Dual Panel1Pusa'ä' kupelele yato babemua' ang tasampa' liu. Ang naoatee, aha are' tau yaling yato di jumaa'mu ang umpobahine pohona. Aka' moi tau ang dai mampetahpa' anna dai si nababe ang karake liu noa yatoo.
2Ampo' dioa'-dio, moinnakato anna napanoai solamu, ya' malängkä'ke' inahammu. Akana daia' mapi'di' inahammu unsohso yato pembabena? Sihatang ke la umpasohongngia' yato tau yaling mai di alla'-alla'mu.
3Moinnakato anna sikahaoangngingkea', ampo' diting inahangku lambi' malakoa' kupahenta. Dahi yaling di kakuasaang ang hali nabeaä' Puang Yesus Kristus, puha kubohtu kuoatee pahallu ditahungkung yato tau. Ponna ke ma'himpummokoa', kalehaii diting inahangku. Dahi kupalau mating yaling di sanganna Puang Yesus Kristus
4(5:3)
5dianto la umbeho inde tau pano di Pongkahana setang, bahtuanna dai la umpabei ma'himpung sibaha-bahakoa'. Panoaia' anna ullambi'i tahungkung pano di kalaena anna malai salama' sungnga'na ke lambi'mi allo kasuleanna Dehata.
6Akana palla'rakoa' dio malängkä' inahammu umpabei yato tau lella' napanoa yatoo? Aha karanna to baha' ang naoatee, "Sampi'du' supu bibi' roti anna malang umpabängkä' samai tahpung." Bahtuanna: mesa tau ang madosa mala ungkarakei kamesaanna samai solana.
7Sinnoa to Yahudi, ke lambi'mi tempona Pa'rame-rameang Paska, si umpasohong samai bibi' roti ang aha yaling di dasannaii, mane untunui dombana ang la mendahi pesulänna. Noa tumokoa' dio, pahallua' umpasohong yato to madosa yaling mai di alla'-alla'mua' anna malakoa' tontong masero, aka' inang maserokoa' yaling di Kristus ang tapasihapang domba Paska aka' mate nasulängngiingkea'.
8Dahi, solasohong, tatibei yato bibi' roti, dianto yato pembabe karaketa ang dolu anna la umpenombaiingkea' Puang Alataala sitonda sangkalebu inaha ang maroho di olona.
9Yaling yato di suha' ang kupapebaha mating dolu, kulahangkoa' ma'sola-sola sibaha tau ang si membabe tasampa'.
10Ampo' daete' kuoatee anna la damokoa' ma'sola-sola sibaha tau ang dake' ungnginsang Puang Alataala ang si membabe tasampa', ang so'bäng karake, ang si ma'bulitu' anna menomba pano di tau-tau. Aka' ponna la kulahangkoa' ma'sola-sola sibaha tau ang noa, ya' la pahallukoa' umpellei inde lino.
11Bahtuanna yato pangnguki'ku dianto: daa umpa'sola-sola sibaha tau ang unsanga kalaena to mampetahpa' pano di Puang Yesus, ampo' setonganna yato tau si membabe tasampa', si so'bäng karake, si umpenombai tau-tau, si untändoi solana, si umpamalango kalaena, bahtu' si ma'bulitu'. Moi poro la mande sibaha tau ang noa indee, ya' dai mala!
12Pano di tau ang tadia to Sahani, tadia kodi' ang la umpahehsa pembabenaii. Puang Alataalaetee' ang la mantahungkung. Ampo' kalaemua' ang la pahallu untahungkung yato santosahanimmu ang sala babena. Dahi situhu' yato ang tiuki' yaling di Suha' Masero naoatee, "Pasohongngi yato to membabe karake yaling mai di alla'-alla'mu."
13(5:12)