Alkitab Mobile SABDA
[VER] : [ARALLE]     [PL]  [PB] 
 <<  Ibrani 3 >> 

1Oa' solasohong, petauanna Puang Alataala ang natambai la dai' di suruka, padiinahammui Puang Yesus, dianto pesuona Puang Alataala ang mendahing Handang Pongkahana Imang yaling di kapampetahpa'ang ang taakui.

2Tontong lolo tuhu'-tuhu'ang dai' di Puang Alataala, ungkähäng yato pengkähängang ang nasuo nababe, sinnoa Nabi Musa dolu ang tuhu'-tuhu'ang ungkähäng pengkähänganna, dianto undakai manahpa Dasanna Puang Alataala.

3Padiinahammui Puang Yesus, aka' sihatang dipakeangka' puha andana Nabi Musa, sinnoa tau ang umpake'de' mesa dasang sihatang dipakeangka' puha andana yato dasang ang napake'de'.

4Ingkänna dasang, ya' inang aha ang mampake'de'. Ampo' ang umpapia asang ingkänna siamo, dianto Puang Alataala.

5Nabi Musa tuhu'-tuhu'ang ungkähäng pengkähänganna, dianto undakai Dasanna Puang Alataala, sinnoa mesa sabua' ang tuhu'-tuhu'ang yaling di dasanna pongkahana. Yato ang nababe Musa mesa pohapanganna ingkänna ang la napalanda' ke dako'mi Puang Alataala.

6Ampo' Kristus nei' tadia sabua' ampo' inang Änä'na Puang Alataala, ang tuhu'-tuhu'ang lolo umpongkahai Dasanna Puang Alataala. Ihsinna yato Dasanna, dianto kita'a' ingkännaingke, solasohong, ponna inahantaa' tontong lolo unghannuang supu Puang Yesus, anna daingkea' bata-bata.

7Dahi, solasohong, pehingngii pepakaenga'na Inaha Masero ang tiuki' dolu naoatee, "Allo dinoa pahallua' umpehingngii kamahanna.

8Daumpamakahha' inahammu dai', sinnoa ang nababe peneneammua' to Israel dolu naonge dai tuhu'-tuhu'ang di hao di ongeang makä'däng anna sika unsändä'i kasa'bara'anna Puang Alataala.

9Naoate Puang Alataala, 'Dianto ang naongei peneneammu unsändä'i kasa'bara'angku moinnakatoo anna sika ungngita asangngi ingkänna ang kupembabeing yaling di uhpa' pulo pahiamanna.

10Dianto anna kukeaha'i aka' daloloi tuhu'-tuhu'ang; daloloi sika untuhu'i yato aka ang kupahentaing.

11Dahi yaling di kakeaha'angku mopindaä', kuoatee: Daliui la kupabei sika mentama yato di ongeang kapehileang ang kupatokaing.'"

12Oa' solasohong, dakaii andana meinaha karakekoa' sinnoa yatoii, lambi' ungkebo'ikoa' Puang Alataala ang tuho.

13Selama ahake' tempo pahallukoa' sipakaleha lolo solamu allo-allo, anna malai dakoa' nabulitu' dosa lambi' meinaha kahha'koa' dai' di Puang Alataala.

14Ponna ke tontong loloingkea' untokei yato kapampetahpa'anta lambi' kapuhaanna, sinnoa mengkalao dolu, ya' la aha kasikenteanta yaling di Kristus.

15Daungkalimpängngii pepakaenga' ang tiuki' naoatee, "Allo dinoa pahallua' umpehingngii kamahanna. Daumpamakahha'i inahammu sinnoa ang nababe peneneammua' to Israel dolu naonge dai tuhu'-tuhu'ang."

16Inde to Israel, ang nabahanang Nabi Musa umpellei Mesir dolu, unghingnging kamahanna Puang Alataala, ampo' katämpä'anna dai sika natuhu'i.

17Dianto anna keaha'i pano yaling yato di uhpa' pulo pahiamanna, lambi' mate asang di hao di ongeang makä'däng aka' akatoo yato dosannaii.

18To Israelmitoo ang nalahe' tula'na Puang Alataala naonge ma'tula'i naoatee, "Daliui la kupabei sika mentama yato di ongeang kapehileang ang kupatokaing." Dai napabei sika mentama yato di ongeang kapehileang, aka' dai sika untuhu'i pahentana.

19Dahi malesong tainsang taoatee dai sika mentama yato di pehileanna Puang Alataala aka' dai mampetahpa'.


  Share Facebook  |  Share Twitter

 <<  Ibrani 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel