Dual Panel1Donetoo suleing yato pahsikolana Puang Yesus mendungku' anna mekutanai naoatee, "O Tuang, mennae' ang handang käyyäng yaling di Kapahentaanna Puang Alataala?"
2Ya' untambaing mesa änä' ang saohko'ke' Puang Yesus anna napake'de'i tama di alla'-alla'naii,
3mane ma'karai naoatee, "Kutula'ingkoa' setonganna ponna dakoa' mengkatoba' anna dakoa' ma'pihki' sinnoa pihki'na inde änä', ya' inang darakoa'te' la tama di Kapahentaanna Puang Alataala.
4Ampo' menna-menna umpadihoi'ang kalaena anna mendahii sinnoa inde änä', dianto ang handang käyyäng yaling di Kapahentaanna Puang Alataala.
5Anna menna-menna ang untammui manahpa mesa änä' ang sinnoa indee yaling di sangangku, ya' setonganna Kodi'ete' yato ang natammui manahpa.
6Ampo' menna-menna ang umpasähsä' lalang moi poro mesa di alla'na inde mai änä' ang mampetahpa'mi di Kodi', dotanne' yato tau ang noa ditoke' batu käyyäng pano di bahokona mane dilimmi'i tama di le'bo'.
7Tilaka si'da-si'da inde lino sibaha pampasähsä'na! Inang la aha loloete' yato to pampasähsä', ampo' tilaka si'da-si'da tau ang mambabe noa yatoo.
8Ponna yato sambali teyyemu bahtu' bihti'mu mandosaio, ya' dotante' umbose'i anna untibei. Aka' mahasa puhane' tamao di katuhoang sapano-panona dai keteyye sambali bahtu' hehpä'o andana tontong aha sibali teyyemu anna bihti'mu ampo' ditibeo tama di api nahaka ang tontong sapano-panona.
9Anna ponna matammu ang mampadahi madosao, ya' dotanne' ungkahohe'i anna untibei. Aka' mahasa puhane' tamao di katuhoang sapano-panona dai kemata sambali andana la kemata sibalio ampo' ditibeo tama di api nahaka.
10Pengkakalehaiia' andana ungngita-ita naungngia' sala' umbannai di alla'na inde mai änä', aka' kutula'ingkoa': aha toete' malaeka'na ang la mampalauing aka siamo pano di Ambeku yaho di suruka."
11[Aka' nasuhung suleä' Kodi' inde Änä' to Lino dianto anna malai umpasalama' tau ang sähsä' lalang.]
12Napatahhi' bumi tula'na Puang Yesus umpake pohapangang naoatee, "Umbane' inde noa situhu' pihki'mu? Ponna aha mesa tau ang aha sangngatu' dombana, anna bulingngi mesa di alla'na yato dombana, darakae' la le'ba' umpellei yato dombana ang kamehsake' pulona kamehsa do metanete leleng undaka' yato dombana ang pa'da?
13Anna kutula'ingkoa' setonganna ponna mala nalambi' sumule yato dombana, ya' la käyyäng puhaete'ne' kakahsianna pano yato di mesa dombana andana pano yato di ang kamehsa pulona kamehsa ang daine' pa'da.
14Noa tuntone' Ambemua' yaho di suruka, dai naaku ke ahai di alla'na inde mai änä' la pa'da."
15Napatahhi' bumi tula'na Puang Yesus pano di pahsikolana naoatee, "Ponna aha solamu umbabe dosa mating di kalaemu, ya' sängkäii ke dang aha manghingngi. Ponna napehingngii yato ang umpakaenga'ing, ya' umpasulentoo pano di lalang ang tahpa'.
16Ampo' ponna dao napehingngii, ya' tambaii derua bahtu' tallu tau senga' anna malai nasa'bii yato pampakaenga'mu situhu' ang tiuki' yaling di Suha' Masero.
17Ampo' ponna ke dabure' umpehingngii yato derua tau ang umposola, ya' palambi'i yato kaha-kahanna tama di alla'na jumaa'. Anna ponna dabure' umpehingngii jumaa', ya' hekengngine' mendahi mesa tau ang dai ungnginsang Puang Alataala bahtu' mesa to ma'kau'-kau' karake.
18Kutula'ingkoa' setonganna aka ang ullahang dai mala nababe tau yaling inde di lino la nalahang toete' Puang Alataala. Anna aka ang ungngangka' marohong yato ang nababe hupatau yaling inde di lino la naangka' maroho toete' Puang Alataala."
19Anna kutula' tukingkoa': ponna aha moi poro deruakoa' yaling inde di lino ang mesa inaha umpalau aka siamo dai' di Ambeku, ya' yato palaummu la natahimboete' Ambeku yaho di suruka.
20Aka' di umba-umba naongei derua bahtu' tallu tau tihimpung yaling di sangangku, ya' di hao tumä'to Koo yaling di alla'-alla'naii."
21Donetoo mendungku'mi Petrus pano di Puang Yesus anna mekutanai naoatee, "O Puang, la lambi' pensangngaka tau ungngampungngi sola ke ahai ang umbabe dosa pano di kalae? La lambi'raka pempitu?"
22Mentimba'mi Puang Yesus naoatee, "Dai, ampo' kutula'ingko ang setonganna dai la lambi' supu pempitu ampo' diare' la lambi' pempitumpulo luhpi' diluhpi' pitu!
23Aka' Kapahentaanna Puang Alataala sihapang mesa tomaraya ang menge umpahehsa indanna ingkänna sabua'na.
24Tahpana napahandu' yato pampahehsaanna, ya' dipapengngolong pano mesa sabua' ang mai'di si'da-si'da indanna.
25Ampo' aka' dai nabela umbaya' yato indanna, ya' ma'pahentang tomaraya la dibalu' yato tau sibaha ingkänna sanghapunna anna ingkänna aka ang aha naampui anna malai nabaya'ing yato indanna.
26Ya' malimuntu'mi yato tau ang mai'di indanna pano di olona tomaraya anna ma'tula'i naoatee, 'Sa'bara'kangko dolu, Tuang, kulopo'irang yato ingkänna indangku.'
27Nahingnginna yato tula'na, ya' kende'mi yaling di inahanna yato tomaraya pa'kalemu pano yato di tau, lambi' nalahpa' anna napa'daiing ingkänna indanna.
28Ampo' tahpana sohong yaling mai di ongeang pampahehsaang yato sabua' ang mane puha napa'daiing indanna tomaraya, ya' sitammung mesa sabua' ang senga' ang keindang pano yato di kalaena ampo' sai'di' supu. Ya' unsahkang yato solana anna natehkei lella' siang naoaintee, 'Baya'o indammu, leä!'
29Ya' malimuntu'mi kasi yato solana di hao di olona anna ma'karai naoatee, 'Sa'bara'kangko sämpäi'. Inang la kubaya'ete' yato indangku lambi' lopo'.'
30Ampo' dai napehingngii, anna umpatamai di tahungkung yato solana lambi' lopo' yato indanna.
31Naitanna solanaii yato aka ang nababe, ya' masuhsa asammi nasa'ding. Lambi' nahahpo' pano di tomaraya yato kaha-kaha ang dahi.
32Napesuoing tomaraya ditambai yato tau ang umpakauho-uho solana anna naoaintee, 'Dionto inde sabua' ang handang tau karake! Ingkänna indammu puha asammi kupa'dai aka' malau maseo mai.
33Ampo' akana dae dio ungngaku ungkalemui solamu anna puhamo dio kukalemui?'
34Ya' keaha' liung yato pongkahana anna nabehoi yato tau pano di setantaraang ang si undahha to ditahungkung, lambi' yato tau nadahha yato setantaraang lambi' ullopo'i yato indanna pano di tomaraya ang boheng haling napa'daiing dolu.
35La napanoa tuntone' Ambeku yaho di suruka pano di dioa' ke dai ungngampungngi solamu sibaha sangkalebu inahammu."