Dual Panel1Dinoa, solasohong, la kutula'ingkoa' mating kakuasaang ang si nabea Inaha Masero pano di ingkännaingkea', aka' pemalaä' la ungnginsang aka ang tahpa' yaling inde di kaha-kaha.
2Ungnginsangnga' ungngoatee naonge anna dakangkoa' mampetahpa', ya' sähsä' lalangkangkoa' lambi' umpenombaikoa' tau-tau ang dai mala ma'tula'.
3Dahi pemalaä' la ungnginsang si'da-si'da aka ang sule yaho mai di Puang Alataala. Dai aha tau ang natehte Inaha Masero ma'tula' ang la mala naoatee, "Titändo Puang Yesus!" Noa tunne' dai aha ang la mala mangngoatee, "Dehataete' Puang Yesus!" ponna dai natehte Inaha Masero.
4Ma'kahupa-hupa kakuasaang ang nabea, ampo' mesa supu Inaha Masero ang mebea.
5Ma'kahupa-hupa pengkähängang ang si tababe, ampo' mesa supu Dehata ang tapengkähängnging.
6Ma'kahupa-hupa lalang ang napake Puang Alataala umpalanda' kakuasaanna yaling di katuhoanta, ampo' mesa supu Puang Alataala ang ungkähäng asang ingkänna yatoo yaling di kalaeta.
7Ingkännaingkea' untahimbo kakuasaang yaho mai di Inaha Masero anna malaingkea' membabe ang la kekuna pano di solata.
8Pano di mesa tau aha ang nabea kakuasaang Inaha Masero untula' pepakaenga' ang keaka' si'da-si'da. Anna pano di tau senga' aha ang nabea kakuasaang ungnginsang yato ang dai si nainsang tau.
9Pano di mesa tau aha ang nabea kakuasaang Inaha Masero mampetahpa' si'da-si'da. Anna pano di tau senga' aha ang nabea kakuasaang mampabono'.
10Pano di mesa tau aha ang nabea kakuasaang umbabe ang mepusa'-pusa'. Anna pano di tau senga' aha ang nabea kakuasaang untula' pangngelo'na Puang Alataala. Noa toi pano di tau senga'nake' aha ang nabea kakuasaang umpasisenga'ang yato ang nahingngi anna naita, lambi' nainsang ang nakasulei: yahoraka mai di Inaha Masero, bahtu' di hao mai di inaha ang senga'. Pano di mesa tau aha ang nabea kakuasaang ma'tula' umpake ma'kahupa-hupa basa ang nabea Inaha Masero. Anna pano di tau senga' aha toi ang nabea kakuasaang umpebahtuang yato basa anna malai napähäng solana.
11Mesa supu ang dioaintee Inaha Masero anna Dianto ang mebea asang ingkänna inde kakuasaang. Kalaena ang mambohtu naoate kakuasaang aka ang la dibea pano di simesa-mesa boi tau.
12Kita' ang mampetahpa' pano di Kristus mala dipasihapang mesa bätäng kalaena tau. Mesa supu bätäng, ampo' mai'di baheanna. Mai'diingkea' ang mala dipasihapang baheang, ampo' malaingkea' dipasihapang mesa bätäng kalae.
13Aka' haliingkea' natero' Puang Alataala yaling di Inahanna ang mesa. Aha di alla'ta ang to Yahudi, aha ang tadia to Yahudi; aha ang sabua' anna aha ang beba'. Ampo' moinnakato noa, ya' haliingkea' untahimbo Inaha Masero ang mesa.
14Yaling di mesa bätäng kalae mai'di baheanna, dai mesa supu.
15Dai mala napihki' bihti' naoatee, "Tadiaä' teyye, dahi tadiaä' sambaheang bätäng kalae." Moi ke la napihki' noai indee, ampo' tontongke' sambaheanna yato bätäng kalae.
16Bahtu' ponna ke ma'pihki'i talinga naoatee, "Tadiaä' mata, dahi tadiaä' sambaheang bätäng kalae," ya' tontongke' sambaheanna yato bätäng kalae.
17Hapanganna ponna ke ingkännai baheanna bätäng kalaeta mendahi asang mata, ya' umba noa tau la pahingngi? Bahtu' ke mendahi asangngi talinga, ya' umba noa tau la pauri'?
18Dianto anna naäto'i Puang Alataala kalaeta lambi' ma'kahupa-hupa baheanna yaling. Ingkänna hupanna baheang napayaling di ongeang ang sihatang naongei situhu' pangngelo'na.
19Setonganna tadia bätäng kalae ke la hapangannai ingkänna yato baheang mesa asang hupanna.
20Dahi mai'di baheanna ampo' mesa supu bätäng kalae.
21Dai mala mata ungngoainte teyye, "Dao kupahallu!" Noa tunne' dai mala bää' ungngoainte bihti', "Dao kupahallu!"
22Setonganna mai'di baheang yaling di bätäng kalaeta ang si diangka' malamma, dianto ang handang pahallu.
23Baheanna bätäng kalaeta ang si disanga dai maleke diita, dianto ang tapakeangka' lambi' dipakeing ang maleke. Baheanna bätäng kalaeta ang taangka' dai sihatang naita tau senga', ya' dianto ang tadakai anna dai landa'.
24Ampo' baheang ang si disanga mahasane' diita, ya' daine' si dipakeing ang maleke. Ingkänna baheang yaling di bätäng kalaeta naäto' asang Puang Alataala lambi' yato baheang ang diangka' dai maleke, dianto ang dipakeangka'.
25Dianto ang napolalang Puang Alataala anna malai dai la aha kasibehtaang yaling di bätäng kalae, ampo' diare' ingkänna baheang si undakai solana lambi' masahke mahodinding asang.
26Ponna ke makorongngi mesa, ya' nasa'ding toi solana; ke dipakeangka'i mesa, ya' masannang yato solana sibaha.
27Noa tumokoa' dio mendahi mesang bätäng kalae yaling di kasikenteammu sibaha Puang Yesus Kristus. Mala dioatee ingkämmu simesa-mesa mendahimokoa' baheang yaling di bätäng kalaena Kristus.
28Anna yaling inde di kamesaantaa' naäto' Puang Alataala pengkähänganta simesa-mesa: ang uhuna aha rasul, kaderuanna aha nabi, katallunna to pampakuhu. Pihsananna mane ahai tau ang napakuasa umbabe ang mepusa'-pusa', anna tau ang nabea kakuasaang mampabono'. Mane aha toi tau ang nabea kakuasaang undului solana anna tau senga' nabea kakuasaang umbahanang solana, anna noa toi tau senga'nake' nabea kakuasaang ma'kara yaling di ma'kahupa-hupa basa ang nabea Inaha Masero.
29Dai dia asanna ang mendahi rasul, bahtu' nabi, bahtu' to pampakuhu. Tadia asang toi ang ma'kuasa umbabe ang mepusa'-pusa',
30bahtu' mampabono'. Dai dibea asang kakuasaang ma'tula' yaling di ma'kahupa-hupa basa, bahtu' umpebahtuang yato basa anna malai napähäng solana.
31Ampo' di alla'na inde ma'kahupa-hupa kakuasaang yaho mai di Inaha Masero, ya' malakoa' umpemala yato ang la handang undului solamu. Dahi dinoa la kupakalesoingkoa' lalang ang handang mapia.