Dual Panel1Ampo' dio Titus, pahalluo mampakuhu situhu' pepakuhu ang setonganna.
2Ingkänna to baha' ang muane pakuhui anna malai sika matahhing inaha, tuho maroho ang la sihatang la dipakeangka' anna undakai kalaena. Pahallu toe' la sika tontong mampetahpa' si'da-si'da moi yaling di kamasuhsaang, anna ma'kalemu liu.
3Noa tunne' ingkänna to baha' ang bahine, pahallu toe' umpakuhu anna malai sika tuho mapia, situhu' pepakuhu ang sule yaho mai di Puang Alataala. Dai mala sika untula' tahuhu tau senga' anna dai mala menu' lambi' malango. Pahallu sika umpepakuhuing didiona kamapiaang
4anna mala toine' sika umpakuhu bahine ang mahäti' la ungkalemui muanena sibaha änä'na,
5la matahhing inaha, tuho masero lella' ungngäto' mapia hapunna, marota' anna tuhu'-tuhu'ang pano di muanena. Aka' monna noang yatoo, ya' dang aha tau ang la umpesalai pepakuhu ang tahpa'.
6Noa tunne' muane ang mahäti' pahallu la umpakuhu, anna malai sika matahhing inaha.
7Yaling di ingkänna kaha-kaha, pahalluo mendahi pohapangang la membabe mapia. Monna ke mampakuhuo, pahallu la umpesi'da-si'dai ang la sihatang dipakeangka'.
8Pakei tula' ang mapia ang la dai napesalai tau senga', anna malai balimmu masili aka' dai aha aka-aka ang la napolalang metula' tahuhuing.
9Ingkänna sabua', pahallu tuhu'-tuhu'ang anna umpamasannang inahanna pongkahana yaling di ingkänna siamo. Dai mala sika pabali-bali,
10damong la maboko. Pahallu sika la umpalanda' lolo kamapiaanna lambi' mala napetahpa' pongkahana anna malai naaku tau mampehingngii pepakuhunna didiona Puang Alataala, dianto To Pepasalama'ta.
11Pahallu la umpakuhu inde sangngaka-sangngaka kombongang la tuho situhu' pepakuhu ang setonganna aka' Puang Alataala puhang umpalanda' mana' pa'kalemunna pano di ingkänna hupatau, dianto ang mepasalama'.
12Dianto indee ang mampaturuingkea' anna malai daingkea' ungkebo'i pa'elo'na Puang Alataala. Noa toi anna malaingkea' dai untuhu'i pangngelo'na to lino. Dipakuhuingkea' anna malai tuho matahhing inaha, maroho inaha yaling di pembabe anna untuhu'i pa'elo'na Puang Alataala.
13Dinoa lella'ingkea' ungngempei allo kamasannangang ang tahannuang ang la tapangngitai kasuleanna anna kamatandeanna Puang Yesus, dianto Dehata To Handang Ma'kuasa anna To Pepasalama'ta.
14Puha umpebeaing Kalaena dipatei anna malai unsulängngi ingkänna hupatau di hao mai di kasalaanna. Napamaseroingkea' anna malaingkea' mendahi petaunna toboe' ang bansa' la si membabe mapia.
15Moi umpakalesoing, moi ungkambahoing, pepakuhu asangnging indee pano di ingkänna ang la mampehingngiio sitonda kakuasaang ang nabeao Puang Yesus Kristus. Ampo' daumpabeii moi poro la mesa tau ang la mangngita-ita naungngo.