Dual Panel1Dahi, aka' mengkähängngang kami' sibaha Puang Alataala, dianto anna mengkamala'mang, solasohong, anna dakoa' ungkaleäng-leängngi mana' pa'kalemunna Puang Alataala ang hali untahimbo.
2Yaling di Suha' Masero aha tiuki' tula'na Puang Alataala naoatee, "Yato di tempo ang kupama'tantu kuhingngi pehumala'mu, donetoo kukalemuio lambi' kupasalama'o." Oa' solasohong, pehingngiia' inde tula'ku: dianto indee tempo ang napama'tantu Puang Alataala. Allo dinoantoo sadia Puang Alataala la napasalama'koa'.
3Maenga'ang yaling di ingkänna pembabeki' anna malai dai aha tau unsalla pengkähängangki' yaling mengeang umpepainsangnging Bahtakaranna Puang Alataala.
4Kipamapia lolo pengkeroki' di ingkänna siamo anna malai maleso dioatee to pengkähännaang Dehata. Si sa'bara' loloang yaling ungngolai ma'kahupa-hupa pesändä', kamasuhsaang anna kamadahhaang.
5Si nabambaang tau, si natahungkungngang, si nasibobo'-bobo'iang. Si mengkähäng kahha' loloang, lambi' aha tempona daang mala hahe anna daang mala mande.
6Maleso diinsang dioatee inang to pengkähännaang Puang Alataala, aka' masero pembabeki', kiinsang umba noa Bahtakaranna Dehata, sa'bara'ang anna marota'ang pano di tau senga'. Aha lolo Inaha Masero yaling di kalaeki' anna ma'kalemuang pano di tau senga' mengkalao yaling di inaha.
7Maleso dioatee to pengkähännaang Puang Alataala, aka' pepaturu ang kipepainsangnging dianto pepaturu ang tahpa' anna aka' kakuasaanna Puang Alataala ang mala diita yaling di pengkähängangki'. Maroho lolo pembabeki' anna inde kamarohoangki' mala dipasihapang pa'dang anna unta ang la kipake untolla' balingki'.
8Moi dipakauho-uhoang, bahtu' dipudiang, moi disallaang bahtu' dipakeangka', maleso diinsang dioatee to pengkähännaang Puang Alataala. Aha ang mansangaang to pa'bulitu', ampo' setonganna katahpa'ang ang si kitula'.
9Naangka'ang tau dai kainsangang, ampo' setonganna mai'di tau mangnginsangngang. Nasangaang tau to mate, ampo' setonganna tuhokang! Moinnakato anna dipohetong si'da-si'daang, ampo' dasiakang mate.
10Mai'di kamasuhsaangki' ampo' mahasa lolo inahangki'. To memase-maseang ampo' kami'mitoo ang umbaha behe pano di tau mai'di. Nasanga tau dai aha aka-akangki', ampo' setonganna ingkänna-ingkänna siamo kiampui.
11Oa' solasohong diting di Korintus, puha kipamaleso karangki' mating, dai aha aka ang kibuni. Ungnginsang pa'kalemungki' mating.
12Tadia kami' ang dai ma'kalemu mating, ampo' dioa' ang dai ma'kalemu di kami'.
13Ma'tula'ä' sihapang ma'tula'ä' pano di änä' kalaeku: kupalau mating la ma'kalemukoa' mai di kami' sihapang umpasule pa'kalemungki' mating.
14Daunsiba'ba' leleng londonang daunsiala tau ang dai mampetahpa' pano di Puang Yesus, aka' inang dai sihatang. Unsangarakaa'to sinnoa siang tau ang untuhu'i pa'elo'na Puang Alataala anna tau ang dai untahimbo Puang Alataala? Bahtu' la malaraka kamabayaang sihau kamalillingang?
15Sikapiairaka Kristus anna Pongkahana setang? Malaraka la aha kasikenteanna to mampetahpa' anna to tamampetahpa'?
16Sinnoaraka Dasang Ada'na Puang Alataala anna pampahahi'ang? Daete' pole' aha la noa. Ampo' kita'mitoo Dasang Ada'na Puang Alataala, aka' Puang Alataala To Tuho lolo inang tohho yaling di inahanta. Sinnoa ang natula' dolu Puang Alataala yaling di Suha' Masero naoatee, "La tohhoä' di alla'-alla'naii, anna kusibahaing. La mendahiä' Dehatanna, anna sika la mendahi petauangku."
17"Dahi, damong untuhu'i pengkerona tau ang dä' mangnginsang, damong unsiba'ba' lelengngi! Pakahaoi pembabe karake. Ponna umpanoa yatoo, ya' la kutahimbokoa'."
18"'La mendahiä' Ambemu, anna la mendahikoa' änä'ku.' Noanto natula' Dehata, To Handang Ma'kuasa."