

Laporan Masalah/Saran