Alkitab Mobile SABDA
[VER] : [ABUN]     [PL]  [PB] 
 <<  Wahyu 9 >> 

1Malaikat kedomumek fuf bi trompet-i ba o sa, ji sokme bí dik yo ges mo bur re. Orete ji sokme ye yo syo kunci nai bí gato ges ne wa kak kwoye sye gato mo bur desnak ne syo su.

2Bí ne kak kwoye sye gato mo bur desnak ne syo su kunci ne sa, bot bu it ma nim. Bot bu ne mwa ndo nde, tepsu bot bu mwa gato it kadit bot gato sye teker. Bot bu ne it mo gu sane sor bot bu kewa kam su. Gu nim ne ndendu re.

3Orete yoi mwa is ma mo bur kadit bot bu ne. Yoi ne ku suktinggi tepsu wi.

4Yefun syaugat yoi ne do, "Yoi git es e, kwe e, sukjan e ne ibit nde, wo yoi jau yetu gato ye yo syat Yefun bi ja mo án git det ne mo nde. Yetu gato gum sok mo Yefun bi rus-i ne, yoi gu nde."

5Yoi yo ku suktinggi wa gu yetu kwop nde, wo yoi gu nje yó ndo nde tepsu wi gu nje. Yoi gu nje sane sor yé dipa ete wo su. Yoi gu nje sane sor kom mo aina mumek.

6Aina mumek gato yoi gu nje su ne, yetu mwa ne sino iwa án dakai kwop kadit sukye ne, sarewo án yo ku os nde. Án werwa án kwop, sarewo ben sato sukkwop titi kadit án re.

7Yoi ne ka sato kuda gato yé fro tepsu yeko gato futma wa gu yesa. Yoi bom suk yo mo yoi su ka sato yekwesu bi topi emas. Yoi gro-i ka sato yetu gro-i.

8Yoi sugo-i ka sato nggon sugo-i. Yoi syos-i sye ka sato singa syos-i.

9Yoi it suk sato san besi kewa yoi tunap. Yoi ok yo, yoi i pu sye sato kuda gato gwat kereta mwa futmu wa gu yesa ne.

10Yoi nyo-i ka sato wi nyo-i. Yoi gu nje yó sato wi gu nje ne. Yoi ku suktinggi wa gu nje su yoi nyo sane sor yé dipa ete wo su. Yoi gu nje sane sor kom mo aina mumek or.

11Yoi bi yekwesu anato malaikat ge dik yo. Malaikat ne yekwesu mo kwoye sye mo bur desnak ne dom. Su a Ibrani malaikat ré gum do, Abadon. Su a Yunani malaikat ré gum do Apolion (gato bi sukjimnut do, "Ye gato ben yetu ibit").

12Sukye kwa gri gato ndam syap tu saiye su ne, kwa dik sa, yoi ben or re, wo kwa we yo o mó tó.

13Malaikat kedomumat fuf bi trompet-i ba o sa, ji jam sukdu ma kadit suk suti at mo meja emas gato ye grem suksom wa ye som Yefun Allah su mone, mo Yefun Allah gwem.

14Sukdu ne, ye ki nai malaikat kedomumat gato jom bi trompet-i sare do, "Nan mu sombok malaikat ge at gato ye rai mo Syur Efrat de ne et."

15Malaikat kedomumat ne mu sombok malaikat ge at ne. Malaikat ge at ne, Yefun fro ndek wa mu gu yetu napyo kwop wé tepsu bi jam, si bi kam, si bi aina si bi tahun gare it. Kadit yetu ge gri, án gu ge dik kwop, wo ge we ete kem tó.

16Malaikat ge at ne bi yesukmise gato it mo kuda ne kom mo ge juta wotin we, ji jam ye ki re.

17Kuda mwa ne si yé gato it mo kuda ne, ji me tepsu ji semda sare do, yé gato it mo kuda it san besi kewa án tunap. San ne er tepsu bot ru e, kur tepsu jok nilam e, kri tepsu belerang. Kuda ne su-i tepsu singa su-i. Bot e, bot bu e, ru sye basmi kwik su belerang ne syesyar kadit kuda syokwet re.

18Bot e, bot bu e, belerang e ne, suk gri ne ben sukye wa nje. Suk gri gato syesyar kadit kuda syokwet ne gu yetu napyo kwop or re. Kadit yetu ge gri, án gu ge dik kwop, wo ge we ete kem tó.

19Kuda bi suktinggi mo án syokwet sisu án nyo ne sino. Kuda nyo tepsu kwis. Mo kuda nyo nap ne i-su mó ka sato kwis su. Kuda nyo anato gu nje yó ndo nde.

20Yetu napta gato yo kwop mo sukye bok ne nde tó yo, án sino yo brek kadit sukibit gato án ben ne nde. Yetu ne som yerom e, aboksye e ne pe sor, án som sukdaret gato yetu ut win Yefun Allah e ne. Yé ut suk ne kadit suk sato emas e, perak e, tembaga e, jok e, kwe e ne. Suk bok gato yetu dakai ut wa som daret ne yo me suk nde, suk ne yo jam sukdu gato yé ki ne nde, suk ne yo mu dom nde.

21Sane dom, yetu gato kem tó ne, án yo brek kadit sukibit gato án ben nde sato: án gu nje kwop e, án kwa syua e, kro ri e, frum suk e ne e, án ben siri su yu e, án syimsi suk e ne. Sukibit mwa ne án ben petok sor.


  Share Facebook  |  Share Twitter

 <<  Wahyu 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran