Dual Panel1Napatahhi' bumi tula'na Puang Yesus umpake pohapangang naoatee,
2"Kapahentaanna Puang Alataala sihapang mesa tomaraya ang umpaaha pa'rame-rameang kakabenganna änä'na ang muane.
3Tahpana lambi' tempona pa'rame-rameang, unsuong sabua'na inde tomaraya untambai yato tau ang inang puha dipainsangngi la sule ullumba pa'rame-rameang. Ampo' dai sika naaku sule.
4Unsuo salang sabua'na ang senga' anna nabokungngii tula' naoaintee, 'Oaite pano di ingkänna ang puha dipainsangngi la sule ullumba inde pa'rame-rameang: Ingkänna ang la diande sadia asammi, noanna ingkänna tunuang puha asammi kutunu sinnoanna saping malompo anna saping lundaha. Ingkänna yatoo sadia asammi. Dahi laomokoa' pano lumbai yato pa'rame-rameang.'
5Ampo' yato ingkänna tau ang natambai dai naaku umpehingngii yato petambana sabua'na tomaraya. Le'ba'i supu pantang ungngola lalanna: aha ang mao pano di bela'na, aha ang mao ma'känto',
6anna aha toi ang senga' unsahka yato sabua' mane nadahhai anna napateii.
7Nahingnginna tomaraya yato ang sika nababe, ya' kende'mi pole' kakeaha'anna. Umpahentang setantaraanna anna malai mao do untallangngi yato ingkänna to papateang, noa tunne' bohtona la nasohe mämpu'.
8Puhanna yatoo, ma'karang tomaraya pano di ingkänna sabua'na ang senga' naoatee, 'Sadia asammi ang la dipake ma'rame-rame kakabengang, ampo' yato ingkänna ang hali kutambai ullumba inde pa'rame-rameang dai sihatang la kutambai sule.
9Dahi dinoa laokoa' pano di ingkänna lalang käyyäng anna untambaii sule samamo mai'dinna tau ang unsitammuing di lalang ullumba inde pa'rame-rameang kakabengang.'
10Sika le'ba'ing yato ingkänna sabua' anna untambaii dia siamo tau ang nasitammuing di lalang, moi tau mapia, noa tunne' tau karake. Lambi' punno yato ongeang pa'rame-rameang kakabengang tandana mai'di yato to sule.
11Pihsananna inde tomaraya pemala la ungngita ingkänna to sulena. Ya' tamang di ongeang pa'rame-rameang. Ungngitang mesa tau di alla'na yato to sule ang dai umpake yato pakeang ang setonganna pahallu napake to sule yaling di pa'rame-rameang to kabeng.
12Mekutanang tomaraya pano naoatee, 'O sammuane, akana malao sule done ullumba pa'rame-rameang anna dao mampake yato pakeang ang setonganna pahallu dipake tama di pa'rame-rameang kakabengang?' Ampo' yato tau mahtang supu dai aha ma'kara.
13Ungngoaminte sabua'na yato tomaraya, 'Pungoia' teyyena anna bihti'na inde tau mane umpentibeing sohong tama di ongeang ang handang mapähtäng, ang la naongei tau sika umbu salamang ang kamateang.'"
14Puhai yatoo ya' natämpä'ing pohapanganna Puang Yesus naoatee, "Mai'di tau ang ditambai ampo' sai'di' supu ang dipillei."
15Donetoo sangngaka-sangngaka to Farisi le'ba' umpaaha kasitammuang la unsitula'-tula'i ang la napanoa unnahoang Puang Yesus umpake sangngaka-sangngaka pekutana anna malai nasahka.
16Sika unsuong to pentindo'na inde to Farisi sibaha sangngaka-sangngaka petauanna Herodes mekutana pano di Puang Yesus. Ampo' sika nase'de' dolu naoatee, "O Tuang, kiinsang kioate maroho inahao anna tahpa' asang pepakuhummu pano di ingkänna tau, aka' mampakuhuo sitonda kamarohoang inaha anna katahpa'ang didiona lalang ang tahpa' ang nakärä'i Puang Alataala. Anna dao aha mahea' pano di tau senga', moi to pa'kuasa; dao aha umpasisenga'-senga' tau.
17Dahi umba dio noa pihki'mu? Situhu' atohang ada'ta, la malaraka la tabaya'a' sima pano di to ma'pahentana Kaisar, daraka?"
18Ampo' nainsang Puang Yesus aka yato pahtuyu karakenaii, lambi' napa'kara kahha'i naoaintee, "Oa' to kalasi! Akaboi anna sulekoa' unsändä'iä'?
19Bahaingkä' mai kuita ne mesa doi' bahsi ang si napake tau umbaya' sima." Ya' sika nabahaming pano mesa doi' bahsi.
20Napepaitaming Puang Yesus yato doi' anna mekutanai pano diii naoatee, "Menna inde kekambara' anna menna kesanga?"
21Sika mentimba'mi naoatee, "Kambara'na anna sanganna Kaisar." Naoante Puang Yesus, "Dahi monna noa, ya' beaia' pano di to ma'pahenta Kaisar aka ang la pahallu umbea anna beaia' pano di Puang Alataala aka ang la pahallu umbea."
22Nahingnginna yatoo, ya' sika pusa' asammi anna le'ba'i umpellei Puang Yesus.
23Allo donetoo suleing sangngaka-sangngaka to Saduki ullumba Puang Yesus. (Inde mai tau dai sika napetahpa' la aha katuhoang sumule di hoi' mai di kamateang.)
24Sika mekutanang pano naoatee, "O Tuang, puha nauki' Musa inde pahenta pano di kita': 'Ponna aha mesa muane ang mate dake' hali keänä' bahinena, ampo' ahake' ullu'na yato muane, pahallu la umpobahine sala inde bahinena ullu'na ang mate anna malai aha peänä'anna yato to mate.'
25Ampo' puhang dahi dinne noa indee: Dolu aha pitu to siullu' ang tohho yaling inde di bohto. Yato ang ulua kebahine, ampo' mate dake' keänä'. Dahi yato bahinena napobahine sala ullu'na ang kaderuanna anna malai umpaaha peänä'ang pano di kakana ang puha mate.
26Ampo' yato ullu'na mate toe' dai hali keänä'. Napobahine bumi ullu'na ang katallunna ampo' noa toe', lambi' yato ullu'na ang kapitunna noa asang, mate dai aha änä'na.
27Katämpä'anna mate toe' yato bahine.
28Dahi ponna ke tuhong sumule to mate di hoi' mai di kamateang, ya' mennang kahang di alla'na yato pitu to siullu' ang la mendahi muanena yato bahine? Aka' puha asammi umpomuane yato pitu to siullu'."
29Sika natimba'mi Puang Yesus naoaintee, "Sala pähäng si'da-si'dakoa' ungngoaa'te dai aha katuhoang sumule di hoi' mai di kamateang, aka' dakoa' umpähäng ihsi Suha' Masero anna kakuasaanna Puang Alataala.
30Noarea'te' indee: ponna lambi'mi tempona katuhoanna sumule to mate di hoi' mai di kamateang, ya' dante' la aha tau ang dipakabeng. Ampo' katuhoanna hupatau la sinnoang katuhoanna malaeka' yaho di suruka, tala kebahine, tala kemuane.
31Ampo' didiona katuhoanna sumule to mate di hoi' mai di kamateang, umbai puhangnga'te' umbata yaling di Suha' Masero ang natula' Kalaena Puang Alataala naoatee,
32'Kodi'mito Dehata ang napenombai Abraham, Ishak anna Yakub.' Donetoo Abraham, Ishak anna Yakub inang puhang mate, ampo' naangka' tuhoke' Puang Alataala. Aka' tadiaete' to mate ang umpenombai Puang Alataala ampo' to tuhoetee'."
33Yato tau mai'di sika pusa' asang liu tahpana unghingngi umba noa pepakuhunna Puang Yesus.
34Tahpana nahingngi sangngaka-sangngaka to Farisi umba noa pampakalesona anna pentimba'na Puang Yesus, lambi' ingkänna to Saduki dai nainsang ma'kara, ya' sika tihimpummi anna maoi ullumba Puang Yesus yaling di mesa kombongang.
35Pihsananna ahang mesa di alla'naii, dianto mesa to pampakuhu ada'na to Yahudi, unsändä'i Puang Yesus umpake mesa pekutana naoatee,
36"O Tuang, ang umba kahang pahenta ang handang pahallu yaling di Atohanna Musa?"
37Mentimba'mi Puang Yesus pano naoatee, "Kalemuikoa' Puang Alataala Dehata ang umpenombai, penumpuii yaling di inahammu, yaling di pihki'mu anna yaling di pembabemu.
38Dianto pahenta ang handang uhuna anna handang pahallu.
39Anna pahenta ang kaderuanna, sinnoa siang pahenta ang uhuna dianto: Kalemuikoa' para-parammu hupatau sinnoa ungkalemuikoa' kalaemu.
40Yaling inde di derua pahenta tihimpung asammi ingkänna pepakuhunna Musa anna pepakuhunna ingkänna nabi."
41Tihimpungke' sangngaka-sangngaka to Farisi di hao di behinna Puang Yesus. Ya' mekutanang Puang Yesus pano diii naoatee,
42"Umbane' noa pampihki'mua' didiona To Dilanti' la Mepasalama'? Peänä'anna menna?" Sika mentimba'mi naoatee, "Peänä'anna Tomaraya Daud."
43Naoamintee, "Ponna noa, akana malai inde To Pepasalama' naangka' Dehatanna Daud naonge mengei ungnguki' inde pampudiang yaling di petehtena Inaha Masero naoatee,
44'Puang Alataala ma'kara pano di Dehatangku naoaintee: Ohko'o di hao di tando kuanangku, lambi' ingkänna balimmu kusuo asang malimuntu' di olomu.'
45Dahi ponna ke di mendehatannai nasangai Tomaraya Daud To Dilanti' la Mepasalama' dianto 'Dehatanna,' ampo' mala toi ke di mentolinonai 'peänä'annaetee'.'"
46Dai pole' sika nainsang mentimba' moi poro mesa tau di alla'na yato to Farisi. Ya' napahandu'mito donetoo dang aha moi mesa tau la bahani la napekutana salaing.