Dual Panel1Nin duwer yu ete nin ben sukndi su yu ne te, i-ke mo suk sato suma ne? Suk gato nin dakai mit iwa nin ben ne anato tik nin kadik-kadik mit ne anato nin ben sukndi su yu.
2Ye yi bi suk gato nin gro sye wa nin nai ne, nin yo ku nde, sane nin mitwa nin gu ye ne kwop subere nin ku suk ne. Suk gato nin mit iwa nin ku ne, nin yo ku nde, sane nin duwer yu, ete nin ben sukndi su yu subere nin ku suk ne. Sarewo nin yo ku suk ne nde, we nin yo ndek mo Yefun Allah wa suk ne nde.
3Nin da ndek suk mo Yefun Allah, sarewo nin yo ku suk ne dom nde, we nin ndek suk mo Yefun Allah su nin bi sukjimnut-i gato siri ne. Nin yo ku nde we, nin ndek suk ne subere nin dakai mit at wa mone sor re.
4Nin anato ye gato ben suk siri kadit Yefun Allah mit. Nin mit iwa bur ré bi suk-i, anato nin tepsu ye gato bariket Yefun Allah re, nin jam bado, nde e? Ye to nai sukjimnut do, an mit iwa bur ré bi suk-i anato tepsu yeko wa Yefun Allah it.
5Nin nut do ye krom Yefun bi sukdu daret bado? Sane nde, Yefun Allah bi sukjimnut mó anato ye krom mo Yefun bi sukdu kwa yo sare do, "Men gen gato Yefun Allah bi nai men ne iwa ben suk mwa sisu nggi wai o re."
6Kapre men gen iwa ben suk mwa daret, Yefun Allah dakai jimnotku men anato An ben men nggiwa men brek kadit suk mwa gato men gen iwa ben ne. Tepsu ye krom mo Yefun Allah bi sukdu do, "Yefun Allah bariket ye gato bes nggwa kok, wo An ben An bi suk-i ndo su ye gato ben an nggwa ga tepsu pa wokgan."
7Sane nin jammo Yefun Allah et. Nin mise wa nin syun biris bi yekwesu wé kadit nin. Nin do ben sane it yo, bere biris bi yekwesu nyu ete titi wé kadit nin re.
8Nin karowa Yefun Allah et. Sane bere Yefun Allah waii karowa nin. Nin yé gato ben sukibit, nin mus nin syim mo sukibit, nin ben sukibit o nde. Nin yé gato bi sukjimnut we, nin bi sukjimnut dik mo Yefun Allah sor.
9Sa ndo sa nin nutbot sukibit mwa gato nin ben ne sisu ndo et. Nin wo, nin nderku nin nggwa mo sukibit mwa ne. Nin sa o nde, wo nin wo sor. Nin mit at o nde, wo nin nutbot sukibit mwa gato nin ben ne et.
10Nin ben nin nggwa ga tepsu pa wokgan mo Yefun Allah gwem, sane bere Yefun Allah bes nin gum kok o re.
11Ji bi nji, ji bi nyanggon, men kiket yu nde, we ye gato kiket yu ne, an ki an bi nji mo Kristus bi de-i ne gum ibit it yo, tepsu an kiket Yefun Allah bi sukduno-i it anane. Nin do ki do Yefun Allah bi sukduno-i ne kwa yo ibit it yo, tepsu nin yo benbot sukduno ne nde, wo nin dakai bes nin nggwa kok tepsu yepasye gato kibot sukduno ne anane.
12Sarewo Yefun Allah dakai sor anato ki sukduno gato sangge wa men yetu. Bere An dakai sor anato Yekwesu gato ndobot men mo suk gato men ben ne. Yefun ka dik ne anato nggiwa bare men mo bot gesyos, An nggiwa nai men kadit bot ne, ete ós men kem ndo sor to kapyo mato kapyo. Sane nin yo nggi kom mo pe yo nde, sane nin ki ye yi gum ibit mo suk gato an ben ne nde.
13Nin jammo suk gato ji krom more et, nin yé gato ki do, "Kam ré yo e, ik yo e, men mu mo kota dik yo, orete men kem mone kom mo tahun dik, ete men so suk wa men meret sugum mone."
14Nin ki sane, sarewo nin dakai jam nde, bere kam sari ne ma suma ana bor mo nin ne? Nin anato tepsu bot bu gato ye me, orete bergan sor re, nofuf gwat mu or re.
15Nin ki sane nde, wo nin ki sare do, "Yefun Allah do imo os gato men fro ré it yo, bere men kem mo bur ré, ete men benbot os gato men fro ne."
16Sarewo su ré nin dakai bes nin nggwa kok. Nin fro nin bi os-i mo nin dakai, orete nin mit at mo ye yi gwem subot suk ne. Suk mwa gato nin ben sane, bere siri re.
17Sane ye gato jam suk gato ndo wa an ben, ete an yo benbot nde it yo, an ben sukibit it anane.