Dual Panel1Dahi dinoa taala pohapangangngi Abraham, peneneanna to Yahudi. Umba noa anna malai naangka' maroho Puang Alataala?
2Ponna ke diai nasuhung Abraham anna naangka' marohoi Puang Alataala aka' pembabe mapianna, ya' malato ungngangka'-angka' kalaena. Ampo' dai aha suhunna Abraham la ungngangka'-angka' kalaena di olona Puang Alataala, aka' tadia pembabe mapianna nasuhung naangka' marohoi.
3Aka' aha tiuki' yaling di Suha' Masero didiona Abraham naoatee, "Abraham umpetahpa'mi pa'dandianna Puang Alataala, anna aka' kapampetahpa'anna lambi' naangka' marohong Puang Alataala."
4Hapang ke ahai mesa to posaho ang untahimbo sahona, ya' yato sahona daete' dibea kale ampo' inang anu kalaenaetee'.
5Ampo' kasikenteanta Puang Alataala dai sinnoa yato to posaho. Tadia aka' pembabeta nasuhung natahimboingkea' Puang Alataala, ampo' aka' kapampetahpa'anta. Moinnakato anna kekasalaangngingkea', tontong naangka' marohoingkea' di olona.
6Pepakuhu indee sinnoa siang karanna Tomaraya Daud dolu. Aka' naoate Daud, tau ang naangka' maroho Puang Alataala, tadia aka' pembabenaii, dianto ang ullambi' kamasannangang.
7Ma'kara Daud naoatee, "Masannanne' tau ang diampungngi kasalaanna, ang dipa'dai dosanna.
8Masannang hupatau ang kasalaanna dai napadiinahanna Puang Alataala."
9Inde kamasannangang ang natula' Tomaraya Daud dai pano supu di to Yahudi ang motille ampo' pano toi di tau ang dai motille. Aka' sinnoa ang hali kutula' langngena', Abraham naangka' maroho Puang Alataala supung aka' kapampetahpa'anna.
10Pihhang anna diangka' marohoi Abraham? Puhannaraka motille, bahtu' naonge dakake' motille? Ponna tabata tohodolunna, ya' maleso diita: Abraham diangka' maroho di olona Puang Alataala naonge dake' motille.
11Puharang naangka' maroho Puang Alataala mane motillei, anna yato tillena mendahi tanda dioatee maroho di olona Puang Alataala. Dahi maleso taita taoate Abraham naangka' maroho Puang Alataala aka' kapampetahpa'anna naonge dake' motille. Dianto anna sihatangngi Abraham tapoambe. Tau ang tadia to Yahudi ang umpetahpa' Puang Yesus umpoambe Abraham, aka' moinnakato anna dai motille situhu' Atohanna Musa, ampo' sika naangka' maroho toe' Puang Alataala aka' kapampetahpa'anna sinnoa siang Abraham.
12Noa tunne' to Yahudi umpoambe toe' Abraham, aka' mendahi pohapangang pano di ingkänna to Yahudi ang motille anna umpetahpa' Puang Alataala, sinnoa siang Abraham naonge dake' motille.
13Dolu Puang Alataala ma'dandi pano di Abraham lambi' naung di peänä'anna la nabea inde lino mendahi ampuanna. Pahtuyunna Puang Alataala dianto anna malai sika untahimbo yato pa'dandiang aka' kapampetahpa'anna, tadia aka' untuhu'i yato Atohanna Musa. Anna ungngolai inde kapampetahpa'anna lambi' la naangka' maroho Puang Alataala.
14Aka' hapanganna ponna tau ang untuhu'i supu Atohanna Musa mala untahimbo yato pa'dandianna Puang Alataala, ya' daete' disanga kekuna kapampetahpa'anta dai' di Puang Alataala, anna datoine' kekuna yato pa'dandianna.
15Ang tatahimbo di hao mai di Atohanna Musa dianto kakeaha'anna Puang Alataala, aka' tatehkai yato Atohanna. Ponna ke dai aha yato Atohanna, ya' daturingkete' la kekasalaang aka' dai aha atohang ang tatehkai.
16Dahi, naangka'ingkea' maroho di olona Puang Alataala supung aka' kapampetahpa'anta, anna malai tatahimbo yato ang puha nadandi la mebea kale, lambi' ingkänna peänä'anna Abraham la untahimbo yato ang nadandi Puang Alataala. Yato pa'dandinna dai pano supu di to Yahudi ang ungnginsang Atohanna Musa, ampo' moi pano di menna ang mampetahpa' dai' di Puang Alataala sinnoa Abraham. Aka' Abraham dianto ambetaa' ingkännaingke to mampetahpa'.
17Puha ma'tula' Puang Alataala pano di Abraham naoatee, "La kupadahio ambena mai'di tau di umba-umba naongei di lino." Di olona Puang Alataala, Abraham mendahi ambetaa' ingkännaingke to mampetahpa' aka' Abraham umpetahpa' Puang Alataala ang umpatuho to mate anna ang umpadahi aka ang dake' aha dahi; natula' supu anna dahi bumi.
18Abraham mampetahpa' anna hannu dai' di Puang Alataala, lambi' mendahi ambena mai'di tau di umba-umba naongei di lino. Aka' naonge dake' aha änä'na Abraham, ma'dandi Puang Alataala pano, naoaintee, "Peänä'ammu la sinnoa bintäng yaho di langi' mai'dinna."
19Ampo' donetoo sai'di'dang anna sangngatu'mi pahiamanna Abraham; malamma liung kalaena napobua' kamatuaanna. Dia tuke' Sara bahinena tamänäng. Dahi, yaling di inahanna Abraham naoatee dang aha lalang la aha änä'na. Ampo' moinnakato noa, tontong lolo matoto' kapampetahpa'anna.
20Tontong lolo kapampetahpa'anna Abraham anna dai aha bata-bata inahanna yato di pa'dandianna Puang Alataala, lambi' tuhtuang matoho kapampetahpa'anna anna umpudi Puang Alataala,
21aka' mampetahpa' naoate ma'kuasa Puang Alataala umpasundung pa'dandianna.
22Dianto suhunna anna naangka' marohong di olona Puang Alataala.
23Inde kara: "naangka' maroho," tadia pano di Abraham supu,
24ampo' pano di kita' toua' kita'. Ya' natahimbo toingkea' kita' Puang Alataala sibaha naangka'ingkea' maroho di olona ang mampetahpa' dai' di Puang Alataala, To umpatuho sumule Dehatanta Puang Yesus.
25Puang Yesusmitoo ang umbeho Kalaena dipatei unsulängngi dosanta. Anna napatuhoi sumule Puang Alataala anna malaingkea' maroho di olona.