Alkitab Mobile SABDA
[VER] : [ARALLE]     [PL]  [PB] 
 <<  Lukas 9 >> 

1Untambaing yato sampulo derua pahsikolana Puang Yesus anna sika nabea kamatohoang anna kakuasaang anna malai sika untalo ingkänna setang anna umpabono' ma'kahupa-hupa korong.

2Anna sika nasuoi mao do umpakaheba Kapahentaanna Puang Alataala anna umpabono' to makorong.

3Naoate pano diii, "Yaling di pellaoammu dakoa' mala kabaha-baha. Moi huntung, moi tas, moi bokung, moi doi', moi kaya' dai dibaha, supung ang menge umpake.

4Anna ponna aha tau mampalempängkoa' tama di dasanna, ya' tohhokoa' di hao lambi' mengkalao boukoa' umpatahhi' pellaoammu.

5Anna ponna dai aha tau ang mampalempängkoa' tama di dasanna, ya' pelleiia' yato bohto anna umpentalahpi'ing tampo ang mendehke' pano di bihti'mu anna malai mendahi pengkakalehaang pano diii. "

6Ya' sika le'ba' si'dang anna maoi do ungkulilingngi ingkänna bohto saohko' lella' umpepainsangnging Kaheba Mapia, anna umpabono' ingkänna to makorong di ingkänna bohto ang naolai.

7Donetoo Tomaraya Herodes, ang ungkapalai Poropensi Galilea, dai hapa' inahanna unghingngi yato ingkänna kaha-kaha ang nababe Puang Yesus. Aha tau ang mangngoatee, "Tuho sumule Yohanes to Pantero' di hoi' mai di alla'na to mate."

8Aha toe' piha tau ang mangngoatee, "Landa' bumi sumule Nabi Elia." Anna aha toe' piha tau ang mangngoatee, "Mesa di alla'na yato senabiang dolu ang tuho sumule."

9Ampo' ma'tula' Herodes naoatee, "Puhanne' kubose'i bää'na ta Yohanes. Dahi menna setonganna inde tau ang manuhu' kaheba mai'di umbabe kaha-kaha ang dikapusa'i?" Ya' pemala liung la silambi' Puang Yesus.

10Tahpana sika sumulei yato sampulo derua pahsikolana Puang Yesus, ya' sika natohodolung pano di Puang Yesus yato aka ang hali sika nababe. Ya' sika natambaing Puang Yesus anna naposolai mendende pano di mesa bohto ang disanga Betsaida, anna malai sika diarang supung ang nasibahaing.

11Ampo' nahingnginna tau mai'di didiona yatoo, ya' sika maong do napelolai. Ya' sika natammui manahpang Puang Yesus anna napaturui didiona Kapahentaanna Puang Alataala anna umpabono' mai'di tau ang pahallu napabono'.

12Tahpana mahammong, ya' sika mellambi'mi pano di Puang Yesus yato sampulo derua pahsikolana anna sika naoaitee, "Suoi indo pano tau mai'di anna malai sika do umpeäng dasang ang la naongei ma'bengi anna andeang ang la sika naande, aka' inde ang taongeia' dianto ongeang ang mahulla-hulla ang makahao umpellei bohto."

13Ampo' sika naoaintee, "Diongnga'tee' mampakande!" Ya' sika mentimba'mi naoatee, "Supung lima roti anna derua bau ang aha dibe'bei. Supunte' ke maoang kialliing inde mai tau mai'di ang la sika naande."

14(Tau ang aha donetoo aha umbai limang sa'bu muane, dake' diihsa' bahine anna änä'.) Ya' ma'tula'mi pano di pahsikolana naoatee, "Suoi ne pano tau mai'di mohko' moko'bong-ko'bongang: sangko'bongang boitoo, ya' aha bung limampulo tau."

15Ya' natuhu'i si'dang yato pahsikolana yato ang napahentaing anna unsuoi yato tau mai'di ma'ko'bong-ko'bong.

16Pihsananna Puang Yesus ungngalang yato lima roti anna derua bau, mane mentongai dai' di langi' menge siang umpalau behe dai' di Puang Alataala. Puhai yatoo, ya' nabika-bikang yatoo mane nabeai pano di pahsikolana anna malai nasusa pano di tau mai'di.

17Ingkänna yato tau ang aha donetoo mampebohoi asang. Puhai sika mande, ya' nahimpung salang pahsikolana yato la'binna ang dang napuha tau. Ya' ke punno salake'ne' sampulo derua baki.

18Pihsang tempo naonge mengei Puang Yesus ma'sambayang namesa-mesa, suleing pahsikolana nalumba. Mekutanang pano diii naoatee, "Situhu' tula'na tau ang unghingngia', nasanga mennaä' are' indee?"

19Sika mentimba'mi naoatee, "Aha ang mansangao Yohanes to Pantero'; aha toe' ang mansangao Nabi Elia; aha toe' piha ang mansangao mesa di alla'na yato senabiang ang aha dolu ampo' tuho sumule."

20Ya' mekutana sala bumi Puang Yesus pano diii naoatee, "Ampo' situhu' dioa', mennaä' Ko indee?" Mentimba'mi ta Petrus naoatee, "Dio, Tuang, To Dilanti' la Mepasalama' ang sule yaho mai di Puang Alataala."

21Ya' sika nalahang si'da-si'dang Puang Yesus anna dai napepainsangnging pano di menna-menna didiona yatoo.

22Mane ma'tula'i Puang Yesus naoatee, "Kodi' inde Änä' to Lino pahalluä' la ungngolai mai'di kamasuhsaang anna dä' natahimbo setobaha'ang, kapala-kapala imang anna to pampakuhu ada' lambi' la dipateiä'. Ampo' yaling di tallu allona la tuhoä' sumule."

23Nalombungngike' tula'na pano di ingkännaii naoatee, "Tau ang la pemala mampentindo'iä' pahallu ungkalimpängngi pangngelo'na toboe' sibaha umbulle kayu sitambeng allo-allo, mane napentindo'iä'.

24Aka' menna pemala umpamahendeng katuhoanna, la bilang mateetee'; ampo' menna ang tontong mampetahpa' moi dipatei aka' Kodi', dianto ang la dipasalama' sungnga'na.

25Aka' dai aha suhunna mesa tau untahongkongngi ingkänna aka-aka ang aha yaling inde di lino ke dasiang la salama' sungnga'na.

26Ponna aha tau ang mampengkasiliingkä' anna umpengkasili toinne' pepakuhungku, la kupengkasili turinte'ne' ke sulemä' dako' sitonda kakuasaangku anna kakuasaanna Ambeku, noa tunne' kakuasaanna malaeka' masero yaho di suruka.

27Kutula'ingkoa' setonganna yalingnga' inde di alla'-alla'mu dinoa aha sangngaka-sangngaka tau ang dai la mate, dolunna la dipahandu' Kapahentaanna Puang Alataala."

28Umbai kahua allona puhanna makara noa yato Puang Yesus, ya' untambaing ta Petrus, ta Yohanes anna ta Yakobus naposola dai' di mesa tanete aka' la ma'sambayang yaho.

29Tahpana menge ma'sambayang, ya' tahpa tirendeng hupanna Puang Yesus anna yato pakeanna mendahi mabusa anna pangngillo'.

30Anna ahai derua tau menge nasipa'karaing, dianto Nabi Musa anna Nabi Elia.

31Indo to deruai umpalanda' kalaena yaling di pesilo kamatandeang, anna ma'tula'i didiona kamateanna Puang Yesus ang mane la dipasundung yaho di Yerusalem.

32Donetoo, yato Petrus anna solana mengene' supu hanne. Tahpana sika tungke'du', ya' ungngitang umba noa kamatandeanna Puang Yesus anna sika naita toe' yato derua tau ang ke'de' di behinna.

33Tahpana la le'ba'mi yato to deruai umpellei Puang Yesus, ya' ma'karang ta Petrus pano naoatee, "O Tuang, masannang liu tau dinne. Umbai mahasa ke umpake'de'i tau bansuli umpopantangnga' simesa: Dio mesa, Nabi Elia mesa anna mesa Nabi Musa." Ampo' noa supu Petrus ang maling ma'tula' noa yatoo, dai pa'kaleha.

34Lella' Petrus ma'tula', ya' tuhummi yaho mai salehu' unsapu'ii, lambi' sika mahea' tahpana nasapu' yato salehu'.

35Ya' kahingngiammi kamaha yaling mai di salehu' ang naoatee, "Dianto inde Änä'ku ang kupillei. Pehingngiia' tula'na."

36Puhanna kahingngiang yato kamaha, ya' inang namesarang supu Puang Yesus. Yato tallu pahsikolana napadiinahanna supu yato kaha-kaha ang dahi donetoo, anna datoi aha natula' pano di moi poro la menna yato ang sika naita.

37Tahpana marondonnaii naonge sika tuhungngi sumule yaho mai di tanete, ya' suleng tau mai'di ullumba Puang Yesus.

38Aha mesa di alla'na yato tau mai'di untambai Puang Yesus naoatee, "O Tuang, kupalau ke la malai do ungngitaingkä' änä'ku, aka' inang dia supu änä'ku.

39Yato änä'ku si pihsa' napentamai setang, lambi' si pihsa' tomande' kakoha-koha anna sikadindi'i kalaena napobua' yato setang lambi' si membuha kale suana. Yato setang semata undahha änä'ku anna noa ang inang dang aha la napellei.

40Puhang kupalau pano di pahsikolamu unghambai yato setang ampo' dai sika mala naalai."

41Ma'tula'mi Puang Yesus naoatee, "Tehtereremokoa' dio indee! Umbarea' dio naola kapampetahpa'ammua' lambi' sähsä' lalangkoa'? La sangngakake' masaena tohhoä'a' yaling di alla'-alla'mu anna sa'bara' ungngoloikoa'? Bahai ne mai yato änä'!"

42Tahpana sidungku'mi Puang Yesus yato änä', ya' tahpa tilumbämmi naung di tampo napobua' yato setang anna sikadindi'i kalaena. Ampo' tahpa nakarahta' Puang Yesus yato setang anna napabono'i yato änä', mane naposolai sumule pano di ambena.

43Aka toiro yato ingkänna tau ang aha donetoo pusa' asang liu ungngita umba noa kakuasaang käyyänna Puang Alataala. Mengeke' yato tau mai'di pusa' ungngita aka ang mane puha nababe Puang Yesus, ya' ma'tula'mi Puang Yesus pano di pahsikolana naoatee,

44"Pehingngii manahpai anna patamai di inahammua' inde ingkänna aka ang kutula', dianto: Kodi', inde Änä' to Lino, la dibehoä' pano di kakuasaanna to lino."

45Ingkänna yatoii dai sika umpähäng yato ang natula' Puang Yesus, aka' dai sika napakalesoing. Ampo' malaya' toe' yatoii napekutanaing umba noa yato bahtuanna.

46Ya' dahing kasibehtaang di alla'na pahsikolana Puang Yesus, unsibehtai menna ang handang keangka' di alla'naii.

47Ampo' nalosa Puang Yesus yato ang menge sika napihki' lambi' ungngala mesa änä'-änä' anna napake'de'i di behinna.

48Anna naoaite pano diii, "Menna ang untammui manahpa änä' saohko' ang sinnoa indee yaling di sangangku, ya' bahtuanna Kodi' siante' natammui manahpa, anna menna ang mantammui manahpaä', ya' bahtuanna Yatoete' ang mansuoä' sule natammui manahpa. Aka' menna-menna ang ungngangka' handang madihoi'ang kalaena yaling di alla'-alla'mua', ya' setonganna diaete' ang handang diangka' mayahoang."

49Ma'tula'mi Yohanes naoatee, "O Tuang, aha kiita mesa tau unghambai setang yaling di sangammu, ya' kisängkäing aka' kiinsang tadia solata ang mentindo' di Dio."

50Mentimba'mi Puang Yesus naoatee, "Daa unsängkäii, aka' menna-menna ang daingkea' mampa'bali, ya' bahtuanna solatarea'tee'."

51Tahpana marungku'mi tempo katiängkä'anna Puang Yesus dai' di suruka, ya' nabohtung la mao dai' di Yerusalem.

52Unsuong sangngaka-sangngaka tau mendolu mao. Sika maoi pano di mesa bohtona to Samaria, aka' sika la umpasadia ingkänna-ingkänna siamo ang la napahallu Puang Yesus.

53Ampo' aka' nainsang yato to Samaria la mao dai' di Yerusalem yato Puang Yesus, lambi' dai sika natahimbo la tohho yaling di bohtona.

54Tahpana naita Yakobus anna Yohanes yato babena to Samaria, ya' mekutanang pano di Puang Yesus naoatee, "O Puang, ungngakuraka ke ma'sambayangngang anna malai tuhung api yaho mai di langi' ungngämpu'i inde mai tau?"

55Ampo' mensaile supu anna nasängkäii.

56Ya' sika maong umpeäng bohto ang senga'.

57Sika umpatahhi'mi pellaoanna. Ya' ahang mesa tau ang ma'tula' pano di Puang Yesus lella' sika mellao naoatee, "La kutindo' lelengngo diamo-diamo ungngola."

58Ampo' natimba' Puang Yesus naoaintee, "Mangngohi aha leänna naongei tohho, anna dansi aha sehänna naongei membanua. Ampo' Kodi' inde Änä' to Lino dai Ko aha ongeangku ang la kuongei tohho mehile bahtu' hahe."

59Nalombungngike' tula'na umpa'tula'i mesa tau senga' naoaintee, "Pentindo'o di Kodi'." Ampo' mentimba' yato tau naoatee, "O Puang, pabeiä' dolu mao do ullamung ambeku. "

60Ampo' mentimba'mi Puang Yesus naoatee, "Pabei tubunne' tau ang mate di mendehatanna do ullamung to matenaii, ampo' dio-dio laoo do pakahebai Kapahentaanna Puang Alataala di umba-umba naongei."

61Ahake' bou mesa tau senga' ma'tula' pano di Puang Yesus naoatee, "La mentindo'ä' di Dio, Puang, ampo' pabeiä' dolu mao umpasa'bi to baha'ku."

62Ampo' natimba' Puang Yesus naoaintee, "Mesa tau ang menge ma'dahkala dai la sihatang ke si mensaile loloi pano di kebo'na. Noa tunne' tau ang pemala mendahi to pentindo'ku dai la kekuna yaling di Kapahentaanna Puang Alataala ke umpihki' loloi katuhoang ang dolu."


  Share Facebook  |  Share Twitter

 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel