Alkitab Mobile SABDA
[VER] : [ABUN]     [PL]  [PB] 
 <<  Filipi 3 >> 

1Ji yo krom sukdu mwa o nde. Ji bi nji, ji bi nyanggon, nin yé gato onyar kem mo Yefun Yesus, Yefun nai nin gum sok mo An bi rus-i, sane nin mit at wa et! Sukdu gato ji krom ré, ji krom wam bok yo wa nin mó re. Kapre ji krom wam bok yo o, suk yo o nde, we ji bi sukdu ne ós nin subere nin kem ndo.

2Nin mewa nin nggwa kadit yé gato mise. Nin mewa nin nggwa kadit yé gato bi sukjimnut ibit. Án mise yé ré, án wergat nin subere án kum nin da napyo wé. Án werwa bisunat nin re.

3Men ré anato yé gato simo sunat gato sangge, wo án yo simo sunat gato sangge nde re. Wo men sa, Yefun Allah Gen bok nggwa mo men anato men bes Yefun Allah gum kok. Men si Yesus Kristus tepsu dik ete men un An, sane men sok mo Yefun Allah bi rus-i mone it, tepsu ye bisunat men sisu sangge anane. Men yo onyar kem mo sunat gato yetu ben mo men kaim de nden ne nde.

4Men do ku os wa men sok mo Yefun bi rus-i mo suk gato men yetu ben ne yo, ji sa, ji ben suk mwa ne, sane ji dom ku os mone re. Yé deyo ki do, án sa, án ben suk mwa tep wa Yefun nai án sok mo bi rus-i. Sukdu ne do sangge yo, bere ji ki do, ji ré ben ji bi suk-i mwa wai kadit ne o re.

5Ji bi im kem su ji, kom mo kam munggwo rek or sa, yé bisunat ji re. Ji bi im si bi ai ne ye Israel, ji bi amui gum do Benyamin. Benyamin bi wis-i sok mo yewis Israel, sane ji sok mo yewis Israel dom. Sangge, ji ré ye Ibrani, we ji bi amui ye Israel dom, men ye Ibrani sino, yewis yi nde. Suga nyim ne sa, ji sok mo ye Farisi gato werwa benbot Musa bi sukduno mwa ne sino.

6Ji mit iwa ji simo sukduno mwa ne sino, sane ji ben sukye nai ye gato onyar kem mo Yefun Yesus mo bur Yudea. Suk gato Musa duno men su ne, ji benbot mwa ne or sino, kwa yo gwet mo nde.

7Suk gato ji ben nyim ne, ete ji onyar kem mone, sugane ji nut do, suk mwa ne ós ji sok mo Yefun bi rus-i, wo su ré ji bare suk mwa ne wé it. Ji nut do, suk mwa ne yo ós ji yo mo nde. Wo kadit Yesus Kristus sor anato ji ku os wa ji sok mo Yefun Allah bi rus-i.

8Sane dom, suk mwa gato mo bur ré sino yo ós ji yo mo nde. Suk gato ndo wai o re anato ji jam Yesus Kristus, ji bi Yekwesu, kom mo mit, tepsu ji bi yesyim it. Yesus Kristus anato ndo wai o re. Sane suk mwa gato ji ben suga nyim neya, gato ji onyar kem mone, suk mwa ne ji bare wé re. Suk mwa ne ji nut do, tepsu sukkwik sor re, subere ji ku os wa ji sok mo Yesus Kristus bi rus-i,

9subere ji si Kristus tepsu dik it. Ji sok mo Yefun Allah bi rus-i kadit suk mwa gato ji dakai ben tepsu Musa bi sukduno-i nde, wo ji onyar kem mo Yesus Kristus anato Yefun nai ji gum sok mo An bi rus-i ne it. Men onyar kem mo Yesus Kristus sor re, anato Yefun Allah nut do, men sa, men tep wa An nai men sok mo An bi rus-i it.

10Kwa dik yo gato ji iwa wai o re anare, ji iwa ji jam Yesus Kristus kom mo mit. Sane dom, ji iwa ji jam Yefun Allah bi suktinggi gato An sun Yesus Kristus kadit sukkwop su ne, ji iwa ji jam suktinggi ne kom mo ji mit dom. Ji iwa yé ben sukye nai ji dom, tepsu yé ben sukye nai Yesus Kristus sane sor kom mo yé gu An kwop. Ji iwa yé ben sukye nai ji kom mo yé gu ji kwop mo gato ji ben Yesus Kristus bi suk-i,

11subere Yefun Allah waii sun ji dakai kadit sukkwop dom.

12Ji dakai yo jam Yesus Kristus kom mo mit nde tó. Ji yo jam An bi suktinggi ne sisu ndo nde tó. Ji yo ben ji bi suk-i mwa ne sino tepsu Yesus Kristus iwa ne sisu ndo nde tó. Sarewo ji wergat ji nggwa subere ji ku suk gato Yesus Kristus fro wa ji ne, we ji ré, Yesus Kristus nai ji sok mo An bi rus-i it.

13Ji bi nji, ji bi nyanggon gato onyar kem mo Yesus Kristus, suk gato Yesus Kristus fro wa ji ne, ji nut mo ji mit do ji yo ku suk ne nde tó. Sarewo suk dik yo gato ji ben anare, ji misyar suk mwa gato ji ben suga nyim ne wé, ete ji wergat ji nggwa wa ji ku suk gato Yesus Kristus fro wa ji ne.

14Sane anato ji wergat ji nggwa nggi gat petok sor, tepsu ji werwa ji kas nggi wai kadit ye yi neya, subere ji kom mo pe gato or nyim kadit ye yi ne, ete ji ku suk gato ndo mone. Suk gato ji iwa ji ku ne anato ji kem gesyos mo gu sisu Yesus Kristus. Yefun Allah fro os wa men subere men kem gesyos mo suk gato Yesus Kristus ma ben mo bur ré re.

15Sane yo, men sino gato bi sukjimnut kak tepsu yenggras mo Kristus bi suk-i it yo, men misyar suk mwa gato men ben suga nyim ne wé, ete men wergat men nggwa nggi o et, subere men sino ku suk gato Yesus Kristus fro wa men ne. Men sino bi sukjimnut dik mone et. Sarewo nin deyo bi sukjimnut-i tara mo kwa dik yo it yo, bere Yefun Allah dakai sor ete ki sukdu ne rer nai nin.

16Wo nin jammo suk gato ji ki ré et, sukduno gato men benbot kom more it yo, men benbot petok sor.

17Ji bi nji, ji bi nyanggon, nin me suk gato ji ben ne, ete nin sino waii benbot et. Men kadum os gato ndo nai nin mó re. Sane ye gato sibot os ne, nin watbot suk gato ye ne ben, ete nin waii simo os ne dom.

18Nin simo os ne, we yé mwa werwa ben suk gato Kristus ben ne ibit. Ji ki nai nin wam bok yo mó re. Su ré ji ki nai nin wam dik yo o, ete ji wo su dom do, yé mwa ne ki mo án syokwet do, án ye Kristen, sarewo án ben án bi suk-i tara re. Yesus Kristus kwop mo kwesukwin wa tot suktot mo sukibit gato án ben ne, sarewo án bariwa suk gato Yesus Kristus ben wa án re.

19Kom mo rut, bere Yefun Allah ben án ibit re, we án bi sukjimnut sye mo án kaim budat ré sor re. Án jam nde án damen mo sukibit gato án ben ne, ete án nut do, suk ne ndo wai, we án bi sukjimnut kem pe mo sukibit gato yetu ben mo bur ré sor re.

20Wo men ré yo tepsu án nde. Men gum sok mo Yefun Allah bi rus-i mo gu it. Su ré men eswa men bi Yekwesu satu ma mo bur ré kadit gu ne. Men bi Yekwesu anato Yesus Kristus gato kak os wa men kem ndo to kapyo mato kapyo mo Yefun Allah bi nat-i.

21Yesus Kristus nggi wai o re. Suk mwa mo gu nim ne si bur ré jammo An it. Sane bere Yesus Kristus win men kaim-i gato budat ré tepsu An dakai kaim-i gato gesyos, gato ndo wai ne o re.


  Share Facebook  |  Share Twitter

 <<  Filipi 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel