Alkitab Mobile SABDA
[VER] : [ARALLE]     [PL]  [PB] 
 <<  Markus 8 >> 

1Tempo yatoo aha bung sule tihimpung tau mai'di. Dai keandeang, dianto anna umbahaii pahsikolana Puang Yesus anna naoaintee,

2"Kukalemui liu inde kasi tau mai'di, aka' tallung allona sibahaä' ampo' dai sika keandeang.

3Dahi ponna la kusuo sumule lella' manono, ya' umbai la naala pali di tängngä lalang, londonang aka' aha bure' ang sule kahao."

4Natimba'mi pahsikolana naoatee, "Ya' umbanne' la dipangngalaiing andeang dinne di ongeang mahulla-hulla ang la sihoa dipakandeing inde tau mai'di?"

5Mekutanang Puang Yesus, naoatee, "Sangngakake'a' rotimmu?" Natimba'mi naoatee, "Ahake' pitu."

6Ya' unsuong yato tau mai'di Puang Yesus sika mohko' naung di tampo. Mane ungngalai yato pitu roti anna ma'kuhhu'sumanga'i dai' di Puang Alataala. Puhai yatoo, ya' umbika-bikang yato roti anna nabeai pano di pahsikolana, mane sika nasusaing pano yato di tau.

7Aha tuke'ne' sangngaka-sangngaka bau saohko'. Nakuhhu'sumanga'ing Puang Yesus yato bau mane unsuo boi pahsikolana, naoaintee, "Susa toine' indee."

8Yato tau ang mangngande boho asang. Umbai aha uhpa' sa'bu tau mai'dinna. Pihsananna nahimpummi yato pahsikolana la'binna ang dang napuha tau, ya' punno salake' pitu dakang käyyäng. Puhanna yatoo napabeing sumule pano di bohtonaii,

9(8:8)

10mane dai'i di lopi Puang Yesus sibaha pahsikolana, mao bete' di Bohto Dalmanuta.

11Sangngaka-sangngaka to Farisi sule umpellambi'i Puang Yesus, siteläng anna malai unghingngi ke ahai tula'na ang dai sihatang la natula'. Sika malau pano ke la malai napaitai mesa tanda ang mepusa'-pusa' anna malai sika nainsang naoatee sule si'daraka yaho mai di Puang Alataala.

12Lella' umbi'bi' bää'na inde Puang Yesus, natimba'mi naoatee, "Aka suhunna änä' dinoa anna pemalai nasuoä' umbabe tanda ang mepusa'-pusa'? Ampo' kutula'ingkoa' setonganna dai la kuaku sika kubabeing."

13Mane umpelleii yatoii anna mendai'i di lopinna, mane le'ba'i lubete'.

14Donetoo nakalimpängngi pahsikolana umbaha roti, supung mesa ang nabaha molopi.

15Umpa'karaing pahsikolana Puang Yesus naoatee, "Madakakoa' pano di raginna to Farisi anna raginna Tomaraya Herodes."

16Sika napihki'mi aka bahtuanna anna ma'tula' noai, lambi' sipa'kara-kara naoatee, "Aka' umbai daia' kanna' roti tabaha."

17Tahpana nainsang Puang Yesus yato ang sika nasitula'-tula'i, ma'karang naoatee, "Akana unsitula'-tula'irakoa' dio yato roti ang dai kanna'? Dasiake'a' mala umpähäng kakuasaangku? Bahtu' makahha'rakaa' bää'mu?

18Bingarakakoa'too? Butarakakoa'too? Dangkaa' dio ungkalehai naonge umpakandeä' yato limang sa'bu tau, ya' sangngakake'a' baki la'binna ang unghimpung?" Sika natimba'mi, naoatee, "Sampulo deruake' baki."

19(8:18)

20Mekutana bumi, naoatee, "Anna naonge umpakandeä' yato uhpa' sa'bu tau, ya' sangngakake' la'binna dakang ang unghimpungnga'?" Sika natimba' bumi naoatee, "Pituke' dakang."

21Naoaminte Puang Yesus, "Daburakaa' dio ungnginsang kasuleanna kakuasaangku dinoa?"

22Sika lambi'mi bete' di Bohto Betsaida. Donentoo naposolaing sule mesa tau ang buta. Malau pano di Puang Yesus ke la malai naanti anna bono'i.

23Ya' untokeing teyyena yato to buta anna natehtei sohong yaling mai di bohto. Puhai, ya' natingkuruing matanna anna naantii, mane nakutanaii, naoaintee, "Ahangka mala ungngita dinoa?"

24Mennenne'mi inde tau, mane naoaitee, "Io, kuita noa poang kayu sika mellao. Umbai tau."

25Naanti bung Puang Yesus matanna. Ya' napamalohämmi matanna mennenne', bono' siang yato matanna. Ya' tandaang asammi naita.

26Naoamintee, "Laomo sumule pano di dasammu, ampo' daumpalelei tama di bohto."

27Pihsananna Puang Yesus sibaha pahsikolana le'ba'mi pano di bohto-bohto ang sirungku' Kaisarea Filipi. Lella' mellao mekutana pano di pahsikolana, naoatee, "Situhu' tula'na tau ang unghingngia', nasanga mennaä' are' indee?"

28Sika natimba'mi naoatee, "Aha ang mansangao Yohanes to Pantero', aha toe' ang mansangao Nabi Elia bahtu' mesa di alla'na yato ingkänna nabi ang aha dolu."

29Ya' mekutana sala bumi Puang Yesus pano diii naoatee, "Ampo' ponna dioa', mennaä' Ko indee?" Mentimba'mi ta Petrus, naoatee, "Dio, Tuang, To Dilanti' la Mepasalama'."

30Nalahang si'da-si'dang Puang Yesus anna malai dai sika napepainsangnging pano di tau senga' didiona Kalaena.

31Puhanna yatoo, mampakuhung Puang Yesus pano di pahsikolana. Napakaleso liuing didiona kamateanna, naoatee, "Kodi' Änä' to Lino pahalluä' la ungngolai mai'di kamasuhsaang anna dä' natahimbo setobaha'ang, kapala-kapala imang anna to pampakuhu ada' lambi' la dipateiä'. Ampo' yaling di tallu allona la tuhoä' sumule." Nahingnginna yatoo ta Petrus, unghui' siang Puang Yesus pano di behing anna napa'karaii.

32(8:31)

33Mensaileng Puang Yesus pano di pahsikolana mane ungkeaha'i setang ang pemala ungkalambotängngi pengkähänganna Puang Alataala, naoatee, "Palaio done indee, Pongkahana setang! Aka' dao dio umpihki' aka ang napihki' Puang Alataala, supung ang napihki' to lino."

34Pihsananna untambaing tau mai'di sibaha pahsikolana anna naoaintee, "Tau ang la pemala mampentindo'iä' pahallu ungkalimpängngi pangngelo'na toboe' sibaha umbulle kayu sitambeng, mane napentindo'iä'.

35Aka' menna pemala umpamahendeng katuhoanna, la bilang mateetee'; ampo' menna ang tontong mampetahpa' moi dipatei aka' Kodi' anna Kaheba Mapia, dianto ang la dipasalama' sungnga'na.

36Dai aha suhunna mesa tau ang untahongkongngi lino ke dasiang la salama' sungnga'na.

37Aka' dai aha la mala nabea mesa hupatau ang la napopangngalli tama di suruka.

38Di allo ang la di tingngayo la suleä' Änä' to Lino la sibaha kakuasaanna Ambeku anna la naposolaiä' semalaeka'ang masero. Dinoa tohhokoa' yaling di tängngä-tängngäna änä' dinoa ang dai mampetahpa'. Ampo' moinnakatoo, ke ahai ang mampengkasiliingkä' anna umpengkasili toinne' pepakuhungku, la kupengkasili toing nei' ke donentoo di allo kasuleangku.


  Share Facebook  |  Share Twitter

 <<  Markus 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran