Alkitab Mobile SABDA
[VER] : [ABUN]     [PL]  [PB] 
 <<  Kolose 3 >> 

1Yefun Allah sun Kristus kadit sukkwop, sane dom, ben sato nin si Kristus sun mone sino. Sane nin bi sukjimnut sye mo suk gato ndo mo gu nim ne sor. Mone Kristus kem tak Yefun Allah de syim ge. An si Yefun Allah jom suk mwa ne sino.

2Nin bi sukjimnut kem pe mo Yefun bi suk-i mo gu nim ne sor, nin bi sukjimnut kem mo bur ré bi suk-i o nde,

3we ben sato nin kwop kadit bur ré bi suk-i it. Ben sato nin si Kristus kem mo gu si Yefun Allah.

4Kristus anato kak os wa nin anato nin kem ndo. Sane An satu ma mo bur ré yo, bere Yefun Allah bes nin si An gum kok sino.

5Bere nin si Kristus kem ndo sino, sane anato sukibit gato nin iwa nin ben mo bur ré, nin bare wé et. Nin bare sukibit gato jom nin ne wé sato ré: yebris si nggon ben siri su yu daret e, nin da bro wa ben sukdaret ket nin í e, nin da bro wa nggon bu e, nin bi sukjimnut nggiwa men nin sukibit bu e, nin gro sye wa nai suk mwa wa nin dakai sor e ne. (Nin gro sye wa nai suk mwa ne yo, tepsu nin onyar kem mo suk daret wai kadit Yefun Allah ne o re.)

6Ye gato bariwa jammo Yefun Allah bere iwa ben sukibit mwa gane, sane anato bere Yefun Allah on sa ket ye ne.

7Sugato nyim nin dakai benbot sukibit mwa ne bu, we sugane sukibit mwa gato nin ben ne ben sato jom nin tó.

8Sarewo, su ré nin ben sukibit bok yo ó gato ji krom more ne o nde. Nin bare sukibit sato ré wé kadit nin dakai et: nin grem sukmaskwa nde, nin maskwa ete saiye su nde, nin iwa ben suk ibit nai ye yi nde, nin kiket ye yi nde, nin njak ye yi gum nde,

9nin kidar yu o nde. Nin ben nin bi suk-i saga nyim ne o nde, we sukibit mwa ne nin bare wé it.

10Su ré, nin tepsu yetu gato be or re. Sane nin ben nin bi suk-i tepsu yetu gato be it. Yefun Allah gato ut suk mwa ne sino, an kak nin bi sukjimnut subere nin ben nin bi suk-i be tepsu An mit ne mwa wai kadit nyim ne o re. An dakai kak nin bi sukjimnut sye o subere nin jam An kom mo mit re.

11Nin jam An kom mo mit yo, nin jam do Yefun Allah yo wat ye Yahudi tara kadit yewis yi nde. An yo wat ye gato yo simo sunat si ye gato simo sunat nde tara kadit yu nde. An yo wat yedamok e, yeban e, pakwerut e, ye gato dakai ti mo dakai e ne, yé mwa ne sino, An yo wat tara kadit yu nde, we yé mwa gato bi sukjimnut or mo Kristus yo, yé ne si Kristus ne sino tepsu dik re.

12Nin anato sok mo Yefun Allah bi rus-i, An dakai jimnotku nin ndo nde, An bes nin wa nin ben An bi suk-i. Sane anato, nin dakai jimnotku ye yi, nin ben sukndo su ye yi et. Nin bes nin nggwa kok nde, nin ben nin bi suk-i njep su ye yi sor. Kapre nin ku sukye, nin benbot Yefun bi sukdu-i petok sor.

13Ye yi ben sukye nai nin yo, nin misyar sor. Ye yi ben sukibit ma nai nin yo, nin maskwa an mo sukibit ne nde, nin nutbot o nde. Kristus yo maskwa nin mo sukibit gato nin ben ne nde, An yo nutbot o nde, sane nin waii nutbot sukibit gato ye yi ben ma nai nin o nde, tepsu men bi Yekwesu Kristus ben An bi suk-i ne.

14Nin benbot suk mwa gare anato ndo, wo kwa gato ndo wai anato nin bi sukjimnut sye kas subot yu. Nin bi sukjimnut sye kas subot yu mo suk mwa ne yo, bere nin tepsu dik, kwa yo gato nin ben tara kadit yu mo nde.

15Kristus nai nin sok mo An bi rus-i subere nin kem ndo su yu. Sane mo suk mwa gato nin nai sukjimnut wa nin ben ne, sukjimnut ndo kadit Kristus ben nin bi sukjimnut not mo suk ne yo, nin ben sor, ete nin ki ndo mo An.

16Kristus bi sukduno-i gato ndo wai ne, nin nai ma nin grem pe mo nin mit si nin onyar et. Nin grem Kristus bi sukduno-i ne pe mo nin mit or wé ete nin duno yu e, nin ki suknapa wa yu e ne. Nin do ki Kristus bi sukduno-i nai yu yo, nin nutbot suk ne pare et. Nin kos sukos mazmur e, nin kos sukos gato nin un Yefun su si sukos gato Yefun Allah Gen ben nin mit it wa nin kos ne. Nin kos, ete nin mit at wa Yefun Allah dom et.

17Suk mwa ne sino gato nin ben e, nin kibot e ne yo, nin me mo suk gato men bi Yekwesu, Yefun Yesus dakai ben ne, orete nin waii ben nin bi suk-i tepsu An ben ne sor. Nin ki ndo mo men bi Ai, Yefun Allah, mo os ndo gato Yefun Yesus kadum nai nin ne et.

18Nggon kra, nin jammo nin bi ya et, we nggon gato jammo Yesus Kristus bere ben bi suk-i sane et.

19Yekra, nin bi sukjimnut sye kas subot nin bi nggon et. Nin ben nin bi suk-i ot su nin bi nggon nde.

20Pa wokgan, nin jammo nin bi ai si nin bi im petok sor, we Yefun Allah mit iwa nin ben sane.

21Yenggras, nin du ot nai nin bi pa nde, sawe bere pa ne bi sukjimnut ibit mo koi rut o re.

22Pakwerut, nin jammo nin bi yenggras petok sor. Nin jammo yenggras ne, kapre an si nin mone e, an yo si nin mone nde e, nin ben sukndo wa nin bi yenggras su nin bi sukjimnut dik ri-roi petok sor. Nin bes nin bi Yekwesu, Kristus ne, gum kok, ete nin ben suk wa nin bi yenggras sisu nin mit dik si nin onyar dik mone sor.

23Suk gato nin bi yenggras ki ne, dogato sye kom mo wok, nin ben sor, nin ben su nin mit dik si nin onyar dik et. Suk mwa gato nin ben ne, nin nut do, nin yo ben suk wa yenggras mo bur ré nde, wo nin ben suk ne wa nin bi Yekwesu mo gu sor,

24we nin jam wa pe do, bere nin bi Yekwesu, Kristus, syo suk nai nin mo nin bi kamba mo suk gato nin ben ne. Suk gato Yefun frowa An syo nai An bi rus-i ne, bere nin ku mone tó. Nin nut do, nin bi yenggras gato nin ben suk wa ne anato Kristus.

25Ye to ben sukibit, bere Yefun Allah ben sukye nai ye ne tepsu sukibit gato ye ne ben ne, we kapre ye ne gum pasye e, ye ne gum wok e, Yefun yo nutbot yetu gum nde re, An ben suk su ye gato gum pasye sor kom mo gum wok ne tepsu yu sino.


  Share Facebook  |  Share Twitter

 <<  Kolose 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel