Alkitab Mobile SABDA
[VER] : [ARALLE]     [PL]  [PB] 
 <<  Wahyu 11 >> 

1Puhanna yatoo dibeamä' sambose' kayu sinnoa hupanna huntung pepansi, mane naoaingkä'tee, "Laoo do mete'i Dasang Ada'na Puang Alataala sibaha pantunuang penombaang. Ihsa'i sangngaka mai'dinna tau ang menomba yaling.

2Ampo' dane' ummete'i tähämpä'na, aka' puhane' dibehoing pano di tau ang dai ungnginsang Puang Alataala. Yato tau la sika ungngindä'-indä' bohto mahoa' ang masero yaling di uhpa'pulo derua bulanna, bahtu' tallu setangnga pahiamanna.

3La unsuoä' derua sa'bingku ang mekaya' ma'tomate, sika umpepainsangnging kahebaku yaling di sansa'bu dongngatu' unnumpulo allona, bahtu' tallu setangnga pahiamanna."

4Yato derua sa'bi dianto derua bätänna poang zaitun anna derua pampatokoang lampu ang aha di olona Puang Alataala To umpuängang lino.

5Ponna aha tau nasändä' la mangkarakei, ya' la aha api sohong yaling mai di suana ungngämpu'i samai balinnaii. Napanoanto indee umpatei ingkänna tau ang la mekarakei.

6Aha kakuasaanna anna malai dai kene' yaling di tempona umpepainsangnging kaheba ang sule yaho mai Puang Alataala. Ma'kuasa toi umpopendahi haha samai pengkalaoanna uhai. Mala toi umpaaha ma'kahupa-hupa kamasuhsaang yaling di lino diamo naonge sihatang napambabei.

7Puhanna sika umpepainsangnging yato kaheba, ya' sohommi olo'-olo' di hoi' mai di kahoäng to mate anna sika natolla'i napetaloi lambi' mate.

8Bahkenaii la sikalampa' pano di lalang käyyäng yaling di bohto mahoa', ang naonge Dehatanna ditoke' yaho di kayu sitambeng. Sanganna yato bohto dipakonai Sodom bahtu' Mesir tandana membabe karake pano di petauanna Puang Alataala.

9Tau di hao mai di ingkänna bohto di lino la umpahandang yato bahke yaling di tallu setangnga allona, anna dai sika napabei diku'bu'.

10Ingkänna to lino sika kahsi didiona kamateanna yato derua sa'bi. Sika ma'mahoa'-hoa' anna sipakatu sandahupa, aka' yato derua sa'bi puha umpaaha mai'di kamadahhaang pano di ingkänna tau di lino.

11Ampo' puhanna yato tallu setangnga allona, ya' napapenanahang Puang Alataala yato derua sa'bi lambi' tuho sumule. Sika ke'de' siang, lambi' yato tau ang mangngita sika mahea' liu.

12Pihsananna yato derua sa'bi unghingnging kamaha napekäyyängngi yaho mai di suruka sika ditambai dioaintee, "Maikoa' done indee!" Tahpa sika dai' siang di suruka nasapu' salehu' naita yato balinnaii.

13Donetoo dahi siang lino' käyyäng. Bahe sampulona yato bohto mahoa' sitale-tale, anna pitunsa'bu tau mate napobua' yato lino'. Ingkänna tau senga' sika mahea', lambi' sika umpudi Puang Alataala ang ma'pahenta yaho di suruka.

14Katilakaang kaderuanna puhang. Ampo' itai! Katilakaang katallunna la baha' dahi sia bumi.

15Pihsananna yato malaeka' kapitunna umponi terompe'na, ya' ahang kamaha napekäyyängngi yaho di suruka naoatee, "Kakuasaang umpahenta to lino ahang dinoa di teyyena Dehatanta sibaha To Nalanti' la Mepasalama'. Dianto ang la ma'pahenta lambi' sapano-panona!"

16Pihsananna malimuntu'mi yato dompulo uhpa' to dipakeangka' ang mohko' di ohko'annaii di olona Puang Alataala anna menombai.

17Sika naoantee, "O Puang Alataala, To Handang Ma'kuasa, ang aha anna ang inang ahang! Menau-nauang mating aka' puhamo umpake kakuasaammu ang käyyäng anna umpahandu'mi ma'pahenta!

18Ingkänna tau ang dao mangnginsang sika keaha', ampo' lambi'mi tempona umpepaitaing kakeaha'ammu. Lambi' tung tempona umpahehsao ang nababe to mate naonge tuhoke'. Dianto inde tempona la umbea saho sabua'mu, samai nabi, anna pano di petauammu ang mampenombaio, moi memase-mase, moi dipakeangka'. Tempona toi untallangngi tau ang ungkarakei to lino!"

19Puhanna yatoo tibuhke siang Dasang Ada'na Puang Alataala ang yaho di suruka anna landa'i yato Pahti Pa'dandiang yaling di huänna. Tahpa kila' siang anna kundäng käyyäng sibaha lino' anna kene' batu ang makambang.


  Share Facebook  |  Share Twitter

 <<  Wahyu 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel