Dual Panel1Dinoa pemalaä' untimba' yato pekutanammu ang yaling yato di suha'mu ang umpapebahaingkä'. Ya' inang tahpa'ete' la mahasa ke dai tau siala.
2Ampo' di kodi'na kodi', dotanne' mesa boi muane la kebahine anna mesa boi bahine la kemuane, andana ahai tau ang la membabe tasampa', sinnoa yato ang pemmai'ding dahi.
3Dai sihatang ponna muane dai umpabei bahinena sibaha matindo, bahtu' ponna bahine dai umpabei muanena. Sahing pahallu umpasundung kabiasaanna yato kasialaang pano di sangkolunna.
4Bätäng kalaena bahine tadia ampuang kalaena kale, ampo' naampui toe' muanena. Noa tunne' bätäng kalaena muane tadia ampuang kalaena kale, ampo' naampui toe' bahinena.
5Dahi daa ungkalapai sangkolummu yaling inde di kasikenteanna muane anna bahine. Supung malakoa' dai sibaha matindo ke puhaia' unsitula'i sibaha ungngoatee la umboli buke'a' sämpäi' anna malakoa' ma'sambayang sitonda sangkalebu inaha. Puhai yato tempo kapo'de', ya' la pahallukoa' sibaha matindo sumule anna dakoa' la mala nasändä'i setang umbabe ang tasampa' napobua' kapemalaammu ang masuhsa dikuasai.
6Indee ang mane kutula' pihki' kalaeku, tadia pahenta.
7Setonganna kusanga ang handang mahasa ke la malai ingkänna tau dai siala, noa kalaeku. Ampo' daingkea' sinnoa-noa. Piha tau nabea Puang Alataala behe kasialaang; piha tau nabea kakuasaaang la dai siala.
8Pano di tau ang dai aha sangkolunna, moi ang dake' siala, noa tunne' ang mate sangkolunna, kuoatee dotanne' ke la malakoa' tontong dai mohapu, sinnoaä'.
9Ampo' ke dai mala untähäng kapemalaammu, ya' dotanne' daka'koa' sangkolung. Aka' mahasa puha nei' ke sialai tau andana la nakuasaikoa' kapemalaammu, sinnoa api ang dai mala dipi'dei.
10Panone' di tau ang inang sialang, aha inde pahenta yaho mai di Dehata, tadia pihki' kalaeku: dianto bahine dai mala untibe muanena.
11Ampo' ke inang sitibeng, ya' mala tontong namesa, bahtu' mala siala sumule yato muanena. Noa tunne' muane dai mala untibe bahinena.
12Panone' di tau senga', pehingngii inde tula'ku, moinnakato anna tadiai pahenta ang mebea Dehata. Ponna to mampetahpa' inang umpobahineng ang tadia to Sahani, ampo' inde bahinena pemala tontong sibaha-baha, ya' dai mala la sitibe.
13Noa tunne' ponna to mampetahpa' inang umpomuaneng ang tadia to Sahani, ampo' inde muanena pemala tontong sibaha-baha, ya' dai mala la sitibe.
14Aka' yato muane ang dai mampetahpa' dibeho dai' di Dehata aka' bahinena ang mampetahpa'. Noa tunne' yato bahine ang dai mampetahpa' dibeho dai' di Dehata aka' muanena. Ponna ke dai noa, ya' änä'mu dai la dipatani, ampo' setonganna puha dibeho dai' di Dehata anna dipatani aka' kapampetahpa'anna mesa to baha'na.
15Ampo' yato tau ang dai mampetahpa' dai' di Dehata, ponna ke inang napemalai la sitibe, ya' pabeii le'ba'. Ponna ke noai, ya' yato sangkolunna ang mampetahpa' pano di Puang Yesus daine' tisangke' pano di kabiasaanna yato kasialaang, aka' natambaiingkea' Puang Alataala tuho dai sikalla-kalla.
16Oa' bahine, pahallukoa' ungkalehai: yato muanemuii ang dai mampetahpa' umbai la mampetahpa' dako' aka' dioa'. Noa tunne' dioa' muane, yato bahinemuii ang dai mampetahpa' umbai la mampetahpa' dako' aka' dioa'.
17Pano di simesa-mesa tau puha nabea Puang Alataala katuhoang ang senga'. Dahi pahallua' tontong yaling di katuhoammu ang inang aha, daa unsändä'i umbala'i. Dianto indee atohang ang si kupepakuhuing pano di mesa boi jumaa'.
18Hapanganna to Yahudi, ke mampetahpa'mi pano di Puang Yesus, ya' dai pahallu ullahpa' katoyahudianna. Noa tunne' tau ang tadia to Yahudi, ke mampetahpa'mi pano di Puang Yesus, ya' dai pahallu ditille sinnoa to Yahudi.
19Aka' di olona Puang Alataala, moi tau ditille, moi dai, ya' dai maaka. Ampo' ang kekuna, dianto untuhu'i tau pahentana Puang Alataala.
20Ingkänna tau, moi umba noa katuhoanna naonge anna natambaii Puang Alataala mampetahpa' pano di Puang Yesus, ya' pahallu umpatontong katuhoanna ang aha.
21Hapanganna dioa' ang sabua' naonge anna natambaikoa' Puang Alataala mampetahpa' pano di Puang Yesus, ya' daumpamapi'di'i inahammu ke tontongkoa' sabua'. (Ampo' ke la malai tau dai mensabua' lolo, ya' mahasa bouetee'.)
22Moi tau sabua', moi tau beba', ya' sinnoa siang di olona Puang Alataala. Aka' sabua' ang natambai Puang Alataala mampetahpa' beba'mi dinoa di hao mai di dosanna ungngolai Kristus. Noa tunne' tau ang tadia sabua' ang natambai Puang Alataala, mendahing pole' sabua'na Kristus.
23Puhamokoa' naalli Puang Alataala anna yato allimmua' puhang nabaya' masuli' liu. Daa umpabeii naposabua' lolokoa' pihki'na to lino.
24Dahi solasohong, sinnoa ang kutula' langngena', aka' sikentemingkea' Puang Alataala, ya' pahalluingke tontong yaling di katuhoanta ang inang ahang naonge anna mampetahpa'ingke.
25Pano di tau ang dake' siala, dai aha kutahimbo pahenta yaho mai di Dehata didionaii, ampo' aha pihki' kalaeku ang mala dipetahpa' aka' yaling di pa'kalemunna Dehata puha nabeaä' kakeaka'ang.
26Noa indee pihki'ku: dinoa kita' to Sahani menge ungngoloi ma'kahupa-hupa kamadahhaang, lambi' kusanga dotanne' dai la tabala'i katuhoanta ang inang ahang.
27Ponna ke inang ahang sangkolummu, ya' daa untibei. Ponna ke dakangko siala, ya' daunsiala.
28Ampo' ke la sialakoa', ya' tadia toete' dosa. Supung kuoatee, tau ang sialang inang la aha kamasuhsaanna yaling inde di lino, anna pemalaä' ke la dakoa' nahoa kamasuhsaang.
29Pahtuyungku, solasohong, dianto anna malaia' ungnginsang ungngoatee kapo'de' liu tempota yaling inde di lino, lambi' kasialaammu dai la mala mendahi pungngu' tannunna pihki'mu.
30Moi kamasannangang, moi kamasuhsaang, moi kulle, ingkänna yatoo daasangngi aha mala ullondo pengkähänganna Dehata.
31Tau ang menge umpeäng kapahalluanna yaling di katuhoanna, dai la mala dia lolo supu napihki'. Aka' inde lino sibaha ingkänna ihsinna mengeng la puha.
32Ang kupemala, solasohong, dakoa' la naposabua' pihki'na katuhoang. Tau ang dai kebahine mala supu umpihki' pengkähängang di mendehatanna anna umba ang la napanoa umpamasannang Puang Yesus.
33Ampo' yatone' tau ang kebahineng pahallu tunne' umpihki' kapahalluang di mentolinona anna umba noa umpamasannang bahinena,
34lambi' pihki'na tipereduang. Noa tunne' bahine ang dang kemuane bahtu' ang dake' kemuane mala umpihki' supu pengkähängang di mendehatanna, lambi' la pemala supu tuho umpamasannang Dehata. Ampo' yatone' bahine ang kemuane pahallu tunne' umpihki' kapahalluang di mentolinona anna umba noa umpamasannang muanena.
35Nasuhung anna ma'tula' noaä' indee, aka' pemalaä' kubeao ang la manduluikoa'. Daia' la kuaku tisangke'koa' pano di ma'kahupa-hupa atohang. Pemalaä' anna malaia' la umbabe lolo ang sihatang, anna malai dai la aha ang mangkalapaikoa' yaling untuhu'i Puang Yesus.
36Hapanganna mesa tau ang pemala siala dohena aka' mapahhi' ungkuasai kapemalaanna bahtu' aka' tuhtuang matuang, ya' dai diangka' dosa. Malaete' siala.
37Ampo' ke yalingngi di inahanna naoatee, "Dotanne' dä' kebahine," aka' nainsang ungkuasai kalaena anna dai aha mampahsa, ya' mahasa ke dai la siala.
38Dahi pano di tau ang siala, inang mahasa ke nababei noa, anna yatone' tau ang dai siala, ya' mahasa puha.
39Situhu' atohang kasialaang, mesa bahine ang kemuaneng tisangke' pano yato di muanena naonge anna tuhoke'. Ampo' ponna ke mateng yato muanena, ya' lahpa'mi pole' di hao mai yato di atohang kasialaang, lambi' mala siala tau senga', ahsala' inde muane ang napomuane to mampetahpa' toe'.
40Ampo' la masannang puha nei' ke dai la siala sala. Dianto indee pihki'ku kale, ampo' moinnakato noa kusanga sihatang toe' ihsi Inahanna Puang Alataala.