Dual Panel1Titus, nan dakai duno nje su sukduno gato sangge sor.
2Nan duno yebris gato sye nyim kadit nan sare do, án mewa nggwa kadit nau, án ben án bi suk-i ndo, subere ye un án gum mone. Án mewa nggwa kadit sukibit. Án jowa Yefun Allah bi sukduno gato sangge ne pe mo án mit sor. Án bi sukjimnut sye kas subot yé mwa ne tepsu yu. Án ku sukye yo, án misyar Yefun nde, wo án simo Yefun pe sor. Nan duno yenggras sane.
3Sane dom, nan duno nggon gato sye nyim kadit nan sare do, nggongras ben án bi suk-i tepsu ye gato bi nggwa mo Yefun Allah wa án ben Yefun bi suk-i sor. Nggongras ki nje ket kwayo-kwayo nde. Án iwa án da nau nde, wo án duno nje su sukduno gato ndo sor.
4Nggongras do ben án bi suk-i sane it yo, bere án kadum os gato ndo nai nggon kra gato nggi tó, subere nggon kra ne bi sukjimnut sye kas subot án bi ya si án bi pa,
5subere nggon ne mewa nggwa sisu ndo dom, ete án ben án bi suk-i ndo petok sor, kwa gato ibit yo mo nde. Nggongras duno nggon kra subere án fro án bi nu ne sisu ndo, si án jammo án bi ya. Nggon kra ben suk sane subere ye yo ku os wa ki sukibit ket Yefun Allah bi sukduno nde.
6Sane dom, nan duno yemsok, subere án mewa nggwa.
7Nan ben suk mwa ne ndo sino sor, subere kadum os wa yemsok waii benbot. Nan duno nje yo, nan duno sisu sangge, nan kidar wokgan yo dom nde, wo nan duno nje sisu nan mit dik si nan onyar dik sor.
8Nan duno nje yo, nan bok sukdu kwa gato ibit dom nde, subere ye gato meret os wa duwer nan ne damen, we án yo ku os wa ki men gum ibit mo suk yo mo nde.
9Nan duno pakwerut do, án jammo án bi yenggras mo suk mwa gato án ben ne. Án ben suk tepsu án bi yenggras mit, án duwer án bi yenggras nde.
10Án syimsi án bi yenggras bi suk nde, wo án ben bi án suk-i ndo sor, subere án bi yenggras mit kem mo án. Án ben suk mwa sane subere ye yi me suk gato án ben tepsu Yefun Allah bi sukduno-i, ete ye mit iwa Yefun Allah bi sukduno-i mone. Yefun Allah anato fro os ndo wa men kem ndo to kapyo mato kapyo.
11Nan duno nje su sukduno ne, we Yefun Allah dakai bi sukjimnut sye kas subot men yetu yi sor, men yo ben suk yo nyim wa An nde. Sane An syogat Yefun Yesus ma mo bur ré wa kak os ndo wa men kem ndo to kapyo mato kapyo.
12Men jam Yefun Allah bi sukjimnut sye kas subot men dakai yi anato kak men bi sukjimnut, sane men bariwa men ben suk siri kadit Yefun Allah mit. Men bariwa men ben suk ket men i sato yetu mo bur ré ben ne re. Sarewo men kem mo bur ré, men mewa men nggwa, men ben suk gato ndo sor, men ben suk ri tepsu Yefun Allah mit sor,
13men eswa Kam gato Yesus Kristus satu ma mo bur ré. Men kwabom kam mo Kristus do, bere An ma sor, sane men eswa. Su kam gato An ma su ne yo, bere yetu mo bur ré sokme Yefun kaim rer-rik su bi suktinggi ndo yé re. Yesus Kristus gato bere ma ne, An anato tepsu Yefun Allah gato gum sye kok wai o re. Yesus Kristus anato men bi Yekwesu gato kak os wa men kem ndo to kapyo mato kapyo.
14Yesus Kristus bi An nggwa wa tot suktot mo sukibit mwa ne sino gato men ben ne wé, subere men tepsu nje gato ben sukibit o nde, ete men sok mo An dakai bi rus-i gato mit iwa ben suk gato ndo sor.
15Nan duno nje su sukduno mwa ne sino. Nan bidek nje su sukduno ne. Nan ndantom nje subere án ben suk siri kadit sukduno mwa ne o nde. Nan duno nje sisu ndo subere yé jammo nan, ete yé yo ku os wa duwer nan mo sukdu ne nde. Nan duno nje subere yé yo ki nan gum ibit mone nde, wo yé un nan gum sor.