Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 10 >> 

1Yetu ge dik yo gato gum do Kornelius kem mo kota Kaisarea. Kornelius an ye Roma bi yesukmise bi yesu. An jowa bi yemsok yetu ka wotin dik. An si bi yemsok ne ma kadit bur Italia.

2An si an bi rus-i ne sino jammo Yefun Allah, án sino un Yefun Allah su án mit dik. Kornelius ós ye Yahudi gato yewa suk su suk mwa. An ki suk su Yefun petok sor.

3Kam dik yo, jam gri, kre, an me suk tepsu an semda, wo an yo sem nde. An me Yefun Allah bi malaikat ge dik yo rer re. Malaikat ne ma ku an, malaikat ne ki do, "Kornelius o!"

4Kornelius sokwa malaikat ne, an nyu, an ki do, "Yenggras, suma ne?" Malaikat ne ki do, "Nan ki suk su Yefun Allah sa, Yefun jam suk gato nan ndekwa ne. Yefun Allah me nan ós ye Yahudi gato yewa suk. Suk gato nan ben ne, Yefun Allah jam re, Yefun Allah mit iwa nan re.

5Ré yo, nan syogat yetu ge bok yo mu mo kota Yope kar yetu ge dik yo mone gato gum do Simon, gato ye kendo do Petrus.

6Simon Petrus kem mo bi yemuk, Simon bi nu mo sem de. Simon gato bi nu ne ben suk su suge da."

7Malaikat ne ki sukdu ne, orge Kornelius kendo yetu ge we gato ós an mo an bi nu si yesukmise ge dik yo gato an onyar kem mó. Yesukmise ne un Yefun Allah su an mit dik dom.

8Kornelius nuk subot suk mwa gato malaikat ki ne, orge an syogat an ka gri mu mo kota Yope.

9Bi ik, kam ti ri, ye ka gri ne karowa kota Yope. An ka gri muket os ne tó, Petrus it mo nu yu gato ya wa an ki suk su Yefun.

10Petrus on de, an mit i wa an git sugit, sarewo sugit yo jon nde tó. Ye kon sugit saresa, an me suk tepsu an semda, wo an yo sem nde.

11An me gu kak or, suk yo sato san det sye sa ma bur. Ben sato ye rai nap at ne su bus, ete ye sa san det ne is ma bur.

12Mo san det ne, an me suge gato gwes at wis mwa mó, an me suge yi sato kwis si ndam wis bok yo mone dom.

13Sugane an jam Yefun Allah ki nai an do, "Petrus, nan mu, nan gu, nan kon, nan git et."

14Petrus ki do, "Yefun, sane nde! Ji yo git sugit gato men ye Yahudi fowa git yo mo nde, wam dik yo dom nde."

15Sarewo Yefun Allah ki nai Petrus wam dik yo o do, "Suk gato Yefun Allah ki ndo ne yo, nan ki do, suk ne ibit o nde, nan fowa suk ne o nde."

16Petrus me san det is ma bur wam gri, or san det ne satu mo gu o re.

17Petrus nalar mo suk gato an me tepsu an semda, an nutbot ndo nde. An nut mo an syidem do, "Yefun Allah duno ji sa u subot suk gato ji me ré ne?" Petrus nutbot suk ne saresa, ye kadum Simon bi nu nai ye ka gri gato Kornelius syogat ma ne, or an ka gri ma kom mo Simon bi nu, ete an ka gri ti mo nusyo de nden.

18Orete ye ka gri ne ké do, "Simon Petrus kem mo nu ré, bado?"

19Petrus nut subot suk gato an me ne saresa, Yefun Allah Gen ki nai an do, "Petrus, yetu ka gri meret nan.

20Sane nan is mu mo bur ku an ka gri et. Nan simo an ka gri, nan bi sukjimnut we nde, we Ji anato syogat an ka gri ma kar nan."

21Sane Petrus is, an ki nai ye ka gri ne do, "Ji anato Petrus gato nin ka gri meret ne. Nin ka gri ma wa suma ne?"

22Ye ka gri ne ki do, "Ye Roma bi yesukmise bi yesu gato gum do Kornelius syogat men ka gri ma more. An ben sukndo tepsu Yefun Allah mit, an jammo Yefun Allah. Ye Yahudi mwa ne sino un an. An ku Yefun Allah dakai bi malaikat ge dik yo. Malaikat ne syogat Kornelius ndekwa nan mu ku Kornelius mo bi nu, subere Kornelius jam nan bi sukdu et."

23Sane Petrus ki do, "Nin ka gri sok mo nu mit et. Nin ka gri sem more." Bi ik, ete Petrus sun. An si ye ka gri ne mu. Yé gato onyar kem mo Yefun Yesus mo kota Yope ne, yé deyo si án mu sino.

24Án sem mo os noru dik, or bi ik, ete án sino mu kom mo kota Kaisarea. Kornelius si bi rus si bi yesyim bok yo gato Kornelius kendo ma ne, án sino eswa Petrus si nje ma mone.

25Petrus kom mo nu sa, Kornelius ku an, ete Kornelius bare nggwa mo bur tepsu an som Petrus.

26Sarewo Petrus bes Kornelius ti. Petrus ki do, "Nan ti sor! Ji yetu tepsu nan, sane nan som ji nde."

27Petrus si Kornelius nuk sukdu saresa, an we sok mo nu mit. Mo nu mit ne, Petrus ku yé mwa gato sum mone.

28Petrus ki nai yé mwa ne do, "Nin dakai jam men ye Yahudi bi agama duno men do, men fowa mu ku yewis yi. Men nuk sukdu su dom nde. Nin jamwa re. Sarewo kam nggwete Yefun Allah kadum nai ji do, sugit mwa ne ndo sino, sane dom, Yefun Allah kadum nai ji do, yetu mwa ne ndo sino, ye gato men fowa ku ne yo mo nde.

29Sane nin kendo ji ma sa, ji ma sor, ji yo bariwa nde. Ji iwa ji jam suma ben anato nin ndekwa ji ba ku nin ne?"

30Sane Kornelius ki do, "Kam atte, jam sare, jam gri kre, ji ki suk su Yefun mo ji bi nu saresa, ji gensu yetu ge dik yo gato it san rup-rek ti mo ji gwem.

31An ti mone, an ki do, 'Kornelius, Yefun Allah jam suk gato nan ndekwa ne it. Yefun Allah me nan ós ye Yahudi gato yewa suk. Yefun Allah mit iwa nan.

32Ré yo, nan syogat yetu ge bok yo mu kar Simon gato gum do Petrus kadit kota Yope ma. Petrus ne kem mo bi yemuk bi nu mo sem de. Simon gato bi nu ne ben suk su suge da.'

33Sane, sugane it, ji syogat yé bok yo mu kar nan ma. Ji ki ndo mo nan, we nan ma ku men it are. Ré yo, men sino sum mo Yefun Allah gwem more wa men jam suk gato Yefun syogat nan ki nai men ne."

34Sane Petrus ki do, "Ré ne, ji jam it. Yefun Allah ben An bi suk-i su yewis mwa ne sino tepsu yu re. An yo bes yewis dik yo kok wai kadit yewis deyo dom nde.

35Yefun Allah nai nje sok mo An bi rus-i kadit yetu yewis mwa ne sino mo bur ré gato jammo An, ete ben suk ri tepsu Yefun Allah mit.

36Yefun Allah taru sukdu subot men ye Israel ne do, An syogat Yesus Kristus ma mo bur ré wa kak os ndo wa men yetu subere Yefun Allah nai men gum sok mo An bi rus-i. Sane Yesus Kristus gato gum Yekwesu wa men sino ne kak os wa men si Yefun Allah kem ndo su yu re. Nin dakai jam sukdu ne mó re.

37Sane dom, nin jam suk mwa gato Yefun Yesus ben mo bur Yudea. Ketke mo bur Galilea, Yohanes ki bi sukdu-i subot an ras nje mo syur, orete Yefun Yesus ben bi suk mwa ne kas.

38Nin dakai jam do, Yefun Allah bes Yesus, ye Nazaret ne, orete Yefun Allah Gen bok nggwa mo Yefun Yesus, syo suktinggi nai Yefun Yesus. Nin jam do, Yefun Yesus mubot peyo-peyo, An ben sukndo, An ben ye gato i ne ge. Yé mwa gato biris bi yekwesu jom ne, An nai wé kadit biris bi yekwesu, ete ben yé mwa ne ge re. Yefun Allah sisu Yefun Yesus anato An nggiwa ben suk ne.

39Men dakai me suk mwa ne sino gato Yefun Yesus ben mo kota Yerusalem si ye Yahudi bi bur ne sino, men me su men gro re. Ye mban An mo kwesukwin, ye gu an kwop wé sane,

40sarewo kam we rek, ete Yefun Allah sun An kadit sukkwop o re. Yefun Allah kadum An nai nje me re.

41Yefun Allah yo kadum An nai yé mwa ne sino me nde, wo yetu ge bok yo sor gato Yefun Allah bes wa ki sukdu subot suk gato án me su án gro ne. Yefun Yesus sun, orete Yefun Allah kadum An nai men dakai. Men ge bok yo ku An, men si An git sugit ete da syur sino.

42Yefun Yesus syaugat men do, 'Nin mu ki sukdu subot os ndo gato Ji kak ne nai yé mwa jam et. Nin ki do, Yefun Allah bes Ji tepsu Yepasye gato ndobot yé mwa ne sino, ye gato mbau tó, sisu ye gato kwop nyim re.'

43Yenabi mwa ne sino ki sukdu subot Yefun Yesus nai nje jam. Án ki do, ye gato onyar kem mo Yefun Yesus, bere ku os mone subere Yefun Allah yo maskwa ye ne mo sukibit gato an ben ne o nde, Yefun Allah yo nutbot sukibit ne o nde."

44Petrus nuk sukdu saresa, Yefun Allah Gen bok nggwa mo yé mwa gato jam sukdu ne.

45Ye Yahudi gato onyar kem mo Yefun Yesus gato si Petrus ma mone, án yeket, we án me Yefun Allah Gen bok nggwa mo yewis yi gato ye Yahudi nde.

46Án jam Yefun Allah Gen bok nggwa mo yé mwa ne, we yé ki suk su a yi neya, yé bes Yefun Allah gum kok. Orge Petrus ki nai ye Yahudi gato si an ma kadit kota Yope ne do,

47"Yewis yi ré, Yefun Allah Gen bok nggwa mó án tepsu men ye Yahudi, sane ndo sa, men ras án mo syur dom et."

48Sane Petrus syaugat ye ras yé mwa mo syur sisu Yesus Kristus gum. Orge yé ne ndekwa Petrus kem mone su án kam bok yo o et.


  Share Facebook  |  Share Twitter

 <<  Kisah Para Rasul 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran