Dual Panel1Inde Paulus unnio'-nio'mi yato To Mahkeada' anna ma'karai naoatee, "O ingkännakoa' solasohongku, lambi' allo dinoa tontong loloke' masero inahangku di olona Puang Alataala."
2Lambi' yato Ananias, ang handang pongkaha imang, tahpa unsuo siang yato tau ang ke'de' di hao di behinna Paulus la natampiling.
3Ma'karang Paulus naoatee, "Puang Alataalarang ang la mambala' inde pembabemu, aka' si umpatandaangngo kalaemu boheng to masero. Anna mohko'o done indee umpahehsaä' situhu' pepakuhunna Musa, ampo' setonganna dai situhu' pepakuhunna Musa inde unsuoo tau natampilingngä'."
4Ya' naoaminte tau ang di hao donetoo, "Aka boi anna umbali-balio handang pongkaha imanna Puang Alataala?"
5Natimba'mi Paulus naoatee, "O ingkännakoa' solasohongku, dai kuinsang kuoate handang pongkahana imang. Aka' setonganna aha tiuki' naoatee, 'Daa umpasohong kara tamendiada' pano di pongkahamu.'"
6Ampo' nainsang Paulus naoatee, yaling di alla'na To Mahkeada' aha to Saduki anna aha to Farisi ang dai sinnoa kapampetahpa'anna. Dianto anna ma'karang napekäyyängngi naoatee, "O ingkännakoa' solasohongku, kodi' mesa touä' ko to Farisi anna änä'na touä' to Farisi. Ampo' dihohto'ä' aka' umpetahpa'ä' aha katuhoang sumule di hoi' mai di kamateang."
7Tahpana puha ma'kara, ya' kende' siarang kasiteläng-telängang yaling di alla'na to Saduki anna to Farisi. Lambi' siba'di-ba'di yato to pa'limbo.
8(Aka' to Saduki nei' si naoatee, "Dai aha katuhoang sumule di hoi' mai di kamateang; dai aha malaeka' anna anitu." Ampo' to Farisi napetahpa' asang nei'.)
9Dianto anna tuhtuammi siba'di-ba'di. Sangngaka-sangngaka to pampakuhu ada' ang mentama di kakalebuanna to Farisi tahpa sika keaha' naoatee, "Setonganna dai aha kilambi' kasalaanna inde tau, aka' umbai aha anitu bahtu'raka malaeka' ang mampa'tula'i."
10Tuhtuammi pole' dahi kasiteläng-telängang käyyäng, ya' mahea'mi yato kapalana tantara aka' naoatee umbai la unsihui'-hui'i Paulus. Lambi' unsuo tantarana sitonda kabahaniang ungngala Paulus tama di alla'-alla'na tau, anna nabahai pano di ongeang tantara.
11Pihsananna bengi, ya' suleng Puang Yesus ke'de' di behinna Paulus anna naoaintee, "Pamatohoi inahammu, aka' umba noa kabahaniammu yaling done inde di Yerusalem unsa'bii didiona Kalaeku, la umpanoa tunne' le'ba' mendahi sa'bingku sau di Roma.
12Tahpana mabaya, la'bi uhpa' pulo to Yahudi umpakamesa tula'na anna mopindai naoatee, "Dai tau aha la mande bahtu' menu' ke dake' tau hali umpatei Paulus."
13(23:12)
14Le'ba'ing umpellambi'i ingkänna kapala imang anna setobaha'anna to Yahudi anna naoaintee, "Puhamang umpakalebu tula'ki' anna mopinda kioatee, 'Dai tau aha la mande bahtu' menu' ke dake' tau hali umpatei Paulus.'
15Dahi pa'mesakoa' ingkänna To Mahkeada' anna umpalaui pano di kapala tantara, ke la malai umpapengngolo sala bou Paulus tama di pa'limboammua', anna dipengkalesoi boi kaha-kahanna. Ya' malang pole' kiahung anna kipateii naonge dake' hali lambi' tama di pa'limboammua'.
16Ampo' nahingngi kuhena Paulus, änä'na siullu'na ang bahine, naoate la diahung, ya' le'ba'mi pano di ongeanna tantara anna natula'ing Paulus.
17Lambi' Paulus untambai mesa pongkahana tantara anna naoaintee, "Posolai inde änä' pano di kapalana tantara aka' aha ang la pahallu natula'ing."
18Ya' le'ba'mi umposola yato änä' pano. Tahpana silambi' naoamintee, "Natambaiä' Paulus yato ang ditahungkung naoate, 'Laoo posolai inde änä' umpellambi'i kapalana tantara aka' aha pahallu la natula'ing.'"
19Pihsananna inde kapala tantara untehteng yato änä' pano di behinna ongeang tantara anna nakutanaii naoatee, "Aka la untula'ingkä'?"
20Natimba'mi yato änä' naoatee, "Mai'di to Yahudi umpakamesa tula'na la napalauio anna malai marondong umpapengngolo sala bou Paulus pano di ingkänna To Mahkeada' la dipengkalesoi bou are' kaha-kahanna.
21Ampo' kalemuiä' anna dai la umpatiolai aka' la'bi uhpa' pulo tau ang la mangngahung anna la umpatei Paulus. Puhang umpakalebu tula'na anna mopinda naoatee, dai are' la sika mande bahtu' menu' ke dake' hali umpatei ta Paulus. Supurang tula'mu naempei."
22Ya' unsuong yato änä' sumule ampo' naoaintee, "Supure' indee, dasi'da-si'da la mala untula' pano di tau senga' moi poro la menna."
23Mane untambaii derua pongkaha tantara anna napa'tula'i naoatee, "Patokaia' dongngatu' tantara aka' la naung di Kaisarea umbai tehte' kamehsa dinoa di bengi. Posolaia' pitumpulo to poarahang anna dongngatu' to podoke.
24Patoka toinne' Paulus sangngaka-sangngaka arahang sakeang anna malai napasibala'-bala', anna umposola manahpaia' pano di Tuambahsa' Feliks."
25Ya' umpapiang suha' inde kapalana tantara naoatee,
26"Kodi' Klaudius Lisias umpalambi' salama' mating di dio, Tuambahsa' Feliks ang kupakeangka'.
27Inde tau nasahka to Yahudi la napatei. Ampo' tempona la napatei, ya' sulemang sibaha tantara kilaba'i anna malai nalahpa' aka' kuhingngi dioate to Roma.
28Anna malai diinsang aka suhunna anna ditanda'i, ya' kuposolang pano di To Mahkeada' Yahudi.
29Ya' kuinsammi pole' nasuhung ditanda' aka' sika naangka' untehkai pepakuhunna Nabi Musa. Ampo' samai yato ang ditanda'ing dai aha suhunna la dipatei bahtu' ditahungkung.
30Anna dioaingkä'tee aha kamesaanna to Yahudi mopahtuyu la napatei, dianto anna kusuo siang napellambi'io. Mane kusuo toine' ingkänna ang mantanda' napellambi'io anna natula'ingko aka suhunna anna napanoai."
31Ya' ungngalang Paulus yato tantara situhu' ang dipahentaing, anna naposola bengii pano di Antipatris.
32Pihsananna mabaya, ingkänna to poarahang anna Paulus dipabei umpatahhi' pellaoanna. Ampo' yato ang dai moarahang sumulene' pano di ongeang tantara.
33Tahpana lambi' naung di Kaisarea yato ingkänna to poarahang, nabeho siang yato suha' kamalesoang sibaha Paulus pano di tuambahsa'.
34Puhai nabata yato suha' ungkutanaing Paulus naoatee, "Poropensi aka ungngongei?" Naoantee Paulus, "Di haoä' mai di Kilikia."
35Ya' naoa bumintee, "La kupahehsa kaha-kahammu ke suleing yato ang mantanda'o." Mane unsuoi Paulus pano di dasanna tomaraya ang disanga Istana Herodes anna ditähängngi.