Dual Panel1Apolos kem mo kota Korintus mo bur Akhaya saresa, Paulus muket os nden mu mo kota Efesus. Mone Paulus ku ye gato onyar kem mo Yefun Yesus ge bok yo.
2Paulus ndo mo yé bok ne do, "Nin nai sukjimnut do, nin brek kadit os nyim, ete nin simo os be gato Yesus Kristus kak ne yo, Yefun Allah Gen bok nggwa mo nin sugane it, bado?" Yé bok ne ki do, "Nde re, men jam nde kit Yefun gato nan kendo do Yefun Allah Gen ne."
3Sane Paulus ndo mo yé bok ne o do, "Sugato ye ras nin mo syur ne te, ye duno nin sa u ne?" Yé bok ne ki do, "Ye duno men su sukduno gato Yohanes gato ras nje mo syur duno nje su ne."
4Sane, Paulus ki do, "Yohanes duno nje subere án kwet kadit sukibit gato án ben ne, orete Yohanes ras án mo syur. Yohanes waii duno án o subere án ben sukibit o nde, wo án jammo Ye gato boribot Yohanes. Ye gane gum do Yesus."
5Yé bok ne jam sukdu ne sa, yé bok ne kiwa ye ras án mo syur, ete ye ki men bi Yekwesu Yefun Yesus gum su, subere ye jam do, án onyar kem mo Yefun Yesus it.
6Ye ras án mo syur, orete Paulus do ak syim mo yé bok ne sa, Yefun Allah Gen bok nggwa mo án. Án ki suk su a yi neya gato án jam nde. Án ki sukdu bok yo gato Yefun Allah tarubot án.
7Yé bok ne mone tepsu yetu ge musyu dik sop we.
8Paulus mu, an sok mo ye Yahudi bi nu ari. An ki suk, an yo nyu nde. An ki suk mone kamdik-kamdik sane sor kom mo aina gri. An duwer nje mone subot os gato men yetu sibot subere men sok mo Yefun Allah bi rus-i. Paulus wergat nje mone subere án sino sibot sukdu subot os ndo gato Yesus Kristus kak wa men yetu sok mo Yefun Allah bi rus-i. Paulus ki bi sukdu-i ne nggi.
9Sarewo ye Yahudi ge bok yo mone, án su krat, án bariwa án jammo suk gato Paulus ki ne. Sane án ki do os gato Yesus Kristus kak ne ibit, án ki do, os ne siri re, án ki bi sukdu-i sane mo yé mwa gwem. Sane Paulus mu kadit án re. Paulus si ye gato onyar kem mo sukdu subot Yefun Yesus ne mu kadit yé bok gato kabor Paulus mo sukdu ne. Paulus si ye gato onyar kem mo Yefun Yesus ne mu kibot sukdu ne mo Tiranus bi nu sye. Kamdik-kamdik Paulus si ye gato ma mone ki sukdu subot Yefun Yesus bi os-i.
10Kamdik-kamdik Paulus kibot sukdu ne mo nu sye ne sor kom mo tahun we. Sane ye Yahudi si ye Yunani mwa ne sino mo bur Asia jam sukdu subot men bi Yekwesu Yefun Yesus ne re.
11Yefun Allah ben Paulus nggiwa ben suk gato ben yé mwa ne sino yeket ndo nde.
12Sane ye gwat san det wokgan gato Paulus syimtok e, ye gwat san gato Paulus it mo an on ke e ne, ye gwat san gane mu ak mo ye gato i sa, ye gato i ne ge re. Sane dom ye gwat san det gane ak mo ye gato semda ben ne sa, semda ne titi wé kadit ye ne, orge ye ne ge re.
13Ye Yahudi ge bok yo mubot pe ne. Án ki do, án sa, nggiwa syun semda wé kadit ye gato semda ben ne. Án ki men bi Yekwesu Yefun Yesus gum wa ós syun semda ne wé mó re. Án ki nai semda ne do, "Yefun Yesus gato Paulus duno nje su ne, Yefun Yesus ne ben ji nggiwa syun nan wé, sane nan titi mu sor."
14Yekwesu mo Yefun Allah bi nu ge dik yo gato gum do Skewa, yenggras ne bi pa ge mufit gato ki Yefun Yesus gum mo semda sane re.
15Kam dik yo pá bok ne ki Yefun Yesus gum mo semda dik yo subere semda ne titi, sarewo semda ne ki nai pa ge mufit ne do, "Yefun Yesus sa, ji jam, Paulus ji jam dom, sarewo ji jam nde nin. Ji yo jammo nin nde."
16Orge ye gato semda ben ne yak gwa pá ge mufit ne ndo nde. Semda ben ye ne nggi wai kadit pá ne o re. Ye ne gu pá ne nggi sane sor, an tik pá ne bi san wé kadit pá. Pá bok ne titi kadit nu ne, pá ne kawarun, pá ne wip mwa.
17Ye Yahudi si ye Yunani mwa ne sino mo kota Efesus jam yé nukbot sukdu ne sa, yé mwa ne nyu ndo nde. Yé mwa bes men bi Yekwesu Yefun Yesus gum kok, we yé jam do An sa, nggi wai o re.
18Tomgane yé mwa gato onyar kem mo Yefun Yesus ma. Án ma rek sukibit mwa gato án ben ne mo yé mwa gwem.
19Yé bok yo gato kwa suk gwat án bi buku su án bi syua kwa mwa ne sino ma. Án syo bot git buku su bi syua kwa ne wé mo yé mwa gwem. Yé do so buku mwa gato ye syo bot git we ne yo, bere ye ku sugum perak ribu musyu mek, sarewo ye gato onyar kem mo Yefun Yesus gwat ma syo bot git buku ne wé re.
20Sane sukdu subot men bi Yekwesu Yefun Yesus, yé ki frekbot pe mwa neya sor, yé mwa jam re. Yé mwa jammo sukdu ne, ete kwet kadit sukibit mwa ne or re.
21Orge Paulus nut mo an syidem do, "Ji mu mo kota Yerusalem et. Ji mu wai ket bur Makedonia si bur Akhaya. Ji mu mo kota Yerusalem ji kem mone, or o ji waii mu mo kota Roma ne o."
22Paulus syogat yetu ge we gato ós an mu nyim mo bur Makedonia. An syogat Timotius si Erastus mu nyim, wo an kem mo bur Asia nam gan yo o, orete an boribot ye we ne.
23Tomgane yé mwa mo kota Efesus maskwa ket Paulus mo sukduno gato an duno nje su subot os ndo gato Yefun Yesus kak wa men yetu ne, yé mwa ne saiye daret, ete maskwa Paulus mone.
24Yetu ge dik yo gato gum do Demetrius kem mo kota ne. An jam an ben suk su perak, an ben yefun gato gum do Artemis bi nu dogato wokgan su perak wa nje gwat mu grem mo nu wa yé som Artemis su. An si ye yi gato ben suk su perak ku sugum mwa mo suk gato an ut wa ye som Artemis su ne.
25Sane Demetrius kendo ye gato ben suk su perak ne sum sino, ete an ki do, "Ji bi nji, nin jam do, kadit suk gato men ben, ete me so, men ku sugum mwa mó.
26Sarewo gabere men jam suk gato Paulus duno nje su ne. Paulus kidar nje do, suk gato men yetu ben su men syim, suk ne tepsu yefun nde, suk ne bi suktinggi yo mo nde. Yé mwa mo kota ré jammo an bi sukduno-i ne it, bergan yé mwa ne sino mo bur Asia jammo an bi sukduno-i ne re.
27Sane bere yé mwa bariwa so suk gato men ben su perak anare. Sane dom, bere yé mwa ne yo som men bi yefun Artemis mo Artemis bi nu o nde. Bere Artemis gato yé mwa mo bur Asia si nje mo bur iwedewe sino som ne, bere yé mwa ne misyar or re, bere ye yo bes mom gum kok sye o nde."
28Ye gato sum ne jam sukdu ne sa, án sino on sa ket Paulus si bi sukdu-i ne ndo nde, án saiye do, "Men, ye Efesus bi yefun Artemis sa, gum kok sye wai o re!"
29Bergan, yé mwa mo kota ne saiye daret e neya. Sane án but ye we gato ma kadit Makedonia, gato simo Paulus mubot os. Ye we ne gum do Gayus si Aristarkhus. Ye tik an we bot bur mu kekro mo nu sye gato ye sum mó.
30Paulus iwa mu ki suk su yé mwa gato sum mone ware, ye gato onyar kem mo Yefun Yesus duyawa an re.
31Sane dom, yepasye bok yo mo bur ne, án tepsu Paulus bi yesyim, yepasye bok ne taru sukdu subot nje subere Paulus yo ma mo nu sye ne nde.
32Yé mwa gato sum mo nu sye ne nalar, yé mwa ne saiye, án saiye daret sor, deyo saiye bi sukdu-i tara kadit deyo. Yé mone nap sye yo jam nde suk gato ben to án sum ne ware, yé dakai sum ete saiye daret sor.
33Ye Yahudi syogat Aleksander ti mo yé mwa gwem wa ki sukdu nai yé mwa ne, ye Yahudi yi mone saiye su bi sukdu-i nai Aleksander, subere Aleksander waii ki sukdu ne. Sane Aleksander bes an syim, subere yé mwa ne not ete jam suk gato an ki ne, ware,
34yé mwa ne jam do, an ye Yahudi sa, yé mwa ne saiye do, "Men, ye Efesus bi yefun Artemis sa, gum kok sye wai o re!" Yé mwa ne saiye sukdu-i ne sino sane sane sor kom mo jam we re.
35Orge yepasye gato gum yefak mo kota ne werwa mone sane sor yé mwa ne not subere jammo an bi sukdu-i. Yé mwa ne not, ete an ki do, "Ji bi nji, ye Efesus, nje mo bur ré iwedewe jam do, men mo kota Efesus mewa Artemis bi nu sisu jok gato ka sa mom gato ges kadit gu ne fe!
36Ye yo si men duwer yu mo sukdu ne nde, sane men not sor, men ben suk daret nde.
37Nin gwat ye we ma more, wo an we yo syimsi suk mo Artemis bi nu yo mo nde, an we yo kiket Artemis gum ibit dom nde.
38Sane Demetrius si nje gato ben suk su perak ne do maskwa ket yetu ge dik yo it yo, án mu ku yenggras yepasye ge bok yo gato fro wa kibot sukdu ne, orete án si yenggras ne kibot sisu ndo sor. Yenggras bok ne eswa nje ma wa kibot bi sukmaskwa ne sor."
39Sane yepasye ne ki nai Demetrius si nje gato ben suk su perak ne do, "Sane nin iwa men kibot sukdu yo it yo, nin eswa yenggras si nje sino mo kota sum, ete men kibot sisu ndo et.
40Sarewo men saiye daret sato ré it yo, bergan ye Roma gato jom men ndak men mo suk gato men ben ne, bere men ku sukye mo koirut or re. Ye Roma ma ndo men subot suk gato men saiye daret ré yo, bere men ki suma ne? Bere men yo ku sukdu yo mo nde, we i-ke yo mo nde."
41Yepasye mo kota ki sukdu ne, orge an syogat yé mwa ne satu mu mo bi nu sor.