Alkitab Mobile SABDA
[VER] : [ARALLE]     [PL]  [PB] 
 <<  Efesus 5 >> 

1Dinoa aka' mendahimokoa' änä' pakamayanna Puang Alataala, dahi la pahallua' umpensinnoai pembabena.

2Ingkänna pembabemua' la umbabe sitonda punno pa'kalemu pano di solamu situhu' pa'kalemunna Kristus pano di kita'. Puhang umbeho Kalaena dipatei mendahi mesa penombaang bomammi' di olona Puang Alataala aka' kita'a'.

3Dioa' dio petauannamokoa' Puang Alataala ang napamasero. Dahi ingkänna pembabe karake noanna: ungngindä'-indä' pa'bannetauang, ma'kahupa-hupa pembabe tasampa' anna kamailuang, dasi'da-si'dai la sihatang ditula', londonang la umbabe yaling di alla'-alla'mua'.

4Noa tunne' dakoa' la sihatang umpasohong tula' tahuhu, tula' takekuna anna ingkänna tula' tasampa'. Ampo' ang pahallua' untula' dianto pa'kuhhu'sumanga'ang dai' di olona Puang Alataala.

5Pehingngii liuia' indee: ang ungngindä'-indä' pa'bannetauang, ang membabe tasampa' anna ang mailu di doi', tau ang si membabe noa lolo yatoo dai la ungngala taha yaling di Kapahentaanna Kristus anna Puang Alataala. Aka' yato ang umpihki' supu kalaena supung umpenombai kaha-kaha di lino.

6Madaka manahpakoa' andana nabulingngikoa' tula'na tau ang si ma'tula' takekuna. Aka' ingkänna pembabe ang noa yatoo umpakende' aha' käyyänna Puang Alataala pano di tau ang dai mantuhu'i pahentana.

7Dahi dasi'da-si'daia' la mala umbea inaha yato ingkänna tau ang noa.

8Aka' dolu yaling toukoa' dio di kamalillingang bahtu' mala dioatee napunnoikoa' kakarakeang, ampo' dinoa yalimmokoa' di kamabayaang aka' kasikenteammua' Dehatanta. Dahi la membabekoa' umba noa ang sihatang nababe to yalimmi di kamabayaang.

9Aka' kamabayaang dianto naongei kende' supung ang mapia, maroho anna tahpa'.

10Anna la umpeäng toia' lalang anna malai ungnginsang manahpa umba kahang pembabe ang la umpamasannang inahanna Dehata.

11Daa untuhu'ia' pembabe takekuna sinnoa ang si nababe to malilling, ampo' diare' la pahallua' umbelängngi kakarakeanna yato pembabe ang noa.

12Aka' yato pembabe, ang si biasa nababe membuni tau karake, moi ditula' kale mepakasiling.

13Ampo' ingkänna yato pembabe karake la malesong pole' diita ke napatandaammi pembabe mapianna tau ang yaling di kamabayaang.

14Aka' kamabayaammitoo ang mala umpatandaang ingkänna-ingkänna siamo. Dianto bahtuanna tula' ang naoatee, "Kalehamokoa' ingkämmu to hahe, tuhokoa' sumule di hoi' mai di kamateang! Anna naballoiingkoa' inahammu Kristus."

15Dahi dakai manahpakoa' pembabemu. Daumpensinnoaia' yato babena to maho, ampo' diare' pengkakeaka'koa' dio.

16Pakekuna manahpaia' tempomu umbabe kamapiaang aka' mengeke' dinoa kende' kakarakeang.

17Dakoa' mala mentomaho-maho ampo' la umpeäng manahparea'ne' lalang anna malai ungnginsangnga' umbabe pangngelo'na Dehata.

18Dakoa' mala la nalango angkoro' aka' la nabahakoa' pano di kakarakeang. Ampo' diare' la tontong lolokoa' napunnoi Inaha Masero

19lambi' tontong lolokoa' sipakatoto' umpakende' pampudiang anna penaniang mendehatanna. Popenanikoa' yato pampudiang sitonda kakahsiang anna sangkalebu inaha dai' di olona Dehata.

20Moi aka ang manghoakoa', la tontong lolokoa' ma'kuhhu'sumanga' dai' di olona Puang Alataala Ambeta yaling di sanganna Puang Yesus Kristus, Dehatantaa'.

21La pahallukoa' situhu'i manahpa, aka' umpakeangka'koa' anna umpa'käyyängngi Kristus.

22Ingkämmua' to dipoindo, tuhu'ikoa' muanemu sinnoa untuhu'i Dehata.

23Aka' to dipoambe inang la ungkapalai bahinena sihapang bää' ungkapalai kalae. La pahallu napanoa to dipoambe, sinnoa Kristus ungkapalai ingkänna bätäng kalaena bahtu' dioatee kakalebuanna ingkänna to mampetahpa'. Anna Dia sia tunne' ang mendahi To Pepasalama'na.

24Dahi sinnoa kakalebuanna ingkänna to mampetahpa' untuhu'i Kristus, la noa sia tuntone' to dipoindo pahallu untuhu'i muanena yaling di ingkänna kaha-kaha.

25Ingkämmua' to dipoambe, pakamayakoa' bahinemu sinnoa Kristus umpakamaya kakalebuanna ingkänna to mampetahpa', lambi' umpebeaing Kalaena dipatei anna malaingkea' salama'.

26Nasuhung anna napanoai Puang Yesus Kristus dianto anna ahai napolalang umpasähä' kakalebuanna ingkänna to mampetahpa' mendahi petauanna. Nabaseiingkea' aka' tapetahpa' kara pepaturunna anna aka' ditero'ingkea' ang mendahi tanda dioatee mampetahpa'ingkea'.

27Napanoa anna malai sika mahasa anna bahahsi, dai aha kakarakeanna anna sallaanna naonge anna napapengngolo di Kalaena.

28La noa tuntone' to dipoambe la pahallu umpakamaya bahinena sinnoa undama manahpa bätäng kalaena. Menna-menna umpakamaya bahinena sihapang sia tunne' umpakamaya kalaena.

29Aka' daete' aha tau ang la ungkahiri' bätäng kalaena, ampo' nadama anna nadakai manahpa sinnoa Kristus undama anna undakai manahpa kakalebuanna ingkänna to mampetahpa'.

30Nasuhung napanoa aka' sihapammingkea' bätäng kalaena Puang Yesus Kristus.

31Yaling di Bahtakara Dehata aha tiuki' naoatee, "Dianto anna pahallui muane la umpellei tobaha'na anna sikolungngi bahinena, lambi' la mendahi mesang sibaha."

32Bahtakara yatoo matama bahtuanna lambi' masuhsa dipähäng, ampo' kupasihapang kasikenteanna Kristus anna kakalebuanna ingkänna to mampetahpa'.

33Ampo' yato bahtakara nahoa toukoa' dio. Dahi la pahallu ingkänna to dipoambe umpakamaya bahinena sinnoa ungkalemui kalaena anna la pahallu toe' ingkänna to dipoindo la umpakeangka' muanena.


  Share Facebook  |  Share Twitter

 <<  Efesus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel