Alkitab Mobile SABDA
[VER] : [ARALLE]     [PL]  [PB] 
 <<  Wahyu 6 >> 

1Pihsananna ungngitamä' yato Änä' Domba ullohka'i katahpena suha' ang uhuna sibaha kuhingngi kamahanna mesa yato uhpa' hupanna ang menanaha salamang kundäng naoatee, "Maio!"

2Kupahandang bumi anna ungngitaä' mesa arahang mabuhsa' anna yato tau ang mampensakei untokei pana anna dipasongko'i bulahang, pano sihapang mesa tau ang inang si patalo ang mao bou umpealai sala kapataloang.

3Tahpana ullohka'i bung yato katahpena suha' ang kaderuanna yato Änä' Domba, unghingngi bumä' kamahanna yato hupanna ang kaderuanna naoatee, "Maio!"

4Ya' sohong bung mesa arahang ang senga'. Inde arahang pähä'lä' anna ang mampensakei dibea kakuasaang la umpadahi pa'tolla'ang yaling di lino, anna malai hupatau sipate-patei. Dibeang mesa pa'dang kalambe'.

5Ullohka'i bung yato Änä' Domba katahpena suha' ang katallunna. Unghingngimä' yato hupanna ang katallunna naoatee, "Maio!" Kuita burang landa' mesa arahang maloteng. Ang mampensakei untokei sahpasang timbangang anna dibea kakuasaang ungkarakei pinamula.

6Ahang kuhingngi noa kamaha di alla'-alla'na yato uhpa' hupanna ang menanaha naoatee, "Sallite' gandum mahasa pa'sangngalloang disaho allinna, anna tallu lite' gandum tahuhu pa'sangngalloang toe' disaho allinna tandana kabuhohangang. Ampo' daungkarakei bela' zaitun anna bela' angkoro' anna malai dai liba' maho yato kabuhohangang."

7Pihsananna ullohka'i bung yato Änä' Domba katahpena suha' kauhpa'na. Unghingngi bumä' yato hupanna ang kauhpa'na naoatee, "Maio!"

8Ungngitamä' mesa arahang alla'na mamata anna mahihi anna ang mampensakei disanga Kamateang. Mane napelolaii ang disanga Ongeang Kamateang. Sika dipakuasa umpatei sambahe uhpa'na tau yaling inde di lino ungngolai pa'tolla'ang, kabuhohangang, kamakorongang anna olo'-olo' peande.

9Puhanna, yato Änä' Domba ullohka'i bung katahpena suha' kalimanna. Ungngitamä' di hoi'na yato pantunuang penombaang aha sungnga'na tau ang dipatei aka' umpepainsangnging Bahtakaranna Puang Alataala anna mampetahpa' dai' di Puang Yesus.

10Sika koha naoatee, "O Puang, To Handang Ma'kuasa ang masero anna tahpa', sangngakake' masaena mane umpahehsai to lino anna umbala'i aka' napateiang?"

11Sika pantang dibea kaya' kalambe' mabusa anna disuoi mangngempei sämpäi', lambi' sundung yato solana ang la dipatei sinnoa inde maiii.

12Mane ungngita bouä' yato Änä' Domba ullohka'i katahpena suha' kaunnunna. Tahpa dahi siang lino' ang käyyäng liu. Mataallo malilling sinnoa kaya' maloteng, anna bulang malea sinnoa haha.

13Bintäng dondongngi yaho mai di langi' sinnoa boa kayu ara ang dake' matua anna dondongnging di tempona nahoa pepahi käyyäng.

14Langi' tilolong sinnoa ale mane mengkapa'dai, anna ingkänna tanete anna kalantanang masihki' diparende di ongeanna.

15Pihsananna setomarayaang di lino, to keangka', to pambahananna setantaraang, to makaka anna to ma'kuasa, anna tau senga', moi sabua', moi to beba', le'ba' asang membuni tama di leäng anna tama di sihping-sihping batu yaho di tanete.

16Yaling yato di pembunianna sika koha naoatee, "O tanete! O batu! Kahompoiang mai. Buniang indo di hao mai di Tau ang mohko' yaho di ohko'ang tomaraya anna kakeaha'anna indo Änä' Domba!

17Aka' tempo kakeaha'ang suleng. Dinoa sika umpalanda'mi kakeaha'annaii, anna dai aha moi poro la mesa tau ang mantähäng di olona."


  Share Facebook  |  Share Twitter

 <<  Wahyu 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel