Alkitab Mobile SABDA
[VER] : [ABUN]     [PL]  [PB] 
 <<  Roma 16 >> 

1Ji iwa ki sukdu subot men bi nggon yesu gato gum do Febe ne et. Nggon ne ben bi suk-i ne ndo. Mom anato ós yé gato onyar kem mo Yefun Yesus gato kem mo kota Kengkrea.

2Nggon ne do ma ku nin yo, nin mewa mom tepsu nin mewa men yé gato onyar kem mo Yefun Yesus. Nin kak nin mit wa mom ma tepsu nin kak nin mit wa men bi Yekwesu Yesus Kristus. Sane nggon ne do yewa suk yo, nin ós mom, we mom dakai ós yé mwa mó re, mom ós ji dom mó re.

3Nin ki nai Priska si Akwila do, ji ki ndo mo an we. Ye we ne si ji ben suk sino wa Yesus Kristus.

4An we ós ji kadit sukye, karowa an we kwop rok mone. Ji ki ndo mo an we, ji sor nde, wo yewis yi gato onyar kem mo Yefun Yesus ne dom.

5Nin ki nai yé gato onyar kem mo Yefun Yesus gato sum mo an we bi nu ne dom do, ji ki ndo mo án sino. Nin ki nai Epenetus gato ji jimnotku do, ji ki ndo mo an. An anato onyar kem mo Kristus nyim kadit ye yi mo bur Asia.

6Nin ki nai Maria do, ji ki ndo mo mom. Nggon ne ben mom bi suk-i, mom samok wa nin re.

7Nin ki nai Andronikus si Yunias do, ji ki ndo mo an we. An we yewis dik su ji. An we sok mo sel su ji mó re. Ji yo onyar kem mo Kristus nde tó, an we onyar kem mo Kristus nyim wé re. Yerasul bes an we gum kok re.

8Nin ki nai Ampliatus do, ji ki ndo mo an. Ji jimnotku an mo gato an onyar kem mo Yesus Kristus.

9Nin ki nai Urbanus, men bi yesyim gato men si an ben Kristus bi suk-i do, ji ki ndo mo an. Nin ki nai Stakhis gato ji jimnotku do, ji ki ndo mo an.

10Nin ki nai Apeles do, ji ki ndo mo an. An sa, an ben Kristus bi suk-i ne ri-roi sor, nin dakai jam re. Nin ki nai Aristobulus si bi rus-i do, ji ki ndo mo án sino.

11Nin ki nai Herodion do, ji ki ndo mo an. An yewis dik su ji. Nin ki nai Narkisus bi rus-i dogato onyar kem mo Yefun ne do, ji ki ndo mo án sino.

12Nin ki nai Trifena si Trifosa do, ji ki ndo mo án we. Nggon we ne samok wa ben Yefun bi suk-i. Nin ki nai Persis gato ji jimnotku do, ji ki ndo mo mom. Nggon ne dom samok wa ben Yefun bi suk-i.

13Nin ki nai Rufus gato Yefun bes wa ben Yefun bi suk-i ne do, ji ki ndo mo an. Nin ki nai Rufus bi im dom do, ji ki ndo mo mom. Rufus bi im ne ben suk su ji tepsu ji dakai bi im-i.

14Nin ki nai Asinkritus e, Flegon e, Hermes e, Patrobas e, Hermas si Yefun bi rus-i gato si nin kem mone sino do, ji ki ndo mo án sino.

15Nin ki nai Filologus si Yulia do, ji ki ndo mo án we ne. Nin ki nai Nereus si bi nyanggon ne do, ji ki ndo mo an we. Nin ki nai Olimpas si yé mwa gato onyar kem mo Yefun mone sino do, ji ki ndo mo án sino.

16Nin ku yu it yo, nin i yu tepsu nin yedik mo Yefun Allah bi rus-i et. Yé mwa gato onyar kem mo Kristus more sino ki ndo mo nin.

17Ji bi nji, ji bi nyanggon, nin mewa nin nggwa kadit ye gato ma wa wat nin ko kadit yu et. Nin mewa nin nggwa kadit ye gato ben nin bi sukjimnut waiyu mo sukduno gato ye ne kibot siri kadit sukduno gato yeguru duno nin suga nyim ne. Nin mu karowa ye ga sane nde.

18Ye gato wat nin kadit yu e, ki bi sukduno-i siri kadit sukduno gato yeguru ki ne yo, ye ne yo ben suk wa men bi Yekwesu Yesus Kristus nde, wo án ben suk wa ben án dakai mit at mo koirut sor re. Án ki án bi suk-i ndo yé re, án bidek nai yé gato jam nde, subere án kidar yé ne.

19Yé mwa ne sino jam do, nin sa, nin bi nin nggwa wa nin benbot Yefun Allah bi sukduno-i re, yé mwa ne jam it. Sane ji mit at mo suk mwa gato nin ben ne. Ji iwa nin bi sukjimnut kak subot suk mwa gato ndo sor, wo ji bariwa nin bi sukjimnut kom mo suk gato ibit. Ndo sa, nin jam nde subot suk gato ibit ne re.

20Yefun Allah gato ós men kem ndo su yu, bere Yefun Allah ne anato ben biris bi yekwesu, sane sor yekwesu ibit ne yo ku os o nde. Men bi Yekwesu Yesus Kristus ete mewa nin petok sor.

21Timotius gato si ji ben Yefun bi suk-i ne ki ndo mo nin. Sane dom Lukius, Yason si Sosipater gato yewis dik su ji ne ki ndo mo nin.

22Ji gato gum do Tertius ana krombot sukdu gato Paulus ki ne mo surat ré Ji ki ndo mo nin yé gato si men sino tepsu dik mo Yefun bi suk-i.

23Gayus ki ndo mo nin. Ji kem mo an bi nu. Yé mwa gato onyar kem mo Yefun Yesus gato kem more sum ben ari mo nu ne. Erastus gato jom sugum mo kota ne ki ndo mo nin dom. Men bi nji gato gum do Kwartus ki ndo mo nin dom.

24[Men bi Yekwesu Yesus Kristus ete mewa nin sino sor. Sangge.]

25Men bes Yefun Allah gum kok et. Ji ki sukdu subot os ndo gato Yefun Allah fro wa men yetu, ji ki subot Yesus Kristus gato kak os ne, orete nin jammo sukdu ne. Sane Yefun Allah ós nin anato nin onyar kem mo Yefun nggi wai kadit nyim ne o re. Kadit nyim tuya kom more, Yefun yo kadum sukdu ne rer wa ye jam nde, Yefun gurik sukdu subot os ne re,

26wo su ré men kibot sukdu ne rer wa yé mwa jam it. Yefun Allah gato gesyos ne, syogat yenabi krombot sukdu ne subere yewis mwa ne sino mo buryo-buryo ku os wa án sino onyar kem mo Yefun Allah, ete yé benbot suk gato Yefun ki ne.

27Yefun Allah ne dik sor. Yefun Allah anato bi sukjimnut ne ko wai o re. Sane men bes Yefun Allah gum kok wai o mo suk gato Yesus Kristus ben ne sor to kapyo mato kapyo. Sangge. Ndo mo nin sor, kadit Paulus, Yesus Kristus bi pakwerut


  Share Facebook  |  Share Twitter

 <<  Roma 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran