Dual Panel1Ingkänna ang mendahi handang pongkahana imang dipillei di alla'-alla'na solana hupatau la umbabe pengkähänganna Puang Alataala. Mengngolo pano di Puang Alataala umpa'tula'ing yato ingkänna tau anna untunu patuhoang ang la umbaya' dosanna tau sibaha umbaha penombaang senga'.
2Aka' mesa handang pongkahana imang dianto hupatau biasa, ya' si aha kamalammaanna. Dianto anna sika ungkalemui to madosa ang dake' ungnginsang lalang ang tahpa', aka' nainsang umba noa kamalammaanna.
3Dahi, aka' malamma toe', dianto anna pahallui umpopenomba penombaang umbaya' dosa kalaena. Dai la umbaya' supu dosanna hupatau senga', ampo' moi dosa kalaena.
4Anna dai aha ang ungngängkä' kalaena mendahi handang pongkahana imang, pahallu napillei anna naängkä' Puang Alataala la ungkähäng inde pengkähängang, sinnoa ang dahi pano di ta Harun dolu.
5Noa tunne' Kristus, dai ungngängkä' Kalaena mendahi Handang Pongkahana Imang, ampo' Kalaena Puang Alataala ang mangngängkä' naoaintee, "Dionto Änä'ku. Mengkalao dinoa umpoambemä'."
6Yaling di sallaoang ang senga' naoainte Puang Alataala, "Dionto Imang lambi' sapano-panona, sinnoa siang Melkisedek dolu."
7Naonge Puang Yesus anna tohhoi yaling done inde di lino ma'sambayammi anna mehumala'i sitonda dumuseng malau dai' di Puang Alataala. Nainsammi naoatee Puang Alataala ma'kuasa anna mala nalahpa' di hao mai di kamateang, ampo' dai naaku untuhu'i pampemala Kalaena, untuhu'i nei' pangngelo'na Puang Alataala. Dianto anna napehingngiing Puang Alataala palaunna.
8Moinnakato anna inang Änä'nai Puang Alataala, ampo' napellaya'i untuhu'i pangngelo'na Puang Alataala yaling di kamadahhaang sinnoa siang hupatau.
9Napanoanto Puang Alataala umpasihatangngi Puang Yesus mendahi Handang Pongkahana Imang ang sundung anna mendahi toi pengkalaoanna kasalama'ang pano di ingkänna tau ang mantuhu'i.
10Anna naängkä' Puang Alataala mendahi Handang Pongkahana Imang sinnoa Melkisedek.
11Oa' solasohong, yaling inde di kaha-kaha mai'dike' ang pemala kutula' mating, ampo' masuhsa kupakalesoingkoa' aka' tengkongkoa' ma'pehingngi.
12Masaemokoa' untindo'i Puang Yesus. Dahi dinoa setonganna malamokoa' umpakuhu tau senga'. Ampo' aka' pahallukangkoa' dipakuhu sala, dahi dake' mala, aka' dake' ungnginsangnga' moi pepakuhunna kasahaniang ang uhuna. Sinnoakoa' änä' malea ang supung sumusuke' aka' dake' mala ungngande andeang kahha'.
13Aka' tau ang sumusuke', ya' maänä'-änä'ke'. Bahtuanna dake' matoho yaling di kasahaniang anna dake' nainsang umpasise'la aka ang mapia anna aka ang tahuhu.
14Ampo' andeang makahha' nei' andeannane' tau ang lobo'mi, bahtuanna tau ang untuhu'i pepakuhu ang tahpa' aka' nainsammi umpasise'la yato aka ang tahpa' anna yato aka ang karake.