Dual Panel1Tahpana marondonna mebengngi'-bengngi', ya' umpaahang kabohtuang ingkänna kapala imang anna setobaha'ang la untahungkung mate Puang Yesus.
2Sika umpungong Puang Yesus mane nabahai mengngolo pano di Tuambahsa' Pilatus ang ungkapalai yato Poropensi Yudea.
3Yato ta Yudas dianto tau ang umbeho Puang Yesus pano di tau ang la mampatei. Tahpana unghingngi kaheba ang naoate Puang Yesus ditahungkung mate, ya' manohsong anna maoi do umpasule yato doi' tallumpulo pera' ang hali natahimbo, pano di kapala-kapala imang anna setobaha'ang,
4anna naoaite pano, "Kusa'ding sala si'da-si'da aka' umbehoä' tau ang dai kekasalaang lambi' ditahungkung mate." Ampo' sika natimba' naoaintee, "Ya' dantokang kiinsang. Nee uhu'ammu tuburanto dio."
5Lambi' inde ta Yudas umpentibeming yato doi'na tama di Dasang Ada', mane maoi do mentuyo untoke' kalaena.
6Nadohe'mi kapala-kapala imang yato doi' anna sika naoaitee, "Inde doi' dianto doi' allinna sungnga'na mesa tau. Situhu' atohang ada'taa' inde doi' dai mala dipodoi' penombaang yaling di Dasang Ada'."
7Tahpana puha sika situla'-tula', ya' nabohtung naoate yato doi' la naalliing sallimbo tampo ang la si napangku'bu'i to mate ang sule di hao mai di bohto senga'. Sanganna yato ongeang dianto 'Bela'na to pantampa kohing tampo.'
8Ampo' aka' dialli umpake doi' allinna kamateanna mesa tau, dianto anna disangang yato tampo lambi' dinoa 'Tampo Haha.'
9Ya' sundummi yato ang puha natula' Nabi Yeremia naoatee, "Sika untahimbo sumule yato tallumpulo doi' pera', dianto doi' allinna mesa tau ang puha napama'tantu to Israel.
10Anna yato doi' la sika napake ungngalli bela'na to pambabe kohing tampo, situhu' tula'na Puang Alataala pano di kodi'."
11Donetoo mengngolong Puang Yesus pano yato di tuambahsa' poropensi ang disanga Pontius Pilatus. Mekutanang Pilatus pano naoatee, "Diongka ne Tomarayanna to Yahudi?" Mentimba'mi Puang Yesus naoatee, "Noanto ne ang untula'."
12Ampo' yatone' pantanda' tahuhunnaii ingkänna kapala imang anna setobaha'ang pano di Puang Yesus, daine' naaku natimba'i, mahtang supu.
13Ma'kara bumi Pilatus pano naoatee, "Mai'di inde mai tau ang mantanda'o membabe karake. Ahanaraka dai unghingngi, akaraka?"
14Ampo' tontong lolo dai aha mentimba' Puang Yesus, mahtang supu. Lambi' yato Pilatus pusa' si'da-si'da.
15Ang mendahi kabiasaang di hao yato di poropensi dianto: di tempona pa'rame-rameang Paskana to Yahudi, mala dilahpa' mesa tau yaling mai di tahungkung, situhu' kabohtuanna tau mai'di.
16Anna donetoo sipatu aha mesa tau yaling di tahungkung ang handang kainsangang kakarakeanna. Yato tau disanga Barabas.
17Dahi aka' tihimpummi di hao di panghohto'ang mai'di liu tau, ya' mekutanang Pilatus pano diii naoatee, "Mennaa' kahang ang ungkärä'i la kulahpa'ingkoa' yaling mai di tahungkung, Barabasdaka bahtu' Yesus ang si disanga toe' To Dilanti' la Mepasalama'?"
18Ma'tula' noa inde Pilatus, aka' inang nainsang naoatee nasuhung ingkänna to pambahananna to Yahudi umbeho Puang Yesus pano, aka' sika nakasuehe.
19Di tempona menge mohko' Pilatus di hao di ohko'ang ang si naongei to pambohtu kaha-kaha, ya' lambi'mi pano pepasanna bahinena naoatee, "Daa umpentamaii kaha-kahanna ne tau ang dai aha kasalaanna. Aka' mane puhaä' mangngipi didiona ne tau, anna inde pangngipingku napakahea'-hea'ä'."
20Ampo' yato ingkänna kapala imang anna setobaha'ang semata unse'de' yato tau mai'di anna malai malau pano di Pilatus lambi' yato Barabas la dilahpa' anna ditahungkung matei nei' Puang Yesus.
21Mekutana bumi yato Pilatus pano diii naoatee, "Mennaa' kahang indo to derua ang ungkärä'i la kulahpa'ingkoa'?" Sika kohang mentimba' naoatee, "Barabas!"
22Mekutana sala bung Pilatus naoatee, "Ponna noa, ya' aka ang pahallu kubabe pano di Yesus ang si disanga toe' To Dilanti' la Mepasalama'?" Sika kohang naoatee, "Pahallu ditoke' dai' di kayu sitambeng!"
23Mekutana bung Pilatus naoatee, "Ampo' kakarakeang aka ang puha nababe?" Ampo' yato ingkänna tau tuhtuang sika koha napekäyyängngi naoatee, "Pateirea'! Toke'ia'!"
24Tahpana nasa'ding Pilatus dang aha lalang senga' ang la mala nababe, anna la kende'rang nei' katadahiang yato di alla'na tau mai'di, ya' ungngalang uhai anna umbaseii teyyena di olona tau mai'di, anna ma'karai naoatee, "Dä' tangkung didiona kamateanna inde tau! Tangkung toboia' dio kalaemu!"
25Ingkänna yato tau mai'di mentimba' naoatee, "Pabeii, kami' mantangkung ne kamateanna lambi' naung di peänä'angki' la mantangkung toe'."
26Ya' nalahpa'ming Barabas yato Pilatus situhu' palaunna tau mai'di. Pihsananna unsuoi tau umpohetong Puang Yesus, mane nabahai dai' la natoke' di kayu sitambeng.
27Donetoo inde Puang Yesus nabahang tantara tama di dasanna tuambahsa', mane sika untambai asangngi solana tihimpung.
28Mane sika ungngalaii yato kaya' kalambe'na Puang Yesus ang napake anna nabala'i kaya' kalambe' malahtu ang si napake tomaraya.
29Sika umpapiai songko' kedui mane nasongko'ing. Mane sika ungngalai huntung anna nabea pano di teyye kuananna. Puhai yatoo, ya' sika malimuntu'mi di tingngayona umpakainu'-inu' Puang Yesus naoatee, "Tabe', Tomarayanna to Yahudi."
30Yato setantaraang sika unsitingkuru-kurui Puang Yesus, mane naalai yato huntunna ang sika napahuntungngiing napenghahi'ing dai' di bää'na.
31Tahpana puha sika napakainu'-inu', ya' sika naalaing sumule yato kaya' malahtu ang sika napapakeiing anna nabala'i sumule yato inang kaya'na toboe'. Mane nabahai sohong aka' la ditoke' dai' di kayu sitambeng.
32Donetoo sika le'ba'mi yato setantaraang umbaha Puang Yesus la do natoke' dai' di kayu sitambeng. Yaling di pellaoannaii, sitammung mesa tau disanga Simon ang sule di hao mai di Bohto Kirene. Ya' sika napahsang umbulle yato kayu sitambeng.
33Tahpana sika lambi' dai' di mesa tanete saohko' ang disanga 'Golgota' (bahtuanna: ongeang kahuhhung),
34sika umpaenu'mi Puang Yesus angkoro' ang puha dipasihau aka-aka ang mapäi'. Ampo' tahpana nasändä', ya' dai naaku naenu'.
35Puhai yatoo, ya' sika untoke'mi Puang Yesus dai' di kayu sitambeng, mane nasusa-susa yato kaya'na umpake nomoro' anna pantangngi mandohe'.
36Mane sika mohko'i di hao madaka.
37Yaho di haho bää'na Puang Yesus dipadehke' papang ang naonge tiuki' aka suhunna anna ditahungkung matei naoate, "Yesus, Tomarayanna to Yahudi."
38Donetoo aha toe' derua tau senga' nasibahaing Puang Yesus ditoke', mesa tando di kuananna anna mesa tando di kaihinna. Yato tau sahing to bokoti.
39Yatoo ingkänna to liu lalang sika umbisi' Puang Yesus anna nabilli'ing matanna.
40Aha ang mangngoatee, "Kusanga dio ne ang la ungkarakei Dasang Ada'na Puang Alataala, mane umpake'de' salai yaling di tallu allona. Ke disangao Änä'na Puang Alataala, ya' tuhungngo yaho mai, pasalama'o kalaemu!"
41Noa tunne' ingkänna kapala imang, to pampakuhu ada' anna setobaha'ang, sika umbisi' toe' Puang Yesus naoatee,
42"Mala nei' umpasalama' tau senga', ampo' akana bilang daine' umpasalama' kalaena? Ponna inang Tomarayanna si'da to Israel, ya' mapiae' ke la tuhungngi yaho mai di kayu sitambeng. Ponna noa, ya' kipetahpa'mitoo kioate To Pepasalama' si'da.
43Mampetahpa' liu toe' la naposolai lolo Puang Alataala, anna mangngaku naoate Änä'na Puang Alataala. Dahi taitaia' dinoa la napasalama' si'daraka Puang Alataala bahtu' daraka."
44Yato to bokoti ang nasibahaing Puang Yesus ditoke' yaho di kayu sitambeng ma'tula' toe' noa.
45Donetoo umbai tehte' sampulo derua tängngä allo, ya' pihsa' malillimmi kalane lambi' tehte' tallu di solo' allo.
46Tahpana tehte' tallu solo' allo, ya' mekohang Puang Yesus yaling di basana napekäyyängngi naoatee, "\Eloi, Eloi lama sabakhtani?\" ang bahtuanna, "O Puang Alataala, Dehatangku, akaboi anna umpelleiä'?"
47Nahingnginna yato sangngaka tau ang ke'de' di hao ampo' sala' hingngi, ma'kara naoatee, "Hingngirea', untambai Nabi Elia!"
48Mesa di alla'na yato tau mai'di tahpa lumumpa' ungngala lomo', mane natonängngi naung di angkoro' mainsung, nasengke'i di pote' bulo anna nadoangngi dai' umpaenu' Puang Yesus.
49Ampo' yato tau senga' ang aha di hao donetoo sika unsängkäi yato tau naoatee, "Dakäi' dolu. Diare' taitaia' pole' dinoa la sule si'da are Elia napasalama'."
50Ya' mekoha sala bung Puang Yesus napekäyyängngi mane pohsu'i penanahanna.
51Yaling di Dasang Ada'na Puang Alataala aha inni' kaing makambang ang ungngalla'i Tambing Masero anna Tambing Handang Masero. Donetoo matena Puang Yesus, tahpa tilällä' tibahe derua mengkalao yaho lambi' naung di pote'na. Ya' dahi siang lino' käyyäng anna ingkänna tanete batu bika-bika.
52Noa tunne' mai'di ku'bu' titungka', lambi' mai'di petauanna Puang Alataala ang puhang mate tuho sumule di hoi' mai di kamateang.
53Anna puhanna tuho sumule Puang Yesus di hoi' mai di kamateang, ya' sika sohongngi tunne' di hoi' mai di ku'bu' yato petauanna Puang Alataala anna sika umpalanda'i kalaena pano di mai'di tau yaho di Yerusalem ang si disanga 'bohto masero.'
54Yato to pambahanang tantara anna ingkänna setantaraang ang nabahanang ang menge undakai Puang Yesus, sika mahea' asang liu ungngita yato lino' käyyäng anna senga'nake' ang menge dahi, anna ma'karai naoatee, "Tahpa'e' tora' indee tau Änä'na si'da Puang Alataala!"
55Donetoo aha toe' sangngaka-sangngaka bahine ang sika ke'de' mangngita makahao. Inde mai bahine dianto ang umpotindo'-tindo'i anna umposaha Puang Yesus mengkalao di hao di Galilea.
56Di alla'na yato bahine aha Maria Magdalena, Maria indona ta Yakobus anna ta Yusuf, anna bahinena ta Zebedeus.
57Tahpana la benging, suleng mesa to Arimatea ang disanga Yusuf. Inde Yusuf to makaka anna inang to pentindo'na toe' Puang Yesus.
58Le'ba' mengngolo pano di Tuambahsa' Pilatus umpalau bahkena Puang Yesus la naku'bu'. Ya' umpahentang setantaraanna Pilatus anna malai sika nabea yato bahkena naku'bu'.
59Napatuhummi Yusuf yato bahke mane nabalungngi kaing bahahsi.
60Anna napalampa'i tama di ku'bu' bakahu ang inang puha nabombeng tama di batu papang. Puhanna napatama, ya' ungkisu'mi mesa batu käyyäng nalapa'ing yato baba ku'bu'na, mane le'ba'i napellei.
61Ampo' yato Maria Magdalena anna Maria ang senga' sika ohko' di hao yato di baba ku'bu' mangngempe.
62Puhanna allo pampatokaang ungngoloi allo katohhoang, suleng kapala-kapala imang anna sangngaka-sangngaka to Farisi mengngolo pano di Pilatus,
63anna sika naoaitee, "O Tuang, kikalehaike' naonge tuhoke' yato to la umbulingngi ingkänna tau, hali naoatee, 'Ponna lambi'mi tallu allona, ya' tuhomä' sumule di hoi' mai di kamateang.'
64Dianto anna sulemang anna malai umpahenta asang ingkänna setantaraang umpamadakai yato ku'bu' lambi' allo katallunna. Ponna dai dipanoa, ya' umbai la sule yato pahsikolana anna umbokoi yato bahke mane ungngoainte ingkänna hupatau, 'Tuho si'dang sumule di hoi' mai di kamateang.' Ponna dahi noa, ya' umbai la mai'di puhane' tau ang la nabulingngi inde kadahiang ang katämpä' andana yato ang dahi dolu."
65Naoante Pilatus pano diii, "Inderang mai to pandaka. Dinoa laokoa' do dakai manahpai yato ku'bu'."
66Ya' sika le'ba'mi yato to pandaka. Napamahha'mi yato batu pelapa'na baba ku'bu' mane umpapiai tanda anna malai maleso dioate dai mala dibuhkei. Aha toi to pandaka ke'de' di olona anna malai dai aha tau mandungku'i.