Alkitab Mobile SABDA
[VER] : [ARALLE]     [PL]  [PB] 
 <<  1 Yohanes 5 >> 

1Menna-menna mampetahpa' naoatee, "Puang Yesus To Dilanti' la Mepasalama'," tau yatoo änä'na Puang Alataala. Anna menna-menna ungkalemui Ambeta, tau yatoo ungkalemui toe' änä'-änä'na Ambeta.

2Ponna ungkalemuiingkea' Puang Alataala anna tatuhu'i pahentana, tainsammi taoatee ungkalemuiingkea' änä'-änä'na Puang Alataala.

3Aka' ponna untuhu'ingke pahentana Puang Alataala, ya' takalemui tunto nei'. Anna yato pahentana dai matingngi,

4aka' ingkänna änä'-änä'na Puang Alataala untalo ingkänna kakarakeang yaling di lino. Kapampetahpa'ammitoo pano di Puang Yesus anna malaingkea' untalo kakarakeang.

5Mennakae' la mala untalo ingkänna kakarakeang yaling inde di lino, ke tadiai kita'a' ingkänna ang mampetahpa' dioatee, "Puang Yesus Dianto Änä'na Puang Alataala."

6Puang Yesus Kristusmitoo ang puha sule ditero' uhai anna umpatitollo hahana. Dai sule supung la ditero' uhai, ampo' ditero' uhai sibaha umpatitollo hahana. Anna Inaha Maserontoo unsa'biii naoate Puang Yesus Dianto Änä'na Puang Alataala, aka' ahana tahpa' sipa'na Inaha Masero.

7aka' aha tallu ang unsa'bii didiona Puang Yesus Kristus:

8Inaha Masero, uhai pantero'anna, anna haha titollona; inde tallu dai aha sisala kasa'bianna.

9Aka' kasa'bianna hupatau anna tapetahpa', londoke'ne' kasa'bianna Puang Alataala, aka' Kalaena unsa'bii didiona Änä'na.

10Menna-menna umpetahpa' Änä'na Puang Alataala, tau yatoo umpayalimmi di inahanna yato kasa'biang. Ampo' menna-menna dai umpetahpa' Puang Alataala, tau yatoo unsangai Puang Alataala to pa'loseng-loseng, aka' dai napetahpa' kasa'bianna didiona Änä'na.

11Anna dianto inde kasa'bianna naoatee: Puhamingkea' nabea Puang Alataala katuhoang sapano-panona, anna Änä'nantoo Dianto kasuleanna yato katuhoang.

12Menna-menna tohho yaling di Änä'na Puang Alataala, tau yatoo ullambi'mi katuhoang. Ampo' menna-menna dai tohho yaling di Änä'na Puang Alataala, tau yatoo dai ullambi' katuhoang.

13Oa' ingkämmu ang umpetahpa'mi sanganna Änä'na Puang Alataala, kuuki'ingkoa' yaling inde di suha' anna malai ungnginsang si'da-si'daa' ungngoatee, "Ullambi'mang katuhoang sapano-panona."

14Anna daingkea' la bata-bata pano di olona Puang Alataala, aka' la nahingngimingkea' ke umpalauingkea' aka-aka situhu' pa'elo'na.

15Aka' tainsammia' taoatee nahingnging ingkänna palaunta, dahi la tainsang toe'a' taoatee taampuing yato palaunta.

16Ponna ahakoa' ungngita solamu to mampetahpa' umbabe dosa, la umpa'sambayangngingnga' dai' di Puang Alataala, anna malai umpamasero sumule katuhoanna. Ampo' dakoa' kuoainte la pahallu umpa'sambayangnging yato tau ang umbabe dosa ang la mebaha pano di kamateang sapano-panona. Aka' aha tau ang membabe noa yatoo.

17Ingkänna babe karake dipomadosa. Ampo' aha dosa dai la mebaha pano di kamateang sapano-panona.

18Tainsang taoatee menna-menna mendahing änä'-änä'na Puang Alataala, tau yatoo dang la si umbabe dosa. Ampo' pengkähänganna Pongkahana setang la nadakai lolo Änä'na Puang Alataala anna malai dai umpasähsä' lalang änä'-änä'na.

19Tainsang taoatee änä'-änä'naingkea' Puang Alataala; anna tainsang toia' taoatee ingkänna to tamampetahpa' nakuasaine' Pongkahana setang.

20Tainsang toia' taoatee suleng Änä'na Puang Alataala anna nabuhkeiingkea' inahanta anna malaingkea' ungnginsang si'da-si'da Puang Alataala. Ya' tohho si'da-si'damingkea' yaling di Puang Alataala anna Puang Yesus Kristus Änä'na. Dianto Dehata ang setonganna anna Dianto Katuhoang lambi' sapano-panona.

21Oa' änä'ku, la undakai manahpakoa' kalaemu andana umpenombaikoa' dehata ang tadia Dehata ang si'da.


  Share Facebook  |  Share Twitter

 <<  1 Yohanes 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel