Alkitab Mobile SABDA
[VER] : [ARALLE]     [PL]  [PB] 
 <<  Roma 10 >> 

1Oa' solasohongku, kupemala si'da-si'da anna malai to Yahudi la dipasalama'. Dianto ang si kupalau loloing dai' di Puang Alataala.

2Kusa'bii kuoatee, sika untuhu'i si'da-si'da ada' penombaang dai' di Puang Alataala. Ampo' dai sika ungnginsang lalang tahpa' ang la mantehte dai' di Puang Alataala.

3Sika untutu'i matanna pano di lalang ang napatokaing Puang Alataala. Dai sika naaku untuhu'i Puang Yesus Kristus anna malai maroho di olona Puang Alataala; nakärä'i puha nei' untuhu'i lalanna toboe', anna sika pemala umpamaroho kalaena ungngolai Atohanna Musa.

4Kristus untuhu'i si'da-si'da Atohanna Musa. Dahi ponna ke mampetahpa'ingkea' pano, ya' naangka'ingkea' Puang Alataala maroho di olona.

5Aha karanna Nabi Musa dolu ang ma'tula' didiona mendahi maroho di olona Puang Alataala naoatee, "Menna-menna ang untuhu'i ingkänna Atohanna Musa la ullambi' katuhoang mapia."

6Ampo' malaingkea' mendahi maroho di olona Puang Alataala aka' kapampetahpa'anta. Aka' aha tiuki' yaling di suha'na Nabi Musa ang senga' naoatee, "Daumpekutana yaling di inahammu ungngoatee, 'Menna ang la mala dai' di suruka?'" bahtu' "Menna ang la mala naung di ongeanna to mate?" (Bahtuanna: daingkea' pahallu dai' di suruka umpeäng kasalama'ang, aka' haling tuhung Kristus yaho mai. Anna daingkea' pahallu naung di ongeanna to mate, aka' Kristus hali tuho sumule di hoi' mai.)

7(10:6)

8Ma'tula' toi Nabi Musa naoatee, "Kahebana Dehata marungku' liu, dianto yaling siang di tula'mu anna yaling di inahammu." Dianto inde kaheba kapampetahpa'ang ang kipepainsangnging pano di ingkänna tau. Yato kaheba naoatee:

9Ponna ke ungngakuii yaling di tula'mu ungngoatee, "Puang Yesus, Dianto Dehata," anna ke umpetahpa'i yaling di inahammu ungngoatee, napatuho sumule Puang Alataala di hoi' mai di kamateang, ya' la dipasalama'o.

10Aka' yaling di inahanta umpetahpa'ingkea' Puang Yesus, lambi' natahimboingkea' Puang Alataala, sibaha naangka'ingkea' maroho. Anna aka' mangngakuiingkea' yaling di tula'ta, lambi' dipasalama'ingkea'.

11Tiuki' yaling di Suha' Masero naoatee, "Menna-menna ang mampetahpa' pano di Dia dai la bundu."

12Kara indee unghoa ingkänna tau, aka' dai aha dipasisenga' to Yahudi anna tau ang tadia to Yahudi. Mesa supu Dehatanna ingkänna tau, anna käyyäng pa'kalemunna pano di ingkänna tau ang mehumala' dai'.

13Aka' "Menna-menna ang mehumala' dai' di Dehata la dipasalama'."

14Ampo' dai aha tau ang la mala mehumala' dai' di Dehata ke dake' mampetahpa'. Anna dai aha tau ang la mala mampetahpa' ke dake' unghingngi Kaheba Mapia didiona Puang Yesus. Anna dai aha tau la mala unghingngi yato Kaheba Mapia ke dai aha ang mampepainsangnging.

15Anna dai aha tau ang la mampepainsangnging ke dai disuo. Sinnoa ang tiuki' yaling di Suha' Masero dolu naoatee, "Mapia liu kasuleanna tau ang umbaha Kaheba Mapia."

16Ahang sangngaka-sangngaka tau ang disuo umpepainsangnging Kaheba Mapia. Ampo' mai'di tau ang dai umpetahpa' yato Kaheba Mapia. Sinnoa ang nauki' Nabi Yesaya dolu naoatee, "O Puang, dai kanna' tau ang umpetahpa' kaheba ang kipepainsangnging."

17Dahi dianto suhunna anna mampetahpa'mi hupatau aka' sika unghingngi yato Kaheba Mapia didiona Kristus, anna nasuhung mala sika nahingngi aka' aha ang mampepainsangnging.

18Dai mala tapihki' taoatee, dake' aha unghingngi Kaheba Mapia to Israel. Aka' setonganna puhang sika nahingngi. Yaling di Suha' Masero tiuki' naoatee, "Kahebana lele sau tama yaling di lino, anna pa'karanna lambi' pano di siku-sikunna lino."

19Datoi mala tapihki' taoatee, to Israel dai ungnginsang pahtuyunna Puang Alataala. Aka' setonganna sika nainsammi. Aka' aha bahtakara Puang Alataala ang napepainsangnging Nabi Musa naoatee, "Oa' to Yahudi, la kupopa'kasuehekoa' ungngita pa'kalemungku pano di tau ang tadia to Yahudi. Anna la kupakeaha'koa' ungngita pekambi'ku pano di tau ang dä' mangnginsang."

20Aha toi bahtakara Puang Alataala ang maleso liu, ang napepainsangnging Nabi Yesaya sitonda kabahanianna ang naoatee, "Tau ang dä' mampeäng, dianto ang la kupengkalanda'i. Anna tau ang dai mehumala' di Kodi', dianto ang la kupainsangngi mennaä' setonganna."

21Ampo' didionane' to Israel, naoate Puang Alataala ungngolai Nabi Yesaya, "Tuhtu' allong kutandoing teyyeku pemalaä' la sika kutambai, ampo' napa'baliä' supu anna makahha' bää'."


  Share Facebook  |  Share Twitter

 <<  Roma 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran