Dual Panel1Di hao di Kaisarea aha mesa tau disanga Kornelius, mesa pongkahana tantara ang disanga tantara Italia.
2Inde tau to meimäng anna mahea' dai' di Dehata, noa toi ingkänna sanghapunna. Si ungkalemui to Yahudi ang memase-mase, nabea aka-aka anna si ma'sambayang lolo.
3Pihsang tempo umbai tehte' tallu di maloe makaleso naita sule mesa malaeka'na Puang Alataala tama di dasanna anna ma'karai naoatee, "O Kornelius!"
4Ya' umpahandang-handammi yato malaeka' anna ma'karai sitonda kamahea'ang naoatee, "Kuhingnging Puang!" Naoa bunte yato malaeka', "Ingkänna sambayammu sibaha pa'kalemummu lambi'mi dai' di olona Puang Alataala anna nakalehaimo.
5Dinoa la unsuo sangngaka-sangngaka tau le'ba' pano di Bohto Yope la untambai mesa tau disanga Simon ang si disanga toe' Petrus.
6Tohho di hao di dasanna mesa to ma'dama lollo' ang disanga toe' ta Simon, di hao di behing le'bo'."
7Tahpana mengkapa'da yato malaeka', untambaing derua sabua'na anna mesa tantarana ang handang meimäng yaling di alla'na solana.
8Sika natula'ming ingkänna yato ang naoaing malaeka', mane sika nasuoi pano di Bohto Yope.
9Marondonna umbai tängngä allo, yato to tallu la lambi'mi pano di Bohto Yope. Donetoo dai'mi Petrus di ätu'na dasang ang mahante, ma'sambayang.
10Manono liung anna pemala mande, ampo' mane lella' dipatokaing andeanna, ya' tahpa aha pangngitanna.
11Ungngitang langi' tibilläng anna tuhungngi yaho mai noa kaing maluhhang ang titoke' yato uhpa' sikunna, tihulu' naung di olona.
12Ya' naitang yaling yato di kaing ma'kahupa-hupa olo'-olo' ang uhpa' bihti'na, olo'-olo' ang meme' anna sedansiang ang si dipemalii diande situhu' ada'na to Yahudi.
13Unghingnging kamaha naoatee, "O Petrus, kalehao anna untunui, mane ungngandei."
14Ampo' natimba' Petrus naoatee, "Daine' tora' Puang, aka' mengkalao dahingku dake' aha kuande andeang ang pemali diande."
15Ya' nahingngi bung kapendoanna naoatee, "Ang napemapiaing Puang Alataala, dai mala napemalii hupatau."
16Pentallung nasulei ma'tula' noa, mane tiängkä'i sumule dai' di langi' yato kaing.
17Lella'ke' pusa' Petrus umpihki' yato kalemba'anna ang naita, ya' sulerang yato to tallu ang nasuo Kornelius di hao di baba tahämpä' dasanna aka' haling napekutanaing yato dasang.
18Ya' ungkutanaing tau yaling yato di dasang naoatee, "Diangka inde dasang ang si naongei Simon ang si disangai toe' ta Petrus?"
19Lella' loloke' napadiinahanna Petrus yato ang puha naita, ma'kararang Inaha Masero naoatee, "O Petrus, aha tallu tau sule mampeängngo.
20Tuhummo naung anna le'ba'koa' sibaha. Daumpamatingngii inahammu moinnakato ungnginsang ungngoatee tadia to Yahudi anna ungngangka' kärähko', aka' Kodi' ang mansuo sule inde tau."
21Ya' tuhummi Petrus naung anna ma'karai pano yato di tau naoatee, "Kodi'mitoo indee ang umpeängnga'. Aka pahtuyummu sule?"
22Natimba'mi naoatee, "Pesuonaang Kornelius, mesa pongkahana tantara ang meimäng anna ang mahea' dai' di Puang Alataala anna ang napakeangka' to Yahudi. Puhang napa'tula'i mesa malaeka'na Puang Alataala nasuo umpapetambaio pano di dasanna, anna malai nahingngi pa'tula'mu."
23Ya' naoamintee, "Dai'koa' di dasang aka' la dinneingkea' ma'bengi." Tahpana mabaya kalehang anna sika mengkalaoi sibaha yato tau ang mantambai anna sangngaka-sangngakake' to Yope ang mampetahpa' naposola.
24Marondonnai lambi'ing pano di Kaisarea, ya' ullambi'mi Kornelius sibaha sanghapunna anna sangngaka-sangngaka solana ang natambai lella' mangngempei.
25Sulena Petrus natammuing Kornelius anna malimuntu'i di olona.
26Ampo' tahpa napake'de' Petrus anna naoaintee, "Ke'de'o, aka' kodi' mesa touä' ko tau biasa."
27Lella' sipa'tula'-tula', mentamang Petrus di dasanna Kornelius, ya' ullambi'mi mai'di tau tihimpung.
28Ya' ma'karang pano yato di tau mai'di naoatee, "Puha ungnginsangnga' ungngoatee, napemalii ponala to Yahudi la mempako pano di tau ang tadia to Yahudi, londonang la tama di dasanna. Ampo' puhamä' napaitai anna napa'tula'i Puang Alataala dä' la mala ungngoainte tau: karake bahtu' dai masero.
29Dianto anna damä' mahea' sule dinoa. Dahi la kukutanaikoa' dinoa: Aka suhunna anna untambaiä'?"
30Natimba'mi Kornelius naoatee, "Uhpa'mi allona dinoa, umbai tehte' tallu maloe, lella'ä' ma'sambayang yaling di dasang. Ya' tahpa ahang mesa tau ke'de' di hao di oloku makähhäng porehana
31napa'karaiä' naoatee, "O Kornelius, nahingnging sambayammu Puang Alataala anna nakalehaio aka' pa'kalemummu pano di to pemase-mase.
32Suoi sangngaka-sangngaka tau le'ba' pano di Yope la untambai mesa tau disanga Simon ang si disanga toe' ta Petrus. Tohho di hao di dasanna mesa to pa'dama lollo', ang disanga toe' Simon, si di hao di behing le'bo'.
33Dianto anna tahpa kusuong inde tau napellambi'io. Ya' sulemo dinoa sibaha kamasannangang inaha. Dinoa ma'mesamang inde di hao di olona Puang Alataala la umpehingngii tula'mu ang nabeao Dehata."
34Ya' napahtummi Petrus ma'tula' naoatee, "Setonganna mane kuinsang si'da pole' dinoa kuoatee, Puang Alataala dai umpasisenga'-senga' hupatau.
35Aka' ingkänna tau done inde di lino ke mahea'i dai' di Puang Alataala anna umpembabeing kamapiaang, natahimbo asang Puang Alataala.
36Dianto indee Bahtakaranna Puang Alataala ang puha napesuoi dipalambi' pano di kami' to Israel, Bahtakara ang umpepainsangnging kamalinoang yaling di Puang Yesus Kristus, Dehatanna ingkänna ma'hupatau.
37Ungnginsammia' ingkänna ang puha nababe Puang Yesus yaling di Yudea napahandu' di hao di Galilea naonge puhannai pantero'ang ang napepainsangnging Yohanes.
38Yato Puang Yesus to Nazaret puha nalanti' Puang Alataala anna nabea Inaha Masero anna kakuasaang. Ungnginsang toia' Puang Yesus si unsamba bohto umbabe kamapiaang anna umpabono' ingkänna to napentamai setang aka' naposolai Puang Alataala.
39Anna kami'mitoo sa'binna ingkänna yato ang puha nababe yaling di Yudea anna Yerusalem. Sika natoke' anna napateii yaho di kayu sitambeng.
40Yaling di allo katallunna napatuho sumule Puang Alataala mane napatandaangngi pano di hupatau.
41Dai dipatandaang pano di ingkänna tau, ampo' supung pano di kami' ingkänna sa'binna ang puha napillei Puang Alataala. Anna sibahaang Puang Yesus mande puhanna tuho di hoi' mai di alla'na to mate.
42Nasuoang naoatee, 'La umpepainsangngingkoa' Kaheba Mapia anna unsa'bii pano di ingkänna tau ungngoatee, Dianto ang puha natuho Puang Alataala mendahi To Panghohto'na to tuho anna to mate.'
43Dianto ang nasa'bii ingkänna nabinna Puang Alataala naoatee, 'Menna-menna umpetahpa' Puang Yesus la diampungngi dosanna yaling di sanganna.'
44Lella' ma'tula' Petrus, ya' napentamaing Inaha Masero ingkänna ang umpehingngii yato kasa'biang.
45Ingkänna to Yahudi ang mampetahpa' ang naposola Petrus sule, sika tungke'du' asang ungngita Inaha Masero napasule Puang Alataala moi pano di tau ang tadia to Yahudi.
46Nainsang aka' sika nahingngi umpake ma'kahupa-hupa basa pengkähänna Inaha Masero sibaha umpamatande Puang Alataala. Ya' naoante Petrus,
47"Inde mai tau untahimbong Inaha Masero noa kita'a', dahi la ahakake' tau la mallaba'i ke ditero'i umpake uhai?"
48Ya' nasuong Petrus anna malai sika ditero' yaling di sanganna Puang Yesus, To Dilanti' la Mepasalama'. Puhai yatoo, sika malaung pano di Petrus anna malai tohhoke' sangngaka-sangngaka allona sibaha.