Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 24 >> 

1Tahpana limai allona, ya' suleng handang pongkahana imang Ananias sibaha sangngaka-sangngaka setobaha'anna to Yahudi anna mesa ang manähäng umpahehsa kasalaanna tau ang disanga Tertulus. Sika umpellambi'i tuambahsa' anna natula'ing aka suhunna anna ditanda'i Paulus.

2Ditambaing Paulus mengngolo pano di Tuambahsa' Feliks, ya' napahandu'mi Tertulus untula' pantanda'na naoatee, "O Tuang Feliks ang kipakeangka', aka' pengkähämmu anna kamanähängammu lambi' tontong loloang unsa'ding kamasannangang, anna mai'di aka-aka ang dahi lambi' tuhtuang mapia bohtoki'. Dianto anna moi umba kiongei, tontong loloang ma'kuhhu'sumanga' mating.

3(24:2)

4Ampo' andana mai'di tempomu untibe, kupalau anna malai sa'bara'o sämpäi' umpehingngii inde tula'ku.

5Manahsa inde tau mendahi hasung aka' umbabe lolo kasiba'di-ba'diang tama di alla'-alla'na ingkänna to Yahudi yaling inde di lino. Anna mesa to pambahanang yaling di kakalebuanna to Sahani.

6Anna puhang nasändä' ungkarakei kamaseroanna Dasang Ada'na Puang Alataala. Diantoo suhunna anna kisahkang [aka' la dihohto' situhu' ada'ki'.

7Ampo' sule kapalana tantara ang disanga Lisias naala sitonda kabahaniang di hao mai di kami'.

8Mane unsuoi ingkänna to mantanda' mengngolo mating.] Ponnatoo ke umpahehsang yato kaha-kaha, ya' ungnginsammi suhunna anna kitanda'i."

9Noa tunne' to Yahudi nasa'bii naoatee, "Yato tula'na Tertulus didiona pembabena Paulus tahpa' si'da."

10Pihsananna yato tuambahsa' umpamansiming Paulus napabei ma'tula'. Ya' ma'tula'mi naoatee, "Kuinsang kuoatee masaeng ungngolaang si unghohto' kaha-kaha yaling inde di bohto. Dianto anna mahasa liung inahangku aka' dä' la malaya' umpamaleso kaha-kahangku mating di olomu.

11Mala umpengnginsangngi aka' dake' la'bi sampulo derua allona ang puha anna maoä' ma'sambayang dai' di Yerusalem.

12Anna dä' aha nalambi' tau lella' siteläng bahtu' umpaaha kakarakeang, noa yaling di Dasang Ada'na Puang Alataala, noa toi tama di pa'sambayangang bahtu' pano di ongeang senga' yaling di bohto mahoa'.

13Datoi mala napamaleso yato ang sika natanda'ingkä' dinoa.

14Ampo' setonganna kuakui mating: Kodi' umpenombaiä' Puang Alataala ang napenombai toe' neneki', situhu' Lalanna Puang Yesus ang sika nasangai lalang ang sala. Anna kupetahpa' toi ingkänna yato ang tiuki' yaling di pepakuhunna Musa sibaha suha'na ingkänna nabi.

15Sinnoa siamang inde mai tau umpetahpa' touä' ko Puang Alataala kuoatee aha katuhoang sumule di hoi' mai di kamateang, noa pano di tau mapia noa pano di tau karake.

16Dianto anna kupeämmi lalanna anna malai bahahsi inahangku di olona Puang Alataala anna pano di para-parangku ma'hupatau.

17Tahpana sangngaka-sangngaka pahiamanna dä' yaho di Yerusalem, ya' sumulemä' dai' umbahaing doi' ang la napokatuhoang to Yahudi yaling di bohtoku sibaha penombaangku dai' di olona Puang Alataala.

18Lella' kubabe yato yaling di Dasang Ada'na Puang Alataala anna puhangku umpamasero kalaeku, ya' nalambi'mä' sangngaka-sangngaka to Yahudi ang luihao mai di Poropensi Asia. Dai mai'di tau kuposola anna dai aha ang bongnga' donetoo.

19Setonganna diaete' la sika mengngolo mating anna natula'ingko ke ahai suhunna anna natanda'ä'.

20Ampo' pabei tomande'i inde mai tau untula' aka kakarakeangku ang nahingngi di tempona naonge napahehsaä' ingkänna To Mahkeada' Yahudi.

21Ke dai umbai diang sika napolalang napahehsaä' aka' donetoo kuoatee yaling di alla'-alla'na, 'Dihohto'ä' allo dinoa aka' kupetahpa' kuoatee aha katuhoang sumule di hoi' mai di kamateang.'"

22Ampo' aka' nainsang si'da-si'da Feliks didiona Lalanna Puang Yesus, ya' napatohho salake' yato kaha-kaha aka' naoatee, "Suleke' kapalana tantara Lisias mane kualai kabohtuanna inde kaha-kahammua'."

23Mane unsuoi pongkahana tantara untähäng Paulus, ampo' dai la nadahha anna napabei toi nalumba solana nabahaing kapahalluanna.

24Ya' sangngaka-sangngaka allona suleng Feliks sibaha bahinena ang disanga Drusila, mesa to Yahudi. Umpapetambaing Paulus aka' la umpehingngii didiona lalang kapampetahpa'ang dai' di Puang Yesus, To Dilanti' la Mepasalama'.

25Tahpana natula' Paulus didiona ingkänna tau pahallu maroho inaha anna ungkuasai kalaena, anna didiona tempona ingkänna hupatau la ungngolai panghohto'anna Puang Alataala, ya' mahea'mi Tuambahsa' Feliks lambi' naoatee, "Samake'to dolu indee, laomo sumule. Aha buke' tempona mane kupapetambaio."

26Ampo' setonganna Tuambahsa' Feliks umpemitai Paulus la nabea doi'. Dianto anna pemmai'ding si umpapetambai Paulus sipa'tula'.

27Tahpana puha derua pahiama, ya' diängkä'mi Perkius Festus umbala'i Feliks mendahi tuambahsa'. Ampo' Feliks pemala ungngala inahanna to Yahudi, lambi' napabei loloke' ditahungkung Paulus.


  Share Facebook  |  Share Twitter

 <<  Kisah Para Rasul 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel