Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 27 >> 

1Yé nai sukjimnut do, Paulus mu mo bur Italia, sane men meret kapal yo wa men simo. Men ku kapal wa men simo sa, ye syo Paulus si yetu ge bok yo mo penjara ne mo ye Roma bi yesukmise bi yesu ge dik yo syim. Yesukmise ne gum do Yulius, an sok mo yeko gato ye kendo do, "Kaisar dakai bi Pasukan."

2Men it mo kapal, gato ma kadit kota Adramitium. Ye fro kapal ne wa bere mubot sem de mo bur Asia. Men simo kapal ne mu kadit kota Kaisarea. Ye Makedonia ge dik yo gato gum do Aristarkhus, an ma kadit kota Tesalonika, an si men mo kapal ne.

3Bi ik, ete men mu kom mo kota Sidon. Men is mone. Yulius ben sukndo su Paulus, an misyar Paulus mu ku Paulus bi yesyim mone, subere yesyim ne ós Paulus mo suk gato Paulus ye mó.

4Orge me mu kadit Sidon, men it mo kapal ne o. Men muket ef Siprus sem de, we nobu kas nggi mo men gwem.

5Orge men mu ti o, men wai kadit bur Kilikia si bur Pamfilia, or men mu kom mo kota Mira mo bur Likia.

6Mo kota ne, yesukmise bi yesu ne ku kapal dik yo o gato ma kadit kota Aleksandria. Kapal ne mu mo bur Italia. Sane yesukmise syogat men simo kapal ne.

7Kam bok yo, kapal ne mu pare, men yo mu ndo nde sane sor, kom mo rut men karowa kota Knidus. Nobu kas nggi teker, sane men yo is mone nde, wo men mu mo ef Kreta. Men muket ef bot sem de, karowa bogwem Salmone.

8Men muket ef bot sem de, men yo mu sisu ndo nde. Men mu sor, men mu kom mo ré dik yo gato gum do Ré Ndo. Ré ne karowa kota Lasea.

9Men bi win pare bot sem ne sor kom mone. Sane ye Yahudi bi Kam Sye gato ye kendo do, "Men kem ndo su yu," yé konwa or re. Sane nobu kas nggi wai o re. Men bi win sisu ndo o nde, we aina gato nobu ne kas it. Sane Paulus ki suknapa nai án sino do,

10"Ji bi nji, ré yo, men bi win sisu ndo o nde. Men werwa men mu o yo, bere men ku sukye wai o re. Bere suk mwa mo kapal ges or re, bere kapal ré ibit re, bere men dakai kwop dom bayok."

11Sarewo yesukmise bi yesu ne yo jammo Paulus bi sukdu-i nde, wo an jammo ye gato gwat kapal si ye gato bi kapal ne.

12Ye me do, ré mone yo ndo wa nor kapal ne nde, sane yé bok ne kibot, or ye nai sukjimnut do, "Men bi win o mu kom mo kota Feniks et. Kom mone yo, men nor kapal sane sor aina gato nobu kas nggi ne or wé et." Kota Feniks ne mo ef Kreta, ré mo kota Feniks ne ndo, we kapal sok kadit nim si ket sisu ndo sino.

13Nobu kas wokgan ma nden sa, yé nut do tep it anane, men mu sor. Sane yé tik jangkar, yé bi win mu sa u nim ket ef Kreta bot sem de.

14Yo nam nde ge, nobu nyot gato kas nggi wai o re, gwat kapal ne. Ye kendo nobu ne gum do, 'Nobu Nyot' gato kas kadit nden ma ti.

15Nobu ne gwat kapal, yé mo kapal ne yo nggiwa gwat kapal bot sem de o nde. Sane án misyar nobu dakai gwat kapal sor.

16Men wai kadit ef wokgan gato gum do Kauda sa, nobu yo kas teker mone nde. Sane yé bes kwem wokgan gato an tik ne mo kapal mit. Yé bes kwem ne, sarewo nobu kas nggi anato sukye wa án bes kwem ne.

17Yé bes kwem wokgan mo kapal mit, orete yé far jamtu bot kapal subere kapal yo fot nde. Yé nyuwa sawe bere kapal yé mo yen karowa ef Sirtis, sane yé tik win ne wé, ete yé misyar nobu gwat kapal ne sor.

18Nobu krat gato kas nggi ne ben sem bak sye gwa men sor, bi ik, ete yé bare suk mwa mo kapal ne wé.

19Kam we rek, orete yé bare kapal bi suk-i nap yo mo sem dom, pa gato ben suk mo kapal ne dakai bare kapal bi suk-i mwa ne wé.

20Kam bok yo, nobu krat ne gwa men gat sor, men yo ku kam nde, men yo ku bí dom nde. Men yo nggi o nde it. Men nut do men kwop sor, men yo mbau o nde, men eswa men kwop sor.

21Nam it, men sino mo kapal ne yo git sugit mo nde, orete Paulus ti mo men sino gwem, an ki do, "Ji bi nji, nin napa suk gato ji ki nai nin mo ef Kreta do, men mu kadit ef ne nde, sane sa, men yo ku sukye sare nde, men bi suk mwa yo ges nde.

22Sarewo ré yo, ji kiwa nin nyu o nde, we men sino bere mbau tó, wo kapal ré sor, ete bere ibit.

23Noru gado, Yefun Allah gato jom ji ne, Yefun Allah gato ji gum kwerut wa ne, An bi malaikat ge dik yo ma ti mo ji de.

24Malaikat ne ki nai ji do, 'Paulus, nan nyu nde. Bere, nan mu wa Kaisar ndobot nan mone tó. Yefun Allah dakai jimnotku nan, sane bere An nai nan si yé mwa ne sino kadit sukye ré. Bere yé mwa ne sino mbau re.'

25Sane, ji bi nji, nin nyu nde, we ji onyar kem mo Yefun Allah. Suk gato An ki ne bere bor re.

26Sarewo bere kapal ré ibit mo ef dik yo mo sem de."

27Nobu gwat men subot Sem Adria ne sor kom mo kam musyu dik sop at rek. Or noru miten, ye gato gwat kapal ne nut do nobu gwat men mu karowa yen mo sem de it anane.

28Sane án far jok su jamtu, án sa mo sem, subere án jam sem kru kom mo meter ot ne. Sem kru mone meter musyu at. Yo nam nde ge, án ben sane o. Sem kru mone meter musyu gri.

29Án nyu sawe sem am kapal mo jok sa, sane án bare jangkar at kadit kapal mori, ete án ki suk su Yefun subere nombrak kekro.

30Ye gato gwat kapal ne, án werwa án titi kadit kapal ne. Án is kwem wokgan, án kidar, án ki do, án mu bare jangkar deyo o kadit kapal su et.

31Orge Paulus ki nai ye Roma bi yesukmise bi yesu si bi pa yemsok ne do, "Yé bok gare yo si men mo kapal nde yo, men yo mbau o nde, bere men kwop sino."

32Sane ye gato gwat kapal yo mu nde tó, yesukmise ge bok yo sap jamtu gato ye far kwem wokgan su ne wé, sane kwem wokgan ne ges mo sem kadit re.

33Karowa nombrak, Paulus syogat yé mwa ne sino mo kapal ne git sugit et. An ki do, "Kam musyu dik sop at rek nin kwabom kro, nin yo git sugit nde, wo

34ré yo, nin git subere nin kaim nggi, we bere men mbau sino, men kaim ibit wokgan yo dom nde."

35Paulus ki sane, orge an nai roti, an ki ndo mo Yefun Allah wa roti ne mo yé mwa ne sino gwem. An syat roti ne wa an git.

36Yé mwa ne sino me Paulus ben sane anato án mit it, án sino waii git sugit dom.

37Mo kapal ne men yetu ge wotin we musyu mufit sop mumat si mó.

38Án git sugit, án sino on ge sa, án bare gandum napta ne sino mo sem, subere kapal ne ho.

39Nyotkwo, ete ye gato gwat kapal ne me ef dik yo. Án jam nde ef ne, wo án me ré tu gato not si yen mone. An nai sukjimnut do, án gwat kapal ne mu mo ré ne, subere án werwa gwat kapal ye mo yen mone.

40Án sap jamtu mo jangkar bok ne, jangkar ne dakai mbon mo sem. Án deyo sombok jamtu kadit suk gato ós án gwat kapal su ne wé. Án deyo tik win dik yo mo kapal su. Án mu nden.

41Sarewo kapal yo kom mo sem de nde tó, kapal ne ye mo yen mo sem de karowa nden. Kapal su ye mone, yo ram o nde. Kapal nyo sem nap gwa sane sor ibit or re.

42Yesukmise bok gato mo kapal ne nut mo án syidem do, án gu yé gato án gwat kadit penjara ne wé, án nokwa sawe yé ne de sem kom mo ef, ete titi.

43Sarewo ye Roma bi yesukmise bi yesu iwa nai Paulus kadit bi yesukmise gu kwop nde, sane yesu ne duyawa yesukmise bok ne subere án yo gu ye gato án gwat kadit penjara ne kwop wé nde. Yesukmise bi yesu ne syogat yé gato jam de sem, subere án yak mo sem, ete de mu nden.

44Yé gato jam nde de sem, yesu ne syogat nai kwemuk dik yo kadit kapal, ete de su mu nden. Sane yé bok ne sino mu kom mo sem de sisu ndo.


  Share Facebook  |  Share Twitter

 <<  Kisah Para Rasul 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel