Alkitab Mobile SABDA
[VER] : [ARALLE]     [PL]  [PB] 
 <<  Kolose 3 >> 

1Puhamokoa' dipatuho sumule sibaha Kristus. Dahi pahallua' umpayaling di inahammu aka ang dipatoka yaho di suruka, ang naonge Kristus mohko' di tando kuananna Puang Alataala, ongeang kakeangka'ang.

2Pihki' loloi kaha-kaha ang aha kasikenteanna suruka. Daumpihki' loloi ang sikente inde lino.

3Aka' mala dioatee: puhamokoa' mate naonge anna matei Kristus, anna dinoa dake' tandaang katuhoammu ang la noa si'da, ampo' tuhomokoa' sikente Puang Alataala sinnoa Kristus.

4Pengkalaoanna yato katuhoammu ang si'danna dianto Kristus. Ponna lambi'mi tempona la umpalanda' Kalaena dako', ya' la landa' tumokoa' dio sibaha yaling di kamatandeanna.

5Dahi aka' puhamokoa' dipatuho sumule sibaha Puang Yesus Kristus, dianto anna pahallumokoa' umpa'dai yato pembabemu ang mentolinona sinnoanna: ungngindä'-indä' pa'bannetauang, umbabe kamahoang, pemala samangkamahoinna, pampemala didiona kakarakeang ang senga' anna kamailuang, aka' tau ang mampanoa yatoo, ya' hapang nei' umpenombai yato aka ang napemala.

6La keaha' liu Puang Alataala pano di hupatau ang membabe tasampa' sinnoa ingkänna inde kaha-kaha ang puha ditula', lambi' la sika natahungkung.

7Dolu membabe noa toukoa' dio, naonge anna untuhu'ikangkoa' pampemala mentolinona.

8Ampo' dinoa, pahallu umpa'dai ingkänna yato kaha-kaha. Daumpa'keaha'ang, daunsipaonge-ongei inaha, daumpakahiri', dauntula' tahuhu solamu anna daumpa'kara tahuhu.

9Damong si umpa'loseng-loseng pano di solamu, aka' samai kau'mu ang dolu puhangnga' umpa'dai.

10Dinoa untahimbomokoa' katuhoang bakahu yaho mai di Puang Alataala, To Metampa. Nabakahui lolo inahammu anna malaia' tuhtuang ungnginsang si'da-si'da lambi' la umpensinnoia' pengkerona.

11Dahi dang aha aka-aka ang mampasisenga' di alla'na to Yahudi anna ang tadia to Yahudi, ang si disangai tau ang motille anna ang dai motille; noa toi tau ang mahsikola malängkä' anna tau ang dai mahsikola; noa toi sabua' anna to beba', aka' Kristus ang handang pahallu anna Dianto ang tuho yaling di ingkänna kalaetaa'.

12Aka' napakamayakoa' Puang Alataala anna puhamokoa' napillei anna napatani mendahi petauanna, dahi pepaitaing pa'kalemu, kamarota'ang, kamahempo'ang inaha, kamalunä'ang inaha, anna kasa'bara'ang.

13Sa'bara'koa' pano di solamu, daunsipaonge-ongei inaha, ampo' siampungngikoa' mesa anna mesa umba noa naampungngi toukoa' dio Puang Alataala.

14Anna ang handang pahallu dianto pa'kalemu, aka' mala mepopa'mesa anna umpasundung ingkänna yato kaha-kaha mapia.

15Natambaimokoa' Puang Alataala mendahi sihapang mesa bätäng kalae yaling di kasikenteammua' sibaha Puang Yesus. Dahi patontongngia' kamesaammu anna kamasahkeammu ang nabeakoa' Kristus. Anna pa'kuhhu'sumanga' toukoa' nei'.

16Bahtakaranna Kristus pahallu la umpatama di inahammu lambi' umpunnoi pihki'mu. Pahallu sipakuhu lolokoa' anna sikambahoingkoa' mesa anna mesa situhu' kakeaka'ang ang sundung. Popenanii pampudiang anna penaniang ang napaturuingkoa' Inaha Masero. Penaniing sitonda ma'kuhhu'sumanga' dai' di Puang Alataala.

17Samai tula' anna pembabemua' dipembabeing yaling di sanganna Puang Yesus. Anna penau-naukoa' dai' di Puang Alataala, Ambeta, aka' Puang Yesus.

18Oa' ingkämmu bahine, tuhu'ikoa' muanemu, aka' inang sihatang pano di bahine ang to pentindo'na Puang Yesus.

19Oa' ingkämmu muane, pakamayakoa' sangkolummu anna daa ungkamasahhu'i.

20Oa' ingkämmu änä', tuhu'i pahentana to baha'mu di ingkänna siamo, aka' dianto ang umpamasannang Puang Alataala.

21Oa' ingkämmu to dipoambe, daumpamapi'di'i inahanna änä'mu andana manahoi inahanna.

22Oa' ingkämmu ang diposabua', tuhu'ii pongkahamu yaling inde di lino. Daa la supung membabe mapiao ke di olonai aka' pemalao napudi. Ampo' diare' tuhu'ii sitonda unnä' inahammu sibaha umpakeangka'koa' Puang Alataala.

23Dia siamo ang umbabea', pahallu ungkähäng sitonda unnä' inaha sihapang Puang Alataala ang umpengkähängngingnga', tadia hupatau.

24Aka' ungnginsang, la untahimbo mana' ang la mendahi sahomu dako' yaho mai di Puang Alataala. Aka' Kristus, Dehatammu, Dianto pongkahamu ang setonganna.

25Menna-menna ang umbabe kasalaang, dia toboe' ang la untahimbo tahungkunna, aka' Puang Alataala dai mampasise'la-se'la.


  Share Facebook  |  Share Twitter

 <<  Kolose 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran