Alkitab Mobile SABDA
[VER] : [ARALLE]     [PL]  [PB] 
 <<  2 Korintus 3 >> 

1Ampo' daumpihki'ia' ungngoatee umpudi bumang kalaeki' dinoa! Daang sinnoa yato piha to pampakuhu ada' diting. Ke lambi'mi mating di bohtomu si napaitaikoa' suha' ang umpudi kalaena anna malaia' sika untahimbo. Anna ke la maong, ya' si umpalau bung suha' di hao mai di dioa' ang la umpudi kalaenaii. Ampo' kami'-kami' daang umpahallu suha' ang noa yatoo.

2Aka' kalaemua' mendahi suha' pampudiang ang kitokei. Sinnoakoa' mesa suha' ang tiuki' yaling di inahangki'. Lambi' di umba-umba kiola, si kitula' pano di ingkänna tau umba noa untahimbomokoa' Kaheba Mapia ang kibaha.

3Dia tuke', solasohong, malesong pano di ingkänna tau boa pengkähängki' umbaha Bahtakaranna Puang Yesus Kristus mating. Mala dioatee sinnoakoa' mesa suha' ang nauki' Puang Yesus. Yato ang nauki' tama di inahammu mahasa puha nei' andana suha' biasa ang diuki' umpake tinta, bahtu' suha' masae ang si tiuki' dolu pano di batu lohpä'. Aka' yaling di inahammu dianto ang napangnguki'i Kristus yaling di kakuasaanna Inaha Masero ang tuho.

4Nasuhung anna bahaniang ma'tula' noa indee, aka' mampetahpa'ang dai' di Puang Alataala ungngolai Kristus.

5Dai kioate kibela kibabe inde pengkähängang. Tadia kapabelaang kalaeki', ampo' Puang Alataala supu ang mambeaang kapabelaang.

6Nabeaang kapabelaang mendahi to pengkähänna ang umbaha pa'dandiang bakahunna pano di hupatau. Yato pa'dandiang bakahu tadia supu atohang ang tiuki', ampo' diare' katuhoang bakahu ang nabeaingkea' ungngolai Inaha Masero. Aka' ponna pemalaingke maroho di olona Puang Alataala, anna supumingke untuhu'i atohang ang tiuki', ya' inang la untahimboringkete' kamateang. Ampo' ponna untuhu'iingke Puang Alataala yaling di kakuasaanna Inaha Masero, ya' la untahimboingke katuhoang ang lambi' sapano-panona.

7Dolu atohanna nauki' Puang Alataala pano di batu lohpä' mane nabeai pano di Nabi Musa. Inde atohang umbaha supu kamateang pano di tau aka' dai aha ang mambela mantuhu'i. Moinnakato noa, ya' pansillo' sämpäi' lindona Musa napobua' yato atohang lambi' dai natua nanenne'i to Yahudi.

8Dahi yato pa'dandiang ang nabaha Inaha Masero ahana inang mahasa puha nei'.

9Ponna ke matandei yato pa'dandiang ang dolu ang umbaha kamateang, ya' inang matande puha nei' inde pa'dandiang bakahu ang mampamarohoingkea' di olona Puang Alataala.

10Setonganna, yato pa'dandiang ang dolu danne' matande ke dipasiitai kamatandeanna inde pa'dandiang bakahu.

11Aka' ponna matande yato pa'dandiang ang dolu, ang sämpäi' supu, ya' inang matande puha nei' inde pa'dandiang bakahu ang tontong lolo lambi' sapano-panona.

12Dahi, aka' kihannuang pano inde di pa'dandianna Puang Alataala ang bakahu, lambi' bahaniang umpepainsangnging Kaheba Mapia.

13Dai aha aka ang kibuni. Daang sinnoa Nabi Musa dolu ang unsapu' lindona. Napanoa anna malai dai sika naita to Yahudi yato pesilona ang tuhtuang mallung lambi' pa'da.

14Makahha' bää' yato to Yahudi, anna lambi' dinoa ahake' ang mekalapai sihapang unsapu' lindo, lambi' dai sika umpetahpa' katahpa'ang naonge anna dibatai yato Atohanna Musa. Supung Kristus ang la mala ungngalai yato pesapu' ang ungkalapai pihki'naii.

15Lambi' dinoa, ponna ke sika umbatai suha'na Musa, ya' mala dioatee tisapu' inahanna.

16Ampo' ponna sika umbala'i pihki'na lambi' mampetahpa' dai' di Dehata, ya' la dialaimintoo yato pesapu'naii.

17Aka' Dehata dianto Inaha Masero. Anna ponna ke tohhoi yaling di inahanta, ya' lahpa'mingke di hao mai di ingkänna ang ungkalapai kasikenteanta.

18Dahi, ingkäntaa' ang mampetahpa' dai' di Dehata, dang aha ang unsapu' inahanta. Tainsammi kamatandeanna Dehata ang tuhtuang umpamapia lolo inahanta. Napanoa lolo Inaha Masero tama di inahanta anna malai tuhtuang mendahiingkea' sinnoa Dehatanta ang matande.


  Share Facebook  |  Share Twitter

 <<  2 Korintus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran