Alkitab Mobile SABDA
[VER] : [ARALLE]     [PL]  [PB] 
 <<  Markus 15 >> 

1Mebengngi'-bengngi' ma'himpung sämpäi' ingkänna To Mahkeada' Yahudi, diantoo: kapala-kapala imang, to pampakuhu ada' anna setobaha'ang. Sika nabohtu la umpungo Puang Yesus anna nabahai pano di Tuambahsa' Pilatus.

2Lambi' pano nakutanaing Pilatus, naoaintee, "Diongka ne tomarayanna to Yahudi?" Natimba'mi Puang Yesus, naoatee, "Noanto ne ang untula'."

3Kapala-kapala imang mangngoatee, "Mai'di pembabena ang tanoa ne tau, tahuhu liu ang nababe."

4Mekutana sala bumi ta Pilatus, naoatee, "Daraka la ungngaku mentimba'? Hingngike' mai'di liu aka ang natanda'ingko!"

5Ampo' dai aha aka natimba'ing Puang Yesus. Dianto anna pusa'i Pilatus.

6Suleng tau mai'di anna napalaui ke malai dinoa dituhu'i kabiasaang dianto: pihsang sahtaung di tempona pa'rame-rameang mala dilahpa' mesa tau yaling mai di tahungkung situhu' pampalaunna tau mai'di. Donetoo aha mesa tau ang disanga ta Barabas ditahungkung sibaha sangngaka-sangngaka solana ang papateang naonge ahai kaha-kaha ullabang to pa'pahenta.

7(15:6)

8(15:6)

9Mekutanang Pilatus, naoatee, "Oa' to Yahudi, la ungngakurakaa' ke kulahpa'ingkoa' inde Yesus, tomarayammu?"

10Aka' inang nainsang naoatee inde kapala-kapala imang umbeho pano Puang Yesus aka' nakasuehe.

11Ampo' yato kapala-kapala imang unse'de' tau mai'di anna malai umpalau Barabas ang la dilahpa'.

12Mekutana sala bumi pano di tau mai'di, naoatee, "Ponna ke noai nee, ya' aka la kubabeing pano yato di tau ang ungngoaingnga'tee: Tomarayanna to Yahudi?"

13Sika kohang naoatee, "Pateiia'! Toke'ia'! Entengngia' teyyena!"

14Sika nakutanai sala bumi Pilatus, naoatee, "Ampo' kakarakeang aka ang puha nababe?" Ampo' tuhtuang mekoha, naoatee, "Pateirea'! Toke'ia'!"

15Inde Pilatus pemala umpamasannang yato inahanna tau mai'di, dianto anna nalahpa'ing ta Barabas. Mane unsuoi tau umpohetong Puang Yesus, mane nabahai do la natoke' dai' di kayu sitambeng.

16Nabahang tantara inde Puang Yesus tama di känto' poropensi mane untambai asangngi solana tihimpung.

17Sika napakainu'-inu' sibaha napakauho-uho. Umpakei Puang Yesus kaya' ang sinnoa hupanna ang si napake tomaraya anna umpapiai songko' kedui mane nasongko'ing.

18Puhaitoo, kamba' natabe'ing malimuntu' naoatee, "Tabe', Tomarayanna to Yahudi." Pihsananna sika ungngalang huntung anna napa'lengko'-lengko'i bää'na, mane napa'tingkuru-kuruii.

19(15:18)

20Puhanna sika napakainu'-inu', ya' sika naalaing sumule yato kaya' malahtu ang sika napapakeiing anna nabala'i sumule yato ang inang kaya'na toboe'. Mane nabahai sohong aka' la ditoke' dai' di kayu sitambeng.

21Di hao di tängngä lalang sitammu mesa tau ang disanga ta Simon. Inde ta Simon, dianto ambena ta Aleksander anna ta Rufus, to Kirene, sule di hoi' mai di bohto senga', la tama di bohto mahoa'. Sika napahsang umbulle yato kayu sitambeng.

22Sika umbahang Puang Yesus dai' di mesa tanete saohko' ang disanga 'Golgota' (bahtuanna: 'ongeang kahuhhung').

23Lambi' dai', sika napaenu' angkoro' ang dipasibolo sanghupa pakuli pepamasahhu' ang disanga mur, ampo' dai naaku.

24Pihsananna di dai'-dai' allo, sika napäso'mi teyyena anna bihti'na naung di kayu sitambeng, mane napake'de'i naung di bombeng. Pihsananna nasusa-susa yato kaya'na Puang Yesus umpake nomoro' anna pantangngi mandohe'.

25(15:24)

26Yaho di haho bää'na aha papang ang dipangnguki'i suhunna anna ditoke'i ang naoatee "Tomarayanna to Yahudi."

27Napake'de' tou nei' derua kayu sitambeng senga' ang napantoke'i derua to paboko, mesa tando di kuananna, mesa tando di kaihinna Puang Yesus.

28[Dahi tahpa'mi ang tiuki' yaling di Suha' Masero, diantoo: mesa tunne' ang diangka' to pabali-bali.]

29Yatoo ingkänna to liu lalang sika umbisi' Puang Yesus anna nabilli'ing matanna. Aha ang mangngoatee, "Kusanga dio ne ang la ungkarakei Dasang Ada'na Puang Alataala, mane umpake'de' salai yaling di tallu allona. Ke disangao to manähäng, ya' tuhungngo yaho mai, pasalama'o kalaemu!"

30(15:29)

31Noa tunne' inde kapala-kapala imang sibaha to pampakuhu ada' mambisi', naoatee, "Mala nei' umpasalama' tau senga', ampo' akana bilang daine' umpasalama' kalaena?

32Ponna inang To Dilanti' la Mepasalama', Tomarayanna si'da to Israel, ya' mapiae' ke la tuhungngi yaho mai di kayu sitambeng. Ponna noa, ya' kipetahpa'mitoo kioate To Dilanti' la Mepasalama' si'da." Moi yato derua to paboko ang ditoke' di behinna sibali mambisi' toi.

33Donetoo umbai tehte' sampulo derua tängngä allo, ya' pihsa' malillimmi kalane lambi' tehte' tallu di solo' allo.

34Tahpana tehte' tallu solo' allo, ya' mekohang yaling di basana Puang Yesus napekäyyängngi naoatee, "\Eloi, Eloi, lama sabakhtani?\" ang bahtuanna: "O Puang Alataala, Dehatangku, akaboi anna umpelleiä'?"

35Nahingnginna yato sangngaka tau ang ke'de' di hao, ampo' sala' hingngi, ma'kara naoatee, "Hingngirea', untambai Nabi Elia!"

36Mesa di alla'na yato tau mai'di tahpa lumumpa' ungngala lomo', mane natonängngi naung di angkoro' mainsung, anna nasengke'i di pote' bulo, anna nadoangngi dai' umpaenu' Puang Yesus, lella' ma'kara, naoatee, "Taempeiia' umbato ke sulei Elia napatuhung."

37Mekohang Puang Yesus napekäyyängngi, ya' pohsu'mi penanahanna.

38Yaling di Dasang Ada'na Puang Alataala aha inni' kaing makambang ang ungngalla'i Tambing Masero anna Tambing Handang Masero. Donetoo matena Puang Yesus, tahpa tilällä' tibahe derua mengkalao yaho lambi' naung di pote'na.

39Yato to pambahanang tantara ang ke'de' di olona kayu sitambeng ungngita umba noa kamateanna Puang Yesus, mane ma'karai naoatee, "Tahpa'e' tora' indee tau Änä'na si'da Puang Alataala!"

40Aha toe' sangngaka-sangngaka bahine ang mangngita makahao ang sibaha-baha Maria Magdalena, Salome anna Maria ang indona Yakobus ang mahäti' anna Yusuf.

41Dianto inde ingkänna bahine ang sika umposolai Puang Yesus naonge hoi'i di Galilea. Anna mai'dike' bahine senga' ang nasibahaing sule hoi' mai ang tohho di Yerusalem.

42Donetoo di mahammo, ampo' tadiake' pampahandu'ang allo katohhoang,

43sule mesa to Arimatea, ang disanga Yusuf, umpellambi'i Tuambahsa' Pilatus. Inde Yusuf mesa tunne' di alla'na To Mahkeada'na to Yahudi ang dipakeangka', ampo' ang ungngempei Kapahentaanna Puang Alataala. Mengkabahani umpalau bahkena Puang Yesus pano di Pilatus.

44Tingke'du' inde Pilatus tahpana unghingngi kahebana Puang Yesus mate. Tahpa untambaing tantara ang mandakai anna nakutanaii, naoatee, "Mate si'dangka?"

45Unghingnginna pentimba'na yato to pandaka, ya' umpabeing Yusuf inde Pilatus ungngala bahkena Puang Yesus.

46Inde Yusuf tahpa ungngalli pebalung, mane umpatuhungngi bahkena Puang Yesus anna nabalungngi. Puhai yatoo napatamang di ku'bu' batutung ang puha dibombeng tama di batu papang, mane ungkisu'i mesa batu käyyäng pano di baba ku'bu' anna nalapa'ing.

47Donetoo Maria Magdalena anna Maria, indona Yoses, sika nanenne'i umba naongei dipangku'bu'i.


  Share Facebook  |  Share Twitter

 <<  Markus 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran