Alkitab Mobile SABDA
[VER] : [ARALLE]     [PL]  [PB] 
 <<  Kisah Para Rasul 27 >> 

1Tahpana puhang dibohtu la mokahpala'ang sau di Roma, ya' dibehong Paulus sibaha sangngaka-sangngaka to ditahungkung ang senga' pano di Yulius, mesa pongkahana tantara ang disanga tantara Kaisar.

2Dai'mang di mesa kahpala' uhai ang luihao mai di Adramitium la le'ba' ullelengngi sangngaka-sangngaka kahampoang kahpala' uhai di Poropensi Asia. Ya' diang kiongei le'ba'. Anna aha mesa to Makedonia ang luihao mai di Tesalonika disanga Aristarkhus ang mamposolaiang.

3Marondonnai, ya' lambi'mang sau di Sidon. Yato Yulius umpakamaya Paulus lambi' napabei umpellambi'i ingkänna insananna napangngalai kapahalluanna.

4Dia bunto kionge mengkalao mebehing le'bo' lolo kahpala'ki' ungngolai Siprus aka' metammui pepahi käyyäng.

5Puhai kilambang yato le'bo' ang natingngayoi Kilikia anna Pamfilia, ya' lambi'mang sau di Bohto Mira di Likia.

6Donentoo yato pongkahana tantara ullambi' mesa kahpala' ang luihao mai di Aleksandria la lusau di Italia. Ya' diparendemang pano yato di kahpala'.

7Umbai sangngaka allona naola moela'-ela' kahpala'ki' aka' dai mala tilao manahpa. Ya' napahsarang mane malaang undungku'i Knidus. Aka' metammui lolo pepahi lambi' mebehing le'bo' bumang di lau' di Kreta ungngolai behing kalantanang Salmone.

8Masuhsa asangngang ungngolai yato behing le'bo' mane malaang ullambi' mesa ongeang disanga Kahampoang Mapia ang sirungku' Bohto Mahoa' Lasea.

9Ya' masaemang tohho donetoo, lambi' mai'di tempo ang huki. Lehang tunne' allo pa'rame-rameanna to Yahudi ang si dioaintee Allo Sikapiai. Tempona toi tahuhu lolo pepahi, dahi umbai la sumändäingkea' ke umpalaoi tau kahpala'. Dianto anna sika napakaenga'mi Paulus naoaintee,

10"Oa' solasohongku, situhu' pihki'ku ponna la tapatahhi'ia' inde pellaoanta, ya' la ullambi'ingkea' kasumändä'ang anna kahukiang käyyäng. Dai la supung kahpala' sibaha aka-aka ampo' la nalambangngi tuke'ne' sungnga'taa'."

11Ampo' yato pongkahana tantara umpetahpa' puhane' yato ang umpalao kahpala' sibaha puänna kahpala' andana tula'na Paulus.

12Ampo' yato kahampoanna kahpala' donetoo dai mapia diongei tohho ke temponai kamadingingang aka' nahoa pepahi käyyäng. Lambi' mai'di pemala umpellei yato ongeang, umbato ke malai ullambi' kahampoanna kahpala' pano di Feniks ang la naonge tohho masae mangngempe lambi' puha tempona kamadingingang. Inde Feniks mesa kahampoang kahpala' di Kreta si nasala pepahi käyyäng.

13Tempo donetoo pepahi saohko'mi ang luihao mai di tando kaihinna kahpala', lambi' sika nasanga la mala lambi' pano yato di pahtuyunnaii. Ya' unghentung pesangke' anna umpalaoi kahpala'na mebehing le'bo' ang sidungku' Kreta.

14Ampo' dai masae anna suleng pepahi käyyäng tisau yaho mai di kalantanang ang disanga Pepahi Timurlaut,

15lambi' unghoa kahpala'ki'. Ya' dang mala mellao untammui pepahi, lambi' kipabei tomande' nabaha pepahi yato kahpala'ki'.

16Ya' labu lolomang untuhu'i bombang nabaha pepahi, lambi' pano di behing le'bo' ang dai nahoa liu pepahi di mesa kalantanang saohko' ang disanga Kauda. Lambi'ang pano masuhsa asammang aka' mapahhi' dihentu tama di kahpala' yato lopi ang si dipake di hao mai di kalantanang.

17Tahpana puha dipadai' di kahpala' yato lopi, dipamatoto'mi yato kahpala' diuta'i umpake kondaling. Mane dipatuhungngi yato layarna kahpala', aka' naoate yato ang yaho, 'anna malai mähäng supu,' aka' mahea' la titoko' pano di bunging ang mentanete di hao di le'bo' sirungku' Sirtis.

18Marondonna boi ditibeing bahaang naung di le'bo' aka' käyyäng liu pepahi unghoro kahpala'ki'.

19Tahpana allo katallunna sika untibeing pole' pangkahka' kahpala'na.

20Aka' sangngaka-sangngakang allona tala bintämmi tala mata allong diita anna tuhtuang masahhu' pepahi käyyäng, mepakahea'i lolo. Ya' daasammang hannu la salama'.

21Tahpana masaeng dai sika mande yato tau, ke'de'mi Paulus yaling di alla'na naoatee, "Oa' solasohong, ke la tula'kung dituhu'i naonge kuoaitee, 'Daingkea' la umpalao kahpala'ta umpellei Kreta,' inang dai la aha kasumändä'ang anna daiingkea' la huki.

22Ampo' indee yalingngingkea' di kamasuhsaang, kupahentakoa' anna umpamatoto'koa' inahammu: daingkea' aha la pa'da, supung inde kahpala'.

23Aka' sambengi napensiitaiä' malaeka'na Dehata ang kupenombai anna ang mampuängngiä', ke'de' sule di behingku

24anna naoaitee, 'O Paulus, daummahea' aka' inang la sitammuo Kaisar. Anna ingkänna inde tau ang yaho di kahpala' dai aha la maaka aka' dio nakalemui Puang Alataala.'

25Ingkännakoa' solasohongku, diantoo suhunna anna kuoaingkoa'tee: Pamatoto'i inahammu aka' kupetahpa' Puang Alataala anna kuinsang kuoatee inde ang natula' dai mala tala dahi.

26Ampo' moinnakato noa, inde kahpala' la titoko' pano di behinna mesa kalantanang."

27Kasampulo uhpa'na benginna tontong lolokang napalupano napaluihao mai pepahi di hao di Le'bo' Adria. Tahpana tängngä bengi nasa'dimmi tau ang mengkähäng yaling di kahpala' naoate marungku'mi kalantanang.

28Ya' umpatuhummi batu naung di le'bo' mane nahentui di hoi' mai anna nadahpaii. Ya' dompulo dahpana malimbenna. Napalao bumi sämpäi' mane nadahpai sala boi. Ya' sampulo limaranne' supu dahpana malimbenna.

29Ampo' mahea'ang la tihambi pano di batu, ya' dipatuhummi pesangke' uhpa' naung di bii'na kahpala' anna kipabei tomande'i lella'ang umpemitai kamabayaang.

30Ingkänna ang mengkähäng yaho yato di kahpala' sika umpeäng ahkalang anna malai lumumpa' umpellei kahpala'. Sika umpatuhummi lopi naung di le'bo' boheng la le'ba' umpatuhung pesangke' tandoi bää'na kahpala'.

31Ampo' ma'kara Paulus pano yato di pongkahana tantara sibaha änä' buana naoaintee, "Ponna la le'ba'i inde pano ang si mengkähäng yaling di kahpala', ya' la tallang asangkoa'."

32Ya' nahahta'i siang tantara yato pesangke'na lopi anna napabei tomande'i le'ba' mähäng.

33Tahpana la mabaya unsuong yato tau mai'di Paulus mande naoaintee, "Sampulo uhpa'mi benginna untähängngingkea' kamanonoanta. Daingkea' aha mande, supung makaludärä' babuataa' ungngempei aka ang la dahi.

34Ampo' kupainsangngikoa' anna mandekoa' andamu mate, aka' dai aha la dondong moi poro bulu sallamba'mua'."

35Puhai ma'tula', ungngalang roti anna nakuhhu'sumanga'i dai' di Puang Alataala di hao di olona yato tau mai'di, mane nabika-bikai sika naande.

36Ya' sika suhakang pole' inahanna aka' mandeng.

37Ingkänna yato ang yaho di kahpala' dongngatu' pitumpulo unnung dia asanna.

38Tahpana bohong, sika untibeing gandum ang yaho di kahpala' naung di le'bo' anna malai mahingang kahpala'.

39Ya' mabayannai sika ungngitang kalantanang mahante di behinna. Moinnakatoo dai nainsang sanganna, ampo' sika naoatee, "Umbato ke malai dipadai' di kalantanang inde kahpala'."

40Dihahta'ing yato pesangke'na uhpa' anna dipabei tomande'i limmi' yato pesangke'. Puhai, dibuhkeing pesangke'na bose anna dipadai'i layar di olona anna malai nabuhsu' pepahi lupano di kalantanang.

41Ampo' yato kahpala' titumbu bää'na di bunging ang mentanete anna bii'na natallangngine' bombang käyyäng.

42Ya' pemalang yato ingkänna tantara la umpatei ingkänna to ditähäng andana le'ba'i mengkalahsu' molangi.

43Ampo' sika nalaba'i yato pongkahanaii aka' pemala umpasalama' Paulus. Umpahentang yato tau mai'di naoatee, "Ingkänna ang nainsang molangi, pendolumokoa' naung mengkahtibe anna molangikoa' bete' di kalantanang.

44Anna ang dai nainsang molangi pakekoa' papang bahtu'raka pangkahka'na kahpala' umpolopia' lambang." Ya' kipanoantoo anna mala asangngang salama' lambi' bete' di kalantanang.


  Share Facebook  |  Share Twitter

 <<  Kisah Para Rasul 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel